லைஃப்ஸ்டைல்
பெண்கள் விரும்பும் வேக்யூம் கிளீனர்கள்

சுத்தம் சுகாதாரம்.... பெண்கள் விரும்பும் வேக்யூம் கிளீனர்கள்....

Published On 2021-10-09 08:24 GMT   |   Update On 2021-10-09 08:24 GMT
இப்பொழுது வரும் வேக்யூம் கிளீனரில் பெரும்பாலான மாடல்கள் மிகவும் இலகுவாக எங்கு வேண்டுமானாலும் எடுத்துச் செல்லக்கூடிய அளவில் அழகாக வடிவமைக்கப்பட்டு வந்துள்ளன.
வீட்டைப் பெருக்கித் துடைப்பது என்பதை மிகப்பெரிய வேலையாக இல்லாமல், விரும்பி செய்யக்கூடிய வேலையாக மாற்றுபவை வேக்யூம் கிளீனர்கள் என்று சொல்லலாம். எங்கள் வீடுகளில் வீட்டு வேலை செய்ய ஆட்களை நியமித்து இருக்கிறோம் என்று சொல்பவர்களுக்கும் இவை உபயோகமான வீட்டு உபயோகப் பொருளாக இருக்கும் என்பதில் எந்தச் சந்தேகமும் இல்லை.

நாம் செய்யக்கூடிய வேலையைக் குறைந்த நேரத்தில் மிகச் சுத்தமாக செய்யக்கூடிய ஒரு வீட்டு உபயோகப் பொருளை யாராவது வாங்காமல் இருப்பார்களா என்ன?

இப்பொழுது வரும் வேக்யூம் கிளீனர்கள் அளவில் சிறியதாகவும், தோற்றத்தில் அழகாகவும், செயல் திறனில் சிறந்ததாகவும், எளிதாக இயங்குவது போலும் வந்துவிட்டன.

பெரும்பாலும் வேக்யூம் கிளீனர்களில் தூசியைச் சேகரிக்கக் கொடுக்கப்பட்டிருக்கும் பையைக் குறிப்பிட்ட கால இடைவெளியில் வெளியிலெடுத்து தூசிகளை முற்றிலும் அகற்றிவிட்டு மறுபடியும் பொருத்த வேண்டும். ஆனால், இந்த வேலையை நாம் மறந்து விடுவதால் அதிகப்படியான தூசியானது அந்த பைகளில் சேர்வதால் நாம் வேக்யூம் கிளீனரை இயக்கும் பொழுது அதன் உறிஞ்சும் திறனானது குறைந்து விடுகின்றது. இதுபோன்ற, பிரச்சனைகள் ஏற்படாதிருக்க இப்பொழுது வரும் வேக்யூம் கிளீனர்களில் தூசியை சேகரிக்கும் பையானது நிரம்பியவுடன் நமக்குத் தெரியப்படுத்தும் படியான அமைப்பானது உள்ளது.

அதேபோல் ஒவ்வொரு முறையும் குனிந்து வேக்யூம் கிளீனரில் இருக்கும் பொத்தானை ஆன், ஆஃப் செய்யாமல் கால்களிலேயே அவற்றை இயக்கிக் கொள்ளலாம்.

இப்பொழுது வரும் வேக்யூம் கிளீனரில் பெரும்பாலான மாடல்கள் மிகவும் இலகுவாக எங்கு வேண்டுமானாலும் எடுத்துச் செல்லக்கூடிய அளவில் அழகாக வடிவமைக்கப்பட்டு வந்துள்ளன. மேலும், காற்றிலிருக்கும் அதிகப்படியான தூசுகளை நீக்குவதோடு, தரையில் விழுந்திருக்கும் முடியையும் சுலபமாக நீக்குகின்றது.

அறையின் மூலைகளைச் சுத்தம் செய்ய, கார்பெட்டுகளைச் சுத்தம் செய்ய, ஒட்டடை அடிக்க, வாகனங்களைக் கழுவ, தரையைக் சுத்தம் செய்ய என தனித்தனியான ப்ரஷ்கள் மற்றும் நம் வசதிக்கேற்ப நீட்டிக் குறைத்துக் கொள்வது போன்ற குழாய்களும் கொடுக்கப்பட்டுள்ளன.

இன்னும் சில வேக்யூம் கிளீனர்கள் வீட்டிலுள்ள தூசியை அகற்றுவதோடு மிகச்சுத்தமாகத் துடைத்துக் கொடுக்கும் வேலையையும் செய்கின்றன. அதேபோல் துடைத்த இடத்தை நிமிடங்களில் காய வைத்துக் கொடுக்கும் வசதியுடனும் வந்திருக்கின்றன. வேக்யூம் கிளீனர்களை இயக்கும் பொழுது சத்தம் குறைவாக வருவது போன்றும் தயாரிக்கப்பட்டு விற்பனையில் அசத்தும் மாடல்களும் வந்து விட்டன. தரை ஈரமாக இருந்தாலும், காய்ந்து இருந்தாலும் அவற்றைச் சுத்தம் செய்ய உதவக்கூடிய ப்ரஷ்கள், எவ்வளவு குறுகிய, இடுக்கலான இடத்திற்குள்ளும் சென்று சுத்தம் செய்யக்கூடிய ப்ரஷ்கள் என பல சிறப்பம்சங்களுடன் நவீனத் தொழில் நுட்பத்துடன் பணிச்சூழலியல் நண்பனாக வேக்யூம் கிளீனர்கள் வந்து விட்டன. இதுபோன்ற வெட்/ட்ரை வேக்யூம் கிளீனர்கள் நமது பணிச்சுமையைக் குறைக்க பெரிதும் உதவுவதால் பெண்களிடையே பெரிய வரவேற்பையும் பெற்றுள்ளன.

இன்னும் சில மாடல்கள் கார், கணினி, புத்தகங்கள், திரைச்சீலைகள், வீட்டிலுள்ள ஃபர்னிச்சர்களிலுள்ள சிக்கலான டிசைன் கைப்பிடிகள் இதுபோன்ற இன்னும் பலவற்றை எளிதில் சுத்தம் செய்யக்கூடியவையாக கைக்கு அடக்கமான மாதிரிகளில் வந்துள்ளன. இவற்றை இயக்குவதும் எளிது. அதேபோல் மிகச்சிறிய இடத்திலும் இவற்றை வைத்துக் கொள்ளலாம்.

இன்றைய காலகட்டத்தில் ஆண், பெண் என இருபாலரும் வேலைக்குச் செல்வதால் வேக்யூம் கிளீனரை இயக்குவதற்கு கூட நேரமில்லை என்று சொல்பவரா நீங்கள்? கவலை வேண்டாம். வீட்டில் வயதானவர்கள் இருக்கிறார்கள். அவர்களால் நிச்சமாக தரையைத் துடைப்பது மற்றும் பெருக்குவது என்பது மிகவும் கஷ்டமான வேலையாகவே இருக்கும். இதுபோன்ற பிரச்சனைகளைத் தீர்க்க வந்திருப்பவையே போரோட் வேக்யூம் கிளீனர்கள் ஆகும்.

ரோபோட் வேக்யூம் கிளீனர்களில் நவீன தொழில் நுட்பங்கள் மிகச்சிறப்பாகப் பயன்படுத்தப்பட்டுள்ளன. நம் வீட்டில் செல்லப் பிராணிகளை வளர்க்கும் பொழுது அவற்றின் உரோமம் தரையில் அதிகமாக உதிர வாய்ப்புள்ளது. அவற்றை மிகச்சிறப்பாக சுத்தம் செய்கின்றன. இவ்வகை ரோபோ வேக்யூம் கிளீனர்கள். மேலும், இவற்றை இயக்கி விட்டு நம்முடைய வேலைகளை நாம் செய்து கொண்டிருக்கலாம். இந்த ரோபோட் வேக்யூம் கிளீனர்களில் அருகில் நாம் நின்று கொண்டிருக்க வேண்டிய அவசியமில்லை.

இந்த அறையை இரண்டு முறை சுத்தம் செய்ய வேண்டும், அந்த அறையை மட்டும் சுத்தம் செய்தால் போதும் போன்ற கட்டளைகளை அவற்றில் பதிவேற்றம் செய்து விட்டால் அவற்றை நம் கைப்பேசியில் தொடர்புபடுத்தி வேலைகளைச் செய்ய வைக்கலாம். நம் வீட்டில் வளர்க்கும் செல்லப்பிராணிபோல இங்கும், அங்கும் சுற்றி வீட்டைச் சுத்தம் செய்யும் அழகே அழகு. அதே போல் வீட்டைப் பெருக்குவதோடு துடைத்தெடுக்கும் வசதியும் இவ்வகை வேக்யூம் கிளீனர்களில் இருக்கின்றன. இவற்றை மின்சாரத்தில் சார்ஜ் செய்து வைத்துக் கொண்டால் மின்சாரம் இல்லாத நேரத்திலும் தன் வேலையை சிறப்பாக செய்யக் கூடியவை இவை.

தரையைச் சுத்தம் செய்யும்பொழுது தரை விரிப்புகள் வந்துவிட்டால் அவற்றை சுத்தம் செய்வதற்கு தகுந்தாற்போல் தன்னுடைய பயன்முறையை தானாகவே மாற்றிக் கொள்ளக்கூடிய சிறப்பம்சத்தைக் கொண்டுள்ளது. அதேபோல் இவ்வகை ரோபோட் வேக்யூம் கிளீனர்கள் இயங்கிக் கொண்டிருக்கும் நேரத்தில் பேட்டரி டௌனாகி விட்டால் தானாகவே ரீசார்ஜ் செய்து கொள்ளும் வசதியுடனும் இருப்பது போல் வடிவமைக்கப்பட்டுள்ளன. வீட்டிலிருந்து வெளியில் செல்லும்பொழுது இவற்றை இயக்கி விட்டு சென்று விட்டால். அது தன் வேலையை தானாகவே செய்து கொள்ளும் சிறப்புடையவை.
Tags:    

Similar News