லைஃப்ஸ்டைல்
குழந்தைகளுக்கு சூட்டலாம்.. புதிய பெயர்..

குழந்தைகளுக்கு சூட்டலாம்.. புதிய பெயர்..

Published On 2021-04-23 04:27 GMT   |   Update On 2021-04-23 04:27 GMT
குழந்தைக்கு பெயர் சூட்ட பெற்றோர் புதுவிதமாக சிந்திக்கிறார்கள். அதெல்லாம் ஒருபுறம் இருந்தாலும் பெயர் சூட்டும்போது கவனிக்க வேண்டிய விஷயங்கள் சில உண்டு.
குழந்தைக்கு பெயர் சூட்ட பெற்றோர் புதுவிதமாக சிந்திக்கிறார்கள். தங்கள் குழந்தையின் பெயர் மற்ற குழந்தைகளின் பெயர்களை விட தனித்துவமாகவும், வித்தியாசமாகவும், ரசிக்கும்படியும் இருக்க வேண்டும் என்று எதிர்பார்ப்பார்கள். குடும்ப உறுப்பினர்களின் பெயர்களில் சில எழுத்துகளை தாங்கி இருக்க வேண்டும் என்றும் நிறைய பேர் விரும்புவார்கள். அதெல்லாம் ஒருபுறம் இருந்தாலும் பெயர் சூட்டும்போது கவனிக்க வேண்டிய விஷயங்கள் சில உண்டு.

* நீண்ட எழுத்துகளுடன் இருக்கும் பழமை யான பெயர்களை கூடுமானவரை தவிர்த்து விடுவது நல்லது. அதே நேரத்தில் கலாசாரத் துடன் ஒத்திருக்கும்படி பெயர் வைக்கலாம். அது எதிர்காலத்தில் குழந்தைகள் தங்கள் பெயரை உச்சரிப்பதற்கு தயங்காத நிலையை ஏற்படுத்தும். இணையதளங்களில் கொட்டிக்கிடக்கும் பெயர்களில் இருந்து பொருத்தமான பெயரை தேர்ந்தெடுத்து சூட்டலாம்.

* குழந்தையின் பெயர் உச்சரிப்பதற்கு இனிமையாகவும், குறைந்த எழுத்துக்கள் கொண்டதாகவும் இருக்க வேண்டும். நான்கு, ஐந்து எழுத்துக்களுக்கு மேல் இருக்கக்கூடாது. ஏனெனில் பெரும்பாலானவர்கள் முழு நீள பெயரை கூறி அழைப்பதில்லை.

* குழந்தைக்கு வைக்கும் பெயர் மற்றவர்கள் கேலி, கிண்டல் செய்யும்படி அமைந்துவிடக்கூடாது. சட்டென்று மனதில் பதியும்படியும் இருக்க வேண்டும். உச்சரிக்க சிரமப்படும் அளவுக்கும் இருக்கக்கூடாது.

* தங்கள் குழந்தையின் பெயர் தனியாக தெரிய வேண்டும் என்பதற்காக பிரபலமாக இருக்கும் பிராண்ட்களின் பெயரையோ, விசித்திரமான இடங்களின் பெயர்களை தாங்கி இருக்கும் பெயர்களையோ வைக்கக்கூடாது. அது மற்றவர்களின் விமர்சனத்திற்கு வழிவகுத்துவிடக்கூடும்.

* மூதாதையர்களின் பெயர்களையோ, பழமையான பெயர்களையோ வைப்பதற்கு முன்பு சிந்தித்து முடிவெடுக்க வேண்டும். பழைய பெயர்களாகவே இருந்தாலும் எல்லா காலகட்டத்திற்கும் ஏற்றுக்கொள்ளும் விதத்தில் அமைந்திருக்க வேண்டும்.

* அர்த்தமுள்ள பெயராக இருக்க வேண்டும் என்ற எண்ணத்தில் நிறைய பேர் வாய்க்குள் நுழையாத பெயர்களை வைத்துவிடுகிறார் கள். அதனை மற்றவர்கள் கேலி செய்ய நேரிடும். அர்த்தம் பொதிந்த பெயர்கள் கூட சில சமயங்களில் கேலிக்கு உள்ளாகலாம். அதனால் கவனமாக சிந்தித்து பொருத்தமான பெயரை சூட்டுங்கள்.

* சிலர் வைக்கும் பெயர் அது ஆண் குழந்தையா? இல்லை பெண் குழந்தையா? என்ற குழப்பத்தை ஏற்படுத்திவிடும். பாலினத்தை சரியாக குறிக்கும் விதத்தில் பெயரும் அமைந்திருக்க வேண்டும்.

* நல்ல பெயராக இருக்கிறது என்பதற்காக உறவினர்கள் ஏற்கனவே பிள்ளைகளுக்கு வைத்திருக்கும் பெயரை திரும்பவும் சூட்டக்கூடாது. அது குழந்தைகளுக்கே குழப் பத்தை ஏற்படுத்திவிடும்.

* ஆங்கில எழுத்துக்களின் தொடக்க எழுத்தில் பெயர் ஆரம்பிப்பது நல்லது. கடைசியில் உள்ள எழுத்துக்களில் பெயர் வைத்தால் வகுப்பில் தொடங்கி பல்வேறு இடங்களில் பெயர் கடைசியாக இடம்பெற நேரிடும். மற்றவர்கள் பெயர்கள் வாசித்து முடியும்வரை காத்திருக்க வேண்டியிருக்கும்.
Tags:    

Similar News