குழந்தைகளை வெளியில் சென்று விளையாட விடலாமா?

குழந்தைகள் வெளியில் சென்று விளையாடுவதை பெரும்பாலான பெற்றோர் அனுமதிப்பதில்லை. குழந்தைகள் வெளியில் சென்று விளையாடுவதை தடுக்காமல், அவர்களை வெளியே சென்று விளையாட அனுமதிக்க வேண்டும்.

குழந்தைகள் வெளியில் சென்று விளையாடுவதால் ஆபத்து ஏற்படும் என்று எண்ணினால், நீங்களும் உடன் சேர்ந்து சென்று அவர்களைக் கொஞ்சம் கண்காணியுங்கள். உங்களால் அவர்களுடன் சேர்ந்து நேரம் செலவிட முடியவில்லை என்பதற்காக அவர்களை வீட்டுக்குள்ளேயே அடைத்து வைத்திருப்பது மிகத்தவறான விஷயம். 

குழந்தைகள் இயற்கைச்சூழலில் சென்று விளையாடுவதால் அவர்களின் உடல் நலம் மேம்படும். அவர்கள் மற்றவர்களுடன் சேர்ந்து ஓடி விளையாடுவதால் அவர்களுடைய தசைகள் மற்றும் எலும்புகள் உறுதியாகின்றன.

வீட்டில் தனியே உடற்பயிற்சி செய்ய வேண்டுமென்ற தேவையில்லை. அவர்கள் ஓடியாடி விளையாடுவதே சிறந்த உடற்பயிற்சியாகவும் அமையும்.

உடலில் உள்ள தேவையற்ற கொழுப்புகள் மற்றும் கலோரிகள் வியர்வையாக வெளியேறும். அவர்கள் வெயிலில் விளையாடு போது அவர்கள் உடலுக்குத் தேவையான வைட்டமின் டி கிடைக்கும். இதனால் அவர்கள் உடலளவில் ஆரோக்கியமாகவும் சுறுசுறுப்பாகவும் இயங்க முடியும்.

குழந்தைகள் வெளியில் விளையாடுவதால் அவர்களது கற்கும் திறன் அதிகரிக்கும். விட்டுக்கொடுத்தல், மற்றவரின் நட்புடன் பழகுதல், திட்டமிட்டு செயல்படுதல் போன்ற நற்குணங்களைக் கற்றுக்கொள்ள முடியும். இதனால் புதிது புதிதாக கற்று கொள்ள ஆர்வம் காட்டுவார்கள். பள்ளியிலும்கூட அதே கவனத்துடன் அவர்களால் செயல் பட முடியும்.

மற்ற நண்பர்களுடன் இணைந்து விளையாடும்போது விடாமுயற்சியும் தன்னம்பிக்கையும் அதிகரிக்கும்.

சின்ன சின்ன விஷயத்துக்கெல்லாம் பயப்படும் குழந்தைகளுக்கு மன உறுதியைத் தரும். அச்சத்தைப் போக்கி தைரியத்தை உண்டாக்கும்.

 

படைப்பாற்றல் அதிகரிக்கும்.

கூடி வாழ்தல், மற்றவர்களுடன் ஒத்துப்போதல் போன்ற சமூக வாழ்வியலைக் கற்றுக்கொள்ள முடியும்.

இதெல்லாம் சரி தான். இருந்தாலும் அப்படி விளையாட வெளியில் அனுப்பும்போது நீங்களும் அவர்களுக்காக கொஞ்சம் நேரம் ஒதுக்கி கண்காணித்துக் கொள்ளுங்கள்.