புதிய பல்சர் N160 மாடலை அறிமுகம் செய்த பஜாஜ்

பஜாஜ் ஆட்டோ நிறுவனம் புதிய பல்சர் N160 மோட்டார்சைக்கிள் மாடலை இந்திய சந்தையில் அறிமுகம் செய்தது. இந்த மாடல் முற்றிலும் புதிய பல்சர் 250 பிளாட்பார்மில் உருவாகி இருக்கிறது. புதிய பல்சர் மாடலின் சிங்கில் சேனல் ஏ.பி.எஸ். வெர்ஷன் விலை ரூ. 1 லட்சத்து 23 ஆயிரம் என நிர்ணயம் செய்யப்பட்டு உள்ளது. இதன் டூயல் சேனல் வேரியண்ட் விலை ரூ. 1 லட்சத்து 28 ஆயிரம் ஆகும்.

தோற்றத்தில் புதிய பல்சர் N160 மாடல் பல்சர் N250 போன்றே காட்சி அளிக்கிறது. இதில் ப்ரோஜெக்டர் லென்ஸ் ஹெட்லேம்ப், எல்.இ.டி. டி.ஆர்.எல்.கள், பக்கவாட்டில் பல்சர் N250 மாடலில் உள்ளதை போன்ற பேனல்கள் வழங்கப்பட்டு உள்ளன. இந்த மாடலில் மிகப் பெரும் மாற்றமாக சிறிய என்ஜின் வழங்கப்பட்டு இருக்கிறது.

பஜாஜ் பல்சர் N160 மாடலில் 164.82 சிசி, சிங்கில் சிலிண்டர், ஏர் கூல்டு என்ஜின் வழங்கப்பட்டு உள்ளது. இந்த என்ஜின் 15.7 ஹெச்.பி. பவர், 14.65 நியூட்டன் மீட்டர் டார்க் இழுவிசையை வெளிப்படுத்துகிறது. இத்துடன் முன்புறம் டெலிஸ்கோபிக் போர்க், பின்புறம் மோனோஷாக் யூனிட் உள்ளது. இதில் செமி டிஜிட்டல் இன்ஸ்ட்ரூமெண்ட் கிளஸ்டர் வழங்கப்பட்டு இருக்கிறது.

புதிய பஜாஜ் பல்சர் N160 மாடல் சிங்கில் சேனல் ஏ.பி.எஸ். வேரியண்ட் ரேசிங் ரெட், டெக்னோ கிரே மற்றும் கரீபியன் புளூ நிறங்களில் கிடைக்கிறது. இதன் டூயல் சேனல் ஏ.பி.எஸ். வேரியண்ட் புரூக்லின் பிளாக் நிறத்தில் மட்டும் கிடைக்கிறது.