சாம்சங் நிறுவனம் அதன் புதிய கேலக்ஸி F சீரிஸ் ஸ்மார்ட்போனை இந்திய சந்தையில் வெளியிட தயாராகி உள்ளது. சாம்சங் கேலக்ஸி F13 என பெயரிடப்பட்டுள்ள இந்த ஸ்மார்ட்போனின் வெளியீட்டு விவரம், அதில் உள்ள சிறப்பம்சங்கள் மற்றும் கலர் ஆகியவற்றை சாம்சங் நிறுவனம் இன்று அதிகாரப்பூர்வமாக அறிவித்துள்ளது.
அதன்படி சாம்சங் கேலக்ஸி F13 ஸ்மார்ட்போன் வருகிற ஜூன் 22ந் தேதி மதியம் 12 மணி முதல் இந்திய சந்தையில் விற்பனைக்கு கிடைக்கும் என தெரிவிக்கப்பட்டு உள்ளது. இதுதவிர பிளிப்கார்ட் மற்றும் அந்நிறுவனத்தின் அதிகாரப்பூர்வ வெப்சைட் வாயிலாக ஆன்லைன் மூலமும் அன்றைய தினம் விற்பனை தொடங்கப்பட உள்ளது.
டிசைனைப் பொருத்தவரை சாம்சங் கேலக்ஸி M13 மாடலைப் போன்றே தற்போது வெளியாக உள்ள F13 மாடலும் உள்ளது. இந்த ஸ்மார்ட்போன் பிங்க், புளூ, கிரீன்ஆகிய மூன்று நிறங்களில் விற்பனைக்கு வருகிறது. சாம்சங் கேலக்ஸி F13 முழு ஹெச்டி + எல்சிடி பேனலுடன் கூடிய 6.6-இன்ச் டிஸ்ப்ளேவை கொண்டிருக்கும் என்று எதிர்பார்க்கப்படுகிறது.
மேலும் இது 15W பாஸ்ட் சார்ஜிங்கை ஆதரிக்கும் 6,000mAh பேட்டரி பேக் அப் உடன் வருகிறது. இது 8ஜிபி ரேமைக் கொண்டுள்ளது. கேமராவை பொருத்தவரை பின்புறத்தில் டிரிபிள் கேமரா அமைப்பும், முன்புறத்தில் வாட்டர் டிராப் நாட்ச் செல்ஃபி கேமராவும் உள்ளது. சாம்சங் எக்சினாஸ் 850 புராசசருடன் வரும் இந்த ஸ்மார்ட்போன் ஆண்ட்ராய்டு 12 இயங்குதளத்தை கொண்டுள்ளது. இந்த ஸ்மார்ட்போனின் விலை ரூ.15 ஆயிரமாக நிர்ணயம் செய்யப்படலாம் என எதிர்பார்க்கப்படுகிறது.
