திருவண்ணாமலை:
இந்து சமய அறநிலையத்துறைக்கு உட்பட்ட கோவில்களை அந்தந்த மாவட்ட முதன்மை நீதிபதிகள் ஆய்வு செய்து அறிக்கை சமர்ப்பிக்க சென்னை ஐகோர்ட்டின் மதுரை கிளை உத்தரவிட்டிருந்தது. அதன்படி திருவண்ணாமலை அருணாசலேஸ்வரர் கோவிலில் நேற்று மாவட்ட முதன்மை நீதிபதி மகிழேந்தி, சார்பு நீதிபதி ராஜ்மோகனம் ஆகியோர் ஆய்வு செய்தனர்.
கோவில் ராஜகோபுரத்தின் முன்பு கடைகள் உள்ள இடத்தை பார்வையிட்டபோது அந்த கடைகள் ஆக்கிரமித்து கட்டப்பட்டது தெரியவந்தது. மேலும் பக்தர்களின் பொருட்கள் வைப்பு அறையை பார்வையிட்டபோது அங்கு 3 மோட்டார்சைக்கிள்கள் நிறுத்தி வைக்கப்பட்டு இருந்தன. அதில் ஒரு மோட்டார்சைக்கிளில் பதிவெண் இல்லாமல் இருந்தது. இது குறித்து போலீசார் வழக்குப்பதிவு செய்ய நீதிபதி மகிழேந்தி உத்தரவிட்டார்.
பின்னர் ராஜகோபுரத்தின் வழியாக கோவிலுக்குள் நீதிபதிகள் வந்தனர். கோவில் முன்பகுதியில் ஒரு நாய் படுத்து இருந்தது. மேலும் அங்கு பலர் படுத்து கிடந்ததை அவர்கள் பார்த்தனர்.
அதே பகுதியில் அன்னதானத்திற்காக பக்தர்கள் வரிசையில் நின்று கொண்டிருந்தனர். அவர்களிடம் அன்னதான திட்டத்தில் ஏதேனும் குறைகள் உள்ளதா என்று கேட்டறிந்த நீதிபதிகள், அன்னதானம் நடைபெறும் இடத்துக்கு நேரில் சென்று பார்வையிட்டனர்.
அங்கு சாப்பிட்டு கொண்டிருந்த முதியவர்களிடம் போதிய அளவு உணவு வழங்கப்படுகிறதா, சாப்பாடு தரமாக உள்ளதா, ஏதேனும் குறைகள் உள்ளதா என்று நீதிபதிகள் கேட்டனர். பின்னர் சமையல் செய்யும் அறையை பார்வையிட்டனர்.
அதைத் தொடர்ந்து கோவில் இணை ஆணையர் அலுவலகத்துக்கு நீதிபதிகள் சென்றனர். அங்கு இணை ஆணையர் ஞானசேகரிடம் கோவில் கண்காணிப்பு கேமரா பதிவுகளை டி.வி.யில் காண்பிக்க கூறினர். அப்போது “கோவில் ராஜகோபுரத்தின் முன்பு நாய் படுத்து இருப்பதையும், சிலர் படுத்து தூங்குவதையும் காண்பித்து மக்கள் நடமாடும் பகுதியில் இப்படி உள்ளது. இதை நீங்கள் கவனிக்க மாட்டீர்களா?” என்று கேள்வி எழுப்பினர்.
பின்னர் ஊழியர்களின் வருகை பதிவேட்டை நீதிபதிகள் ஆய்வு செய்தனர். வருகைப் பதிவேட்டில் உள்ள நபர்களின் பெயர்களை கூறி நீதிபதிகள் அழைத்தனர். அப்போது வந்தவர்கள் அடையாள அட்டையின்றியும், சீருடை அணியாமலும் இருந்து உள்ளனர். இது குறித்து கோவில் இணை ஆணையரிடம் நீதிபதிகள் விசாரித்தனர்.
பின்னர் அன்னதான திட்டத்திற்கான பதிவேடுகளை நீதிபதிகள் ஆய்வு செய்தனர். அந்த பதிவேடுகள் முறையாக பராமரிக்கப்படாததை பார்த்த நீதிபதிகள், கோவில் இணை ஆணையரிடம் அது குறித்து சரமாரியாக கேள்வி எழுப்பினர். கோவிலில் உள்ள கோசாலை, பிரசாதம் வழங்கும் இடம், அம்மணி அம்மன் கோபுரத்தின் வெளிப்புறம், கோவிலில் உள்ள கருணை இல்லம் ஆகியவற்றை நேரில் சென்று பார்வையிட்டனர். அப்போது பக்தர் ஒருவர் “அன்னதான திட்டத்தில் சாப்பிடுபவர்களுக்கு சரியாக சாப்பாடு வழங்குவதில்லை” என்று புகார் கூறினார். அதனை நீதிபதிகள் பதிவு செய்து கொண்டனர். இதையடுத்து கோவிலில் பக்தர்கள் அனைவரும் சரிசமமாக நடத்தப்படுகிறார்களா? என்றும் நீதிபதிகள் ஆய்வு செய்தனர்.
இது குறித்து முதன்மை நீதிபதி மகிழேந்தி கூறுகையில், “ஐகோர்ட்டு உத்தரவின்பேரில் அருணாசலேஸ்வரர் கோவிலில் ஆய்வு செய்யப்பட்டு உள்ளது. கோவிலில் சுகாதாரம் சரி செய்யப்படவில்லை. பெண்கள், பெண் குழந்தைகள், முதியவர்களுக்கு தேவையான அடிப்படை வசதிகள் ஏதும் செய்யப்படவில்லை. மேலும் கோவில் அன்னதான திட்டத்திற்கான பதிவேடுகள், வருகைப் பதிவேடுகள் போன்ற ஆவணங்கள் சரியாக பராமரிக்கப்படவில்லை. இது குறித்து உயர்நீதிமன்றத்திற்கு வருகிற 30-ந் தேதிக்குள் அறிக்கை சமர்ப்பிக்கப்பட உள்ளது” என்றார்.
