நீங்கள் தேடியது "uchakattam"

அனூப் சிங் மற்றும் தன்ஷிகா இருவரும் காதலர்கள். புத்தாண்டு கொண்டாட்டத்திற்காக இருவரும் தனியார் விடுதிக்கு செல்கின்றனர். அங்கு, நடக்கும் கொலை ஒன்றை பார்த்து ஏதேச்சையாக மொபைல் போனில் வீடியோவாகவும் படம் பிடிக்கிறார் தன்ஷிகா. இதைக்கண்டு அதிர்ந்த கொலைக் கும்பல், தன்ஷிகாவை கொலை செய்ய முயற்சி செய்கிறார்கள். 

இதிலிருந்து தன்ஷிகாவை அனூப் சிங் எப்படி காப்பாற்றினார்? கொலை செய்யப்பட்டது யார், கொலை செய்தது யார்? என்பதே படத்தின் மீதிக்கதை.

சிங்கம் 3 படத்தில் வில்லனாக நடித்திருந்த அனூப் சிங், இப்படத்தில் ஹீரோவாக களம் இறங்கியிருக்கிறார். நல்ல உடற்கட்டோடு, ஆக்‌ஷன் காட்சிகளில் சிறப்பாக நடித்திருக்கிறார். சாய் தன்ஷிகா, ரவுடி கும்பலிடம் சிக்கி தவிக்கும் காட்சிகளிலும், கார் டிக்கியில் சிக்கிக் கொண்டு பரிதவிக்கும் காட்சிகளிலும் அபாரம். இரண்டாவது நாயகியாக நடித்திருக்கும் தன்யா ஹோப் தனது அழகான நடிப்பால் ரசிகர்களை கவர்ந்திருக்கிறார். வேதாளம் படத்தின் வில்லனாக நடித்த கபீர் சிங், இப்படத்திலும் வில்லனாக மிரட்டியிருக்கிறார். 

சஞ்சய் சௌத்ரியின் பின்னணி இசை ஓகே ரகம் தான். விஷ்ணுவர்தனின் ஒளிப்பதிவு கர்நாடகா மாநில காடுகளை அங்குலம் விடாமல் அலசி இருக்கிறது. படத்திற்கு பலமாகவும் அமைந்திருக்கிறது.

விறுவிறுப்பாக திரைக்கதையுடன் படத்தை இயக்கி இருக்கிறார் சுனில்குமார் தேசாய். விறுவிறுப்பு ஒன்றே குறிக்கோள் என கடிவாளம் போட்டது போன்று நேர்கொண்ட பார்வையுடன் படத்தை மிக வேகமாக நகர்த்துகிறார். கதாநாயகி வில்லன் கும்பலிடம் மீண்டும் மீண்டும் பிடிபட்டு தப்புவது போன்ற காட்சிகளை சற்று மாற்றி அமைத்திருக்கலாம். லாஜிக் மீறல்கள் இல்லாமல் இருந்தால் படத்தை கூடுதலாக ரசித்திருக்கலாம்.

மொத்தத்தில் ‘உச்சக்கட்டம்’ குறைவான உச்சம்.

பரதேசி, கபாலி படங்களின் மூலம் நடிக்க தெரிந்த நடிகை என்று பெயர் எடுத்தவர் தன்ஷிகா. அவர் நடிப்பில் தமிழ், தெலுங்கு, கன்னடம் மற்றும் மலையாளம் ஆகிய நான்கு மொழிகளில் உருவாகி இருக்கும் ‘உச்சகட்டம்’ படம் வரும் 22-ந்தேதி வெளியாக இருக்கிறது.

இந்தப் படத்தை கன்னட இயக்குனர் சுதீல் குமார் தேசாய் இயக்கி உள்ளார். இவர் திரில்லர் படங்கள் எடுப்பதில் புகழ் பெற்றவர். இந்தப் படத்தில் தன்ஷிகாவுடன் இணைந்து அனூப் சிங், கபீர் சிங், ஷ்ரத்தா தாஸ், தான்யா ஹோப், ஆடுகளம் கிஷோர், வம்சி கிருஷ்ணா உள்ளிட்ட பலர் முக்கிய வேடத்தில் நடிக்கின்றனர்.

இப்படத்தை டி கிரியஷேன்ஸ் சார்பில் ஆர்.தேவராஜ் தயாரித்துள்ளார். அனூப் சிங் சிங்கம் 3 படத்திலும் கபீர் சிங் வேதாளம் படத்திலும் வில்லனாக நடித்துள்ளார்கள். தான்யா ஹோப் சமீபத்தில் வெளியான தடம் படத்தில் கதாநாயகியாக நடித்து இருந்தார்.

திரில்லர் படமாக உருவாகியுள்ள உச்சகட்டம் படத்தின் பர்ஸ்ட் லுக் போஸ்டர் கடந்த ஆண்டு இறுதியில் வெளியானது. ஒரு பெண் கால்களில் ரத்த காயங்களுடன் நடந்து வரும் காட்சியை பார்க்கும் சாய் தன்ஷிகா பயத்தில் மிரண்டு போவது போல் வெளியாகி இருந்தது. அடுத்து வெளியான டிரெய்லரில் சர்ச்சையான காட்சிகள் சில இடம்பெற்று இருந்தன. எனவே படத்துக்கு எதிர்பார்ப்பு ஏற்பட்டுள்ளது.