நீங்கள் தேடியது "சின்ன வெங்காய விதைகள்"

திருப்பூர்:

சின்ன வெங்காய விதைகளை விதை உரிமம் பெற்றவா்களிடம் மட்டுமே வாங்க வேண்டும். போலிகளிடம் வாங்கி ஏமாற வேண்டாம் என விதை ஆய்வு துணை இயக்குநா் அறிவுறுத்தியுள்ளாா். இது குறித்து மாவட்ட விதை ஆய்வு துணை இயக்குநா் ஜெயராமன் தெரிவித்ததாவது:-

தாராபுரம் தாலுகா, குண்டடம் வட்டாரத்தில் நடப்பு காா்த்திகை பட்டத்தில் அதிக அளவில் சின்ன வெங்காயம் சாகுபடி செய்யப்படுகிறது. விவசாயிகள் விதைகளை வாங்கி நாற்று விட்டோ அல்லது நேரடியாக சின்ன வெங்காய நாற்றுக்களை வாங்கியோ நடவு செய்கின்றனா். இவ்வாறு விதைகளையோ, நாற்றுக்களையோ வாங்கும்போது, விதை மற்றும் நாற்று விற்பனை செய்ய உரிமம் பெற்ற விற்பனையாளா்களிடமிருந்து தரமான விதைகளை வாங்கி சாகுபடி செய்யவும். போலியான விதைகளையோ அல்லது காலாவதியான விதைகளையோ வாங்கி ஏமாற வேண்டாம். விதைகளை வாங்கும்போது விவர அட்டையுடன் கூடிய பாக்கெட்டுகளில் உள்ள விதைகளை மட்டுமே வாங்க வேண்டும்.

ஏனெனில், அதில் விதை பரிசோதனை நிலையத்தில் விதை மாதிரிகளை கொடுத்து முளைப்புத்திறன் உறுதி செய்யப்பட்ட விதைகளை மட்டுமே காலாவதி தேதியுடன் பாக்கெட்டுகளில் குறிப்பிட்டு விற்பனை செய்ய முடியும். மேலும் விதைகளை வாங்கும்போது அதற்கான ரசீதில் வாங்குபவா் பெயா், தேதி, விலை, குவியல் எண் உள்ளிட்ட விவரங்களை குறிப்பிட்டு விற்பனையாளா் கையெழுத்துடன் வாங்க வேண்டும். எனவே, போலியான விதைகளை வாங்கி ஏமாறாமல், தரமான உரிமம் பெற்ற விதைகளை மட்டுமே வாங்கி பயனடைய வேண்டும் என்றாா்.