கொல்லங்கோடு கோவிலில் இன்று குழந்தைகளுக்கு பக்தி பரவசத்துடன் நடந்த தூக்க நேர்ச்சை

கன்னியாகுமரி மாவட்டத்தில் உள்ள பிரசித்தி பெற்ற கொல்லங் கோடு பத்ரகாளி அம்மன் கோயிலில் இன்று தூக்க நேர்ச்சை திருவிழா பக்தி பரவசத்துடன் நடைபெற்று வருகிறது.

கொல்லங்கோடு பத்ரகாளி அம்மனுக்கு தினசரி பூஜை நடைபெற ஒரு கோயிலும், தூக்க நேர்ச்சை நிறைவேற்ற மற்றொரு கோயிலும் உள்ளது. இக்கோயிலில் ஆண்டுதோறும் பங்குனி மாதம் பரணி நட்சத்திர தினத்தன்று தூக்க நேர்ச்சை நடைபெறுகிறது.

இந்த ஆண்டுக்கான தூக்கத் திருவிழா மார்ச் 26-ம் தேதி கோயில் தந்திரி பிரம்மஸ்ரீ கொட்டாரக்கரை நீலமனை ஈஸ்வரன் போற்றி தலைமையில் கொடியேற்றத்துடன் துவங்கியது.

இதில் 1,098 குழந்தைகள் தூக்க நேர்ச்சைக்கு பெயர் பதிவு செய்திருந்தனர். இந்த நிலையில் வரலாற்றுச் சிறப்பு மிக்க தூக்க நேர்ச்சை இன்று காலையில் துவங்கியது. இதையொட்டி இன்று அதிகாலை 4 மணிக்கு கோயில் நடை திறக்கப்பட்டு சிறப்பு பூஜைகள் நடைபெற்றன.

தொடர்ந்து அதிகாலை 4.30 மணிக்கு தூக்கக்காரர்களின் முட்டு குத்தி நமஸ்காரம் நடந்தது. காலை 5 மணிக்கு அம்மன் பச்சைப் பந்தலில் எழுந்தருளினார்.

இதைத் தொடர்ந்து காலை 6.30 மணிக்கு வரலாற்றுச் சிறப்புமிக்க தூக்க நேர்ச்சை துவங்கியது. தொடர்ந்து நடந்த தூக்க நேர்ச்சையில், ஒரே நேரத்தில் 4 பேர் தங்கள் கைகளில் தலா ஒரு குழந்தையை சுமந்தபடி கோயிலை ஒருமுறை சுற்றி வந்து, தூக்க நேர்ச்சை நிறைவேற்றப்பட்து.

இதன்படி தூக்க வில் 275 முறை கோயிலை வலம் வந்து நேர்ச்சை நிறைவேற்றப்படுகிறது. தூக்க நேர்ச்சை நிறைவுபெற்றபின் வில்லின் மூட்டில் குருதி தர்ப்பணத்துடன் விழா நிறைவடைகிறது.

திருவிழா ஏற்பாடுகளை கோயில் தலைவர் ராமச்சந்திரன்நாயர், செயலர் மோகன்குமார், பொருளாளர் ஸ்ரீனிவாசன்தம்பி, துணைத் தலைவர் ஆர். சதிகுமாரன்நாயர், இணைச் செயலாளர் பிஜூகுமார், கமிட்டி உறுப்பினர்கள் சஜிகுமார், புவனேந்திரன்நாயர், ஸ்ரீகண்டன்தம்பி, ஸ்ரீகுமாரன்நாயர், பிஜூ, ஏ. சதிகுமாரன்நாயர் ஆகியோர் செய்திருந்தனர்.