காரைக்குடி:
மதுரை மாவட்டம், மேலூர் அருகே உள்ள அரிட்டாபட்டியைச் சேர்ந்தவர் யோகேஸ்வரன் (வயது 29). இவர் கடந்த 2013-ம் ஆண்டு கோயம்புத்தூர் ஆயுதப்படையில் போலீஸ்காரராக பணியில் சேர்ந்தார்.
அதன் பின்னர் கடந்த 2018-ம் ஆண்டு சிவகங்கை மாவட்ட ஆயுதப்படை முகாமிற்கு மாற்றப்பட்டார். அங்கு பணியில் இருந்த யோகேஸ்வரன், சிவகங்கை மாவட்டம் திருப்பத்தூரில் உள்ள இந்தியன் வங்கியின் பாதுகாப்பு பணிக்கு அனுப்பப்பட்டார்.
இன்று வங்கியில் உள்ள பாதுகாவலர் ஓய்வறையில் யோகேஸ்வரன் இருந்தார். காலை அந்த அறையில் இருந்து துப்பாக்கி வெடிக்கும் சத்தம் கேட்டது. இதனால் அங்கு பரபரப்பு ஏற்பட்டது.
பாதுகாப்பு பணியில் இருந்த மற்ற காவலர்களும், வங்கி பணியாளர்களும் ஓய்வறைக்கு ஓடினர். அங்கு யோகேஸ்வரன் ரத்த வெள்ளத்தில் பிணமாக கிடந்தார். அவர் பாதுகாப்புக்கு வைத்திருந்த துப்பாக்கியால் தன்னைத்தானே சுட்டு தற்கொலை செய்திருப்பதாக தெரிகிறது.
தகவல் கிடைத்ததும் உயர் போலீஸ் அதிகாரிகள் சம்பவ இடம் விரைந்தனர். அவர்கள் யோகேஸ்வரன் தற்கொலைக்கான காரணம் குறித்து விசாரணை நடத்தி வருகின்றனர்.
பணிச்சுமையால் ஏற்பட்ட மன அழுத்தம் காரணமாக, ஓய்வறையில் கதவை பூட்டிக் கொண்டு யோகேஸ்வரன் தற்கொலை செய்திருக்கலாம் என கூறப்படுகிறது.
