விழுப்புரம்:
கடலூர் செம்மண்டலம் தவுலத் நகரை சேர்ந்தவர் பாபு (வயது55). இவர் விழுப்புரம் மாவட்டம் கள்ளக்குறிச்சியில் மோட்டார் வாகன ஆய்வாளராக பணியாற்றி வந்தார்.
கடந்த சில நாட்களுக்கு முன்பு கள்ளக்குறிச்சி அருகே உள்ள கூத்தக்குடியை சேர்ந்த ஓட்டுநர் பயிற்சி பள்ளி உரிமையாளர் முத்துக் குமாரின் சுற்றுலா வேனுக்கு தகுதி சான்றிதழ் வழங்க மோட்டார் வாகன ஆய்வாளர் பாபு ரூ.25 ஆயிரம் லஞ்சம் வாங்கிய போது லஞ்ச ஒழிப்பு போலீசார் அவரை கைது செய்தனர்.
அவருக்கு உடந்தையாக இருந்த அவரது உதவியாளர் செந்தில்குமாரும் கைது செய்யப்பட்டார்.
இதையடுத்து மோட்டார் வாகன ஆய்வாளர் பாபு வசித்து வந்த கடலூர் செம்மண்டலம் தவுலத் நகரில் உள்ள வீட்டில் லஞ்ச ஒழிப்பு போலீசார் அதிரடி சோதனை நடத்தினர்.
அப்போது, அவரது வீட்டில் இருந்து ரூ.30 லட்சம் ரொக்கம், 200 பவுன் தங்க நகைகள், 15 கிலோ வெள்ளி பொருட்கள் ஆகியவை பறிமுதல் செய்யப்பட்டன. மேலும் பல்வேறு சொத்து ஆவணங்களும் கைப்பற்றப்பட்டன.
பாபுவின் 21 வங்கி கணக்குகளையும், 6 லாக்கர்களையும் வங்கி அதிகாரிகள் மூலம் லஞ்ச ஒழிப்பு போலீசார் முடக்கினர். இதேபோல் அவரது உதவியாளர் செந்தில் குமாரின் வங்கி கணக்குகளும் முடக்கப்பட்டன.
இந்த நிலையில் வங்கிகளில் பாபு வைத்துள்ள லாக்கர்களை திறந்து ஆய்வு செய்ய லஞ்ச ஒழிப்பு போலீசார் முடிவு செய்தனர். இதையொட்டி விழுப்புரம் லஞ்ச ஒழிப்பு துணை போலீஸ் சூப்பிரண்டு தேவநாதன் மற்றும் போலீசார் கடந்த 19-ந் தேதி திடீரென்று கடலூர் மஞ்சக்குப்பத்தில் உள்ள ஒரு தேசிய மயமாக்கப்பட்ட வங்கியில் இருந்த லாக்கரை திறந்தனர்.
அதில் தங்கம் மற்றும் வெள்ளி நகைகள் இருந்தன. அதன் பின்பு அவர்கள் கட லூர் பாரதி சாலையில் உள்ள மற்றொரு தேசிய மயமாக்கப்பட்ட வங்கிக்கு சென்று அங்கு பாபு பெயரில் இருந்த 2 லாக்கர்களையும் திறந்தனர். அதிலும் தங்க நகைகளும், வெள்ளி நகைகளும் அதிகமாக இருந்தன.
மொத்தம் 3 லாக்கர்களிலும் 11 கிலோ தங்கம், 20 கிலோ வெள்ளி நகைகள் இருந்தன. ஆய்வு செய்த பின்னர் அந்த நகைகளை மீண்டும் அதே லாக்கர்களில் வைத்து பூட்டி சீல் வைத்தனர்.
போலீசார் நடத்திய விசாரணையில் பாபு பெயரில் கடலூர் செம்மண்டத்தில் உள்ள ஒரு அரசு வங்கியில் மேலும் 3 லாக்கர்கள் இருப்பது தெரியவந்தது. அந்த லாக்கர்களிலும் தங்க நகைகளும், வெள்ளி பொருட்களும் இருக்கலாம் என போலீசார் கருதினர்.
இந்த நிலையில் இன்று காலை செம்மண்டலத்தில் உள்ள அந்த வங்கிக்கு லஞ்ச ஒழிப்பு போலீசார் சென்றனர். அங்கு பாபு பெயரில் இருந்த 3 லாக்கர்களையும் திறந்தனர். அதிலும் தங்கம் மற்றும் வெள்ளி பொருட்கள் இருந்ததாக தெரிகிறது. போலீசார் தொடர்ந்து அந்த லாக்கர்களில் எவ்வளவு நகைகள் உள்ளது என்று மதிப்பீடு செய்து வருகின்றனர். #RTO #DVACRaid
