லுசைல்:
உலக கோப்பை கால்பந்து போட்டி தற்போது உச்ச கட்டத்தை எட்டி விட்டது. நேற்றுடன் அரை இறுதி ஆட்டங்கள் முடிந்து விட்டன.
நேற்று முன்தினம் நடந்த முதல் அரை இறுதியில் அர்ஜென்டினா அணி குரோஷியாவையும், நேற்று நடந்த 2-வது அரை இறுதி ஆட்டத்தில் பிரான்ஸ் அணி மொராக்கோவையும் வீழ்த்தி இறுதிப் போட்டிக்கு தகுதி பெற்றன.
இன்றும், நாளையும் ஓய்வு நாளாகும். 3-வது இடத்துக்கான போட்டி நாளை மறுநாள் (17-ந்தேதி) தோகாவில் உள்ள கலீபா சர்வதேச ஸ்டேடியத்தில் நடக்கிறது. இதில் அரை இறுதியில் தோல்வியை தழுவிய மொராக்கோ-குரோஷியா அணிகள் மோதுகின்றன.
இரு அணிகளும் 'குரூப்' சுற்றில் 'எப்' பிரிவில் இடம் பெற்று இருந்தன. இரு அணிகளும் மோதிய 'லீக்' ஆட்டம் கோல் எதுவுமின்றி 'டிரா' ஆனது. 3-வது இடத்துக்கான ஆட்டம் இந்திய நேரப்படி இரவு 8.30 மணிக்கு நடக்கிறது.
இறுதிப்போட்டி 18-ந்தேதி (ஞாயிற்றுக்கிழமை) நடக்கிறது. இந்திய நேரப்படி இரவு 8.30 மணிக்கு லுசைல் மைதானத்தில் நடைபெறும் இறுதி ஆட்டத்தில் அர்ஜென்டினா-பிரான்ஸ் பலப்பரீட்சை நடத்துகின்றன.
இரு அணிகளும் 2 முறை உலக கோப்பையை வென்றுள்ளன. தென் அமெரிக்க கண்டத்தை சேர்ந்த அர்ஜென்டினா 1978, 1986 ஆகிய ஆண்டுகளிலும், ஐரோப்பிய கண்டத்தை சேர்ந்த பிரான்ஸ் 1998, 2018 ஆகிய ஆண்டுகளிலும் கோப்பையை வென்றன.
இரு அணி நட்சத்திர வீரர்களும் நேரடியாக இறுதிப்போட்டியில் மோதுகிறார்கள். அர்ஜென்டினா கேப்டன் லியோனல் மெஸ்சியும், எம்பாப்வேயும் இறுதி போட்டியில் வீர தீரத்துடன் விளையாடுவார்கள். இருவருமே பிரான்ஸ் நாட்டில் உள்ள பி.எஸ்.ஜி. கிளப் அணிக்காக ஆடி வருகிறார்கள்.
இந்த உலக கோப்பையில் மெஸ்சியும், எம்பாப்வேயும் தலா 5 கோல்கள் அடித்து முதல் இடத்தில் உள்ளனர். இதே போல 2-வது இடத்தில் ஜுலியன் அல்வா ரெஸ் (அர்ஜென்டினா), ஆலிவர் ஜிரவுட் (பிரான்ஸ்) உள்ளனர். இருவரும் தலா 4 கோல்கள் அடித்துள்ளனர்.
