அபுதாபி அரங்கை அதிரவைத்த இசான் கிஷான், சூர்யகுமார்... 235 ரன்கள் குவித்தது மும்பை

அபுதாபி:

ஐபிஎல் கிரிக்கெட் தொடரில் இன்று அபுதாபியில் நடைபெறும் ஆட்டத்தில் மும்பை இந்தியன்ஸ் அணியும் சன்ரைசர்ஸ் ஐதராபாத் அணியும் மோதுகின்றன. மும்பை அணிக்கு இந்த ஆட்டம் மிகவும் முக்கியமான ஆட்டமாகும். இதில் அதிக ரன்ரேட்டில் வெற்றி பெற்றால் மட்டுமே மும்பை அணி பிளே ஆப் சுற்றுக்கு தகுதி பெறும். 

டாஸ் வென்று பேட்டிங்கை தேர்வு செய்த மும்பை அணி, அதிரடியாக ஆடி 9 விக்கெட் இழப்பிற்கு 235 ரன்கள் குவித்தது. பந்துகளை பவுண்டரிகள் மற்றும் சிக்சர்களாக பறக்க விட்ட இசான் கிஷான், 32 பந்துகளில் 84 ரன்கள் குவித்து அசத்தினார். இதேபோல் சூர்யகுமார் யாதவும் மின்னல் வேக ஆட்டத்தை வெளிப்படுத்தி 40 பந்துகளில் 82 ரன்கள் விளாசினார்.

ஐதராபாத் அணி தரப்பில் ஜேசன் ஹோல்டர் 4 விக்கெட் வீழ்த்தினார். ரஷித் கான், அபிஷேக் சர்மா ஆகியோர் தலா 2 விக்கெட் எடுத்தனர்.

இதையடுத்து 236 ரன்கள் எடுத்தால் வெற்றி என்ற இலக்குடன் ஐதராபாத் அணி களமிறங்கியது.