மொயீன் அலி வேண்டுகோளை ஏற்றது சென்னை சூப்பர் கிங்ஸ்

இங்கிலாந்து கிரிக்கெட் அணியின் சுழற்பந்து வீச்சு ஆல்-ரவுண்டர் மொயீன் அலி. இவர் கடந்த ஆண்டு ஐபிஎல் போட்டியில் ஆர்சிபி அணிக்காக விளையாடினார். இந்த சீசனுக்கான (2021) ஏலத்தில் அவரை ஆர்சிபி விடுவித்தது. சென்னை சூப்பர் கிங்ஸ் 7 கோடி ரூபாய் கொடுத்து வாங்கியது.

மும்பையில் உள்ள சென்னை சூப்பர் கிங்ஸ் அணியுடன் மொயீன் அலி இணைந்துள்ளார். சென்னை சூப்பர் கிங்ஸ் அணியின் வீரர்கள் அணியும் ஜெர்சியில் SNJ 10000 என்ற விளம்பர லோகோ இடம் பிடித்துள்ளது. இது ஒரு மதுபான விளம்பரமாகும்.

மொயீன் அலி இஸ்லாம் மதத்தைச் சேர்ந்தவர். மதுபானம் அருந்தக்கூடாது, அதைத் தூண்டும் செயலில் ஈடுபடக்கூடாது என்று இஸ்லாம் மதம் போதிக்கிறது. இதன் மீது மொயீன் அலி நம்பிக்கை வைத்துள்ளார்.

இதனால் ஜெர்சியில் உள்ள SNJ 10000 லோகோவை நீக்க மொயீன் அலி கோரிக்கை விடுத்திருந்தார். அதை சிஎஸ்கே ஏற்றுக்கொண்டு அந்த குறிப்பிட்ட விளம்பரத்தை போட்டிக்கான ஜெர்சியில் இருந்து நீக்க முடிவு செய்துள்ளது.