டபிள்யூடிஏ பைனல்ஸ் தொடரில் இருந்து ஜப்பான் வீராங்கனை நவோமி ஒசாகா விலகல்

பெண்கள் டென்னிஸ் சங்கம் சார்பில் தலைசிறந்த முன்னணி 8 வீராங்கனைகளுக்கு இடையில் ஆண்டுதோறும் டபிள்யூடிஏ பைனல்ஸ் தொடர் நடத்தப்பட்டு வருகிறது. 8 வீராங்கனைகளும் இரண்டு பிரிவுகளாக பிரிக்கப்பட்டு, அதில் வெற்றி பெறுபவர்கள் அரையிறுதிக்கு தகுதி பெறுவார்கள்.

இந்த வருடத்திற்கான பைனல்ஸ் தொடர் சீனாவில் உள்ள ஷென்சென்னில் நடைபெற்று வருகிறது. ஒரு பிரிவில் ஜப்பானைச் சேர்ந்த நவோமி ஒசாகா இடம் பெற்றிருந்தார். நேற்று முன்னதினம் நடைபெற்ற ஆட்டத்தில் ஒசாகா பெட்ரா கிவிட்டோவை எதிர்கொண்டார்.

இதில் கடும் சிரமத்திற்குப்பின் ஒசாகா 7(7)-6(1), 4-6, 6-4 என வெற்றி பெற்றார். இன்று ஆஷ்லே பார்ட்டியை எதிர்த்து விளையாடுவதாக இருந்தது. ஆனால், தோள்பட்டை காயம் காரணமாக தொடரில் இருந்து ஒசாகா விலகியுள்ளார். இதனால் அவருக்குப் பதிலாக கிகி பெர்ட்டென்ஸ் சேர்க்கப்பட்டுள்ளார்.