ஆஸ்திரேலியா - இலங்கை பெண்கள் அணிகளுக்கு இடையில் மூன்று போட்டிகள் கொண்ட டி20 கிரிக்கெட் தொடர் ஆஸ்திரேலியாவில் நடைபெற்று வருகிறது.
முதல் டி20 ஆட்டம் சிட்னியில் இன்று நடைபெற்றது. டாஸ் வென்ற ஆஸ்திரேலியா பேட்டிங் தேர்வு செய்தது. அதன்படி அந்த அணியின் அலிசா ஹீலி, பெத் மூனே ஆகியோர் தொடக்க வீரர்களாக களம் இறங்கினர். ஹீலி 21 பந்தில் 43 ரன்கள் சேர்த்து ஆட்டமிழந்தார்.
ஆனால், பெத் மூனே சிறப்பாக விளையாடி 61 பந்தில் 20 பவுண்டரிகளுடன் 113 ரன்கள் குவித்தார். கார்ட்னெர் 27 பந்தில் 49 ரன்கள் சேர்க்க ஆஸ்திரேலியா 20 ஓவரில் 4 விக்கெட் இழப்பிற்கு 217 ரன்கள் குவித்தது.
218 ரன்கள் அடித்தால் வெற்றி என்ற இலக்குடன் இலங்கையின் சமரி அட்டப்பட்டு, யசோதா மெண்டிஸ் ஆகியார் தொடங்க வீராங்கனைகளாக களம் இறங்கினர். அட்டப்பட்டு சிறப்பான ஆட்டத்தை வெளிப்படுத்த யசோதா 7 ரன்னில் ஆட்டமிழந்தார்.
அதன்பின் வந்த வீராங்கனைகள் சொற்ப ரன்களில் வெளியேறினாலும், அட்டப்பட்டு சிறப்பாக விளையாடி சதம் அடித்தார். அவர் 66 பந்தில் 12 பவுண்டரி, 6 சிக்சர்களுடன் 113 ரன்கள் குவித்தார். இதன்மூலம் ஒரே போட்டியில் எதிரணி வீராங்கனைகள் சதம் அடித்து சாதனையை பதிவு செய்தனர்.
என்றாலும் இலங்கை அணி 20 ஓவரில் 7 விக்கெட் இழப்பிற்கு 176 ரன்கள் மட்டுமே சேர்த்தது. இதனால் 41 ரன்கள் வித்தியாசத்தில் தோல்வியத் தழுவியது.
ஆஸ்திரேலியா வீராங்கனை மூனே-க்கு இது 2-வது சதமாகும். இதன்மூலம் டி20 போட்டியில் ஒன்றிற்கு மேற்பட்ட சதங்கள் அடித்த வீராங்கனைகள் பட்டியலில் 2-வது இடத்தை பிடித்துள்ளார். இதற்கு முன் மெக் லேனிங் இரண்டு முறை சதம் அடித்துள்ளார். மேலும், சிக்சர்கள் ஏதும் இல்லாமல் சதம் அடித்த முதல் வீராங்கனை என்ற பெருமையையும் பெற்றுள்ளார்.
