தென்ஆப்பிரிக்கா - பாகிஸ்தான் இடையிலான முதல் டெஸ்ட் கிரிக்கெட் போட்டி செஞ்சூரியனில் நேற்றுமுன்தினம் தொடங்கியது. டாஸ் வென்று பேட்டிங் செய்த பாகிஸ்தான் ஆலிவியரின் (6) பந்து வீச்சை தாக்குப்பிடிக்க முடியாமல் 181 ரன்னில் சுருண்டது.
பின்னர் தென்ஆப்பிரிக்கா முதல் இன்னிங்சை தொடங்கியது. பவுமா 53 ரன்களும், டி காக் 45 ரன்களும், ஸ்டெயின் 23 ரன்களும் அடிக்க தென்ஆப்பிரிக்கா 223 ரன்கள் சேர்த்து ஆல்அவுட் ஆனது. முதல் இன்னிங்சில் பாகிஸ்தானை விட 42 ரன்கள் முன்னிலைப் பெற்றது. இந்த 42 ரன்கள் தென்ஆப்பிரிக்காவிற்கு முக்கியத்துவம் வாய்ந்ததாக அமைந்தது.
டீன் எல்கர் 42 ரன்கள் பின்தங்கிய நிலையில் பாகிஸ்தான் 2-வது இன்னிங்சை தொடங்கியது. தொடக்க வீரர் இமாம்-உல்-ஹக் (57), 3-வது வீரராக களம் இறங்கிய ஷான் மசூத் (65) ஆகியோரைத் தவிர மற்ற வீரர்கள் சொற்ப ரன்களில் வெளியேற பாகிஸ்தான் 190 ரன்கள் எடுத்து ஆல்அவுட் ஆனது. அத்துடன் நேற்றைய 2-வது நாள் ஆட்டம் முடிவிற்கு வந்தது. முதல் இன்னிங்சில் 6 விக்கெட் வீழ்த்திய ஆலிவியர் 2-வது இன்னிங்சில் ஐந்து விக்கெட்டுக்கள் சாய்த்தார். ரபாடா 3 விக்கெட்டும், ஸ்டெயின் 2 விக்கெட்டும் வீழ்த்தினார்கள்.
முதல் இன்னிங்சில் 42 ரன்கள் பின்தங்கியிருந்தால் 148 ரன்கள் முன்னிலைப் பெற்றது பாகிஸ்தான். இதனால் தென்ஆப்பிரிக்காவின் வெற்றிக்கு 149 ரன்கள் இலக்காக நிர்ணயித்தது.
இன்று 3-வது நாள் ஆட்டம் தொடங்கியது. தென்ஆப்பிரிக்காவின் டீன் எல்கர், மார்க்கிராம் தொடக்க வீரர்களாக களம் இறங்கினார்கள். ஆட்டத்தின் 2-வது ஓவரில் மார்க்கிராம் ரன்ஏதும் எடுக்காமல் ஆட்டமிழந்தார். அடுத்து டீன் எல்கர் உடன் ஹசிம் அம்லா ஜோடி சேர்ந்தார்.
8-வது ஓவரை ஹசன் அலி வீசினார். இந்த ஓவரின் 4-வது பந்தில் அம்லா கொடுத்த கேட்சை 3-வது ஸ்லிப்பில் நின்றிருந்த பகர் சமான் பிடிக்க தவறினார். இதனால் அம்லா 8 ரன்னில் அவுட்டாகுவதில் இருந்து தப்பினார். அடுத்த ஓவரின் 5-வது பந்தில் டீன் எல்கர் அடித்த பந்து முதல் ஸ்லிப்பில் நின்றிருந்த அசார் அலியின் கையில் தஞ்சமடைந்தது.
ஆனால் பந்து தரையில் உரசியதுபோல் சந்தேகம் எழும்பியது. இதனால் மைதான நடுவர் அவுட் கொடுத்துவிட்டு 3-வது நடுவரின் உதவியை நாடினார். 3-வது நடுவர் காட்சியை பலமுறை ‘ரீபிளே’ செய்து பார்த்துவிட்டு, பந்து தரையில் பட்டதற்கு போதுமான அளவு சாட்சி உள்ளது என்று நடுவர் தீர்ப்பை திரும்பப்பெற்றார். இதனால் டீன் எல்கர் 3 ரன்னில் அவுட்டாவதில் இருந்து தப்பினார்.
அம்லா, டீன் எல்கர் ஆகியோர் தங்களுக்கு கிடைத்த வாய்ப்பை சரியாக பயன்படுத்திக் கொண்டனர். அதேவேளையில் பாகிஸ்தான் வேகப்பந்து வீச்சாளர்களின் உத்வேகம் குறைந்தது. அம்லா, டீன் எல்கர் அரைசதம் அடித்ததோடு அணியை வெற்றி பாதைக்கு அழைத்துச் சென்றனர். டீன் எல்கர் சரியாக 50 ரன்னில் ஆட்டமிழந்தார்.
ப்ரூயின் (10), டு பிளிசிஸ் (0) சொற்ப ரன்களில் ஆட்டமிழக்க அம்லா 63 ரன்கள் எடுத்து கடைசி வரை ஆட்டமிழக்காமல் இருக்க தென்ஆப்பிரிக்கா 4 விக்கெட் இழப்பிற்கு 151 ரன்கள் சேர்த்து 6 விக்கெட் வித்தியாசத்தில் வெற்றி பெற்றது.
இரண்டு இன்னிங்சிலும் சேர்த்து 11 விக்கெட்டுக்கள் சாய்த்த ஆலிவியர் ஆட்டநாயகன் விருது பெற்றார். இந்த வெற்றியின் மூலம் மூன்று போட்டிகள் கொண்ட டெஸ்ட் தொடரில் தென்ஆப்பிரிக்கா 1-0 என முன்னிலைப் பெற்றுள்ளது. 2-வது போட்டி ஜனவரி 3-ந்தேதி கேப் டவுனில் தொடங்குகிறது.
