search icon
என் மலர்tooltip icon

    செய்திகள்

    கால் இறுதி ஆட்டம் நாளை தொடக்கம்: உருகுவே-பிரான்ஸ் அணிகள் பலப்பரீட்சை
    X

    கால் இறுதி ஆட்டம் நாளை தொடக்கம்: உருகுவே-பிரான்ஸ் அணிகள் பலப்பரீட்சை

    இரண்டு நாள் ஓய்வுக்கு பிறகு கால் இறுதி ஆட்டங்கள் நாளை தொடங்குகிறது. இதன் முதல் கால் இறுதி ஆட்டத்தில் உருகுவே அணியும் பிரான்ஸ் அணியும் மோதுகின்றனர். #FIFA2018 #Uruguay #France
    நோவாகிராட்:

    21-வது உலக கோப்பை கால்பந்து போட்டி ரஷியாவில் நடைபெற்று வருகிறது. தற்போது இந்தப் போட்டி விறுவிறுப்பான கட்டத்தை நெருங்கி விட்டது.

    இதன் கால்இறுதிக்கு போட்டியை நடத்தும் ரஷியா, முன்னாள் சாம்பியன்களான பிரேசில், உருகுவே, பிரான்ஸ், இங்கிலாந்து மற்றும் சுவீடன், பெல்ஜியம், குரோஷியா ஆகிய நாடுகள் தகுதி பெற்றுள்ளன.

    இரண்டு நாள் ஓய்வுக்கு பிறகு கால் இறுதி ஆட்டங்கள் நாளை (6-ந்தேதி) தொடங்குகிறது. நோவா கிராட் மைதானத்தில் இந்திய நேரப்படி இரவு 7.30 மணிக்கு நடைபெறும் முதல் கால் இறுதி ஆட்டத்தில் உருகுவே-பிரான்ஸ் அணிகள் மோதுகின்றன.

    இரண்டு முறை உலக கோப்பையை வென்ற (1930, 1950) உருகுவே அணி இந்தப் போட்டித் தொடரில் தோல்வி எதையும் தழுவவில்லை. லீக் ஆட்டத்தில் 1-0 என்ற கணக்கில் எகிப்தையும், 1-0 என்ற கணக்கில் சவுதி அரேபியாவையும், 3-0 என்ற கணக்கில் ரஷியாவையும் தோற்கடித்து இருந்தது. 2-வது சுற்றில் 2-1 என்ற கோல் கணக்கில் போர்ச்சுக்கலை வீழ்த்தி இருந்தது.

    உருகுவே அணியின் நம்பிக்கை நட்சத்திர வீரர்களாக கவானி, சுராஸ் உள்ளனர். கவானி 2-வது சுற்றில் 2 கோல் அடித்தார். இந்தப் போட்டித் தொடரில் அவர் 3 கோல்கள் அடித்து உள்ளார். உடல் தகுதி அவருக்கு பிரச்சினையாக இருக்கிறது.

    2-வது சுற்றில் கவானி காயத்தால் பாதியில் விலகினார். நாளைய முக்கியமான ஆட்டத்தில் அவர் ஆடுவதில் சிக்கல் இருக்காது என்றே கருதப்படுகிறது. இதே போல சுராஸ் பந்தை கடத்தி செல்வதில் வல்லவர். மேலும் பின்களத்தில் அந்த அணி வீரர்கள் மிகுந்த பலத்துடன் உள்ளனர்.

    பலம் வாய்ந்த பிரான்சை வீழ்த்தி 6-வது முறையாக அரை இறுதிக்கு நுழையும் ஆர்வத்துடன் உருகுவே உள்ளது. கடந்த உலக கோப்பையில் அந்த அணி 2-வது சுற்றில் கொலம்பியாவிடம் தோற்று இருந்தது. 8 ஆண்டுகளுக்கு பிறகு அரை இறுதியில் நுழையும் வேட்கையில் உள்ளது.

    உலக கோப்பையில் பிரான்சிடம் இதுவரை உருகுவே தோற்காததால் நம்பிக்கையுடன் உள்ளது. 3 முறை மோதி இருக்கிறது. இதில் 1 தடவை வென்றது. 2 ஆட்டம் டிரா ஆனது. 1966-ல் லீக் ஆட்டத்தில் 2-1 என்ற கணக்கில் வென்று இருந்தது. 2002 மற்றும் 2010 உலக கோப்பையில் கோல் எதுவுமின்றி டிரா ஆனது.

    உருகுவேவை போலவே பிரான்ஸ் அணி தோல்வி அடையவில்லை. லீக் ஆட்டங்களில் 2-1 என்ற கோல் கணக்கில் ஆஸ்திரேலியாவையும், 1-0 என்ற கணக்கில் பெருவையும் வீழ்த்தி இருந்தது. டென்மார்க்குடன் கோல் எதுவுமின்றி டிரா செய்தது. 2-வது சுற்றில் அர்ஜென்டினாவை 4-3 என்ற கோல் கணக்கில் வீழ்த்தி இருந்தது.

    அந்த அணியில் எம்பாப்வே, கிரீஸ்மேன், போக்பா, கிரவுட் போன்ற சிறந்த வீரர்கள் உள்ளனர். 1998-ம் ஆண்டு சாம்பியான பிரான்ஸ் அணி 6-வது முறையாக அரை இறுதிக்கு தகுதி பெறும் ஆர்வத்துடன் இருக்கிறது. கடந்த முறை அந்த அணி கால் இறுதியில் ஜெர்மனியிடம் தோற்று இருந்தது. 12 ஆண்டுகளுக்கு பிறகு அரை ஈறுதி வேட்கையில் உள்ளது.

    இரு அணிகளும் 8 முறை மோதியுள்ளன. இதில் பிரான்ஸ் 1 தடவைதான் வெற்றி பெற்றுள்ளது. உருகுவேயிடம் 3 முறை தோற்றுள்ளது. 4 ஆட்டம் டிரா ஆனது.

    பிரான்சும், உருகுவேயும் சம பலத்துடன் திகழ்வுவதால் இந்த ஆட்டம் விறுவிறுப்பாக இருக்கும் என்று எதிர் பார்க்கப்படுகிறது. #FIFA2018 #Uruguay #France
    Next Story
    ×