ஹீரோ மோட்டோகார்ப் நிறுவனத்தின் 2018 மிகப்பெரிய வெளியீடாக எக்ஸ் பல்ஸ் 200 (XPulse 200) ஆன்-ஆஃப் ரோடு மோட்டார்சைக்கிள் இருக்கும் என தகவல் வெளியாகியுள்ளது.
ஹீரோ எக்ஸ் பல்ஸ் 200 மோட்டார்சைக்கிளில் 200-சிசி 4-ஸ்டிரோக், ஏர்-கூல்டு, ஃபியூயல் இன்ஜெக்ட் செய்யப்பட்ட இன்ஜின் வழங்கப்பட்டுள்ளது. இந்த இன்ஜின் 18 பி.ஹெச்.பி. பவர் 17 என்.எம். டார்கியூ செயல்திறன் வழங்குகிறது. ஹீரோ மோட்டோகார்ப் ஆய்வு மையத்தின் பொறியாளர்கள் இந்த இன்ஜினை உருவாக்கியுள்ளனர்.
5-ஸ்பீடு மேனுவல் மேனுவல் கியர்பாக்ஸ் கொண்டிருக்கும் இந்த இன்ஜின் எடை 140 கிலோ என்றும் இதை கொண்டு ஆன் மற்றும் ஆஃப் ரோடிங் பயணங்களை மேற்கொள்ள முடியும் என கூறப்படுகிறது. முன்புறம் மற்றும் பின்பக்கம் நீண்ட டிராவல் சஸ்பென்ஷன்: 21-இன்ச் டையர், 190 மில்லிமீ்ட்டர் ஃபோர்க்கள், பின்புற டையர் 19 இன்ச் யூனிட் மற்றும் மோனோஷாக் 180 மில்லிமீட்டர் சஸ்பென்ஷன் கொண்டிருக்கும் என கூறப்படுகிறது.
ஹீரோ எக்ஸ் பல்ஸ் 200 மோட்டார்சைக்கிளின் இரண்டு சக்கரங்களிலும் டிஸ்க் பிரேக், ஒரு சக்கரத்தில் சிங்கிள்-சேனல் ஏ.பி.எஸ். யூனிட் வழங்கப்படும் என கூறப்படுகிறது. ஸ்போக்டு வீல் கொண்டிருக்கும் எக்ஸ் பல்ஸ் 200 டியூப் கொண்ட டயர் வழங்கப்படுகிறது. டியூப்-லெஸ் டயர்களை கொண்டு ஆஃப்-ரோடிங் செய்ய முடியாது என்பதால் இவ்வகை டயர்கள் வழங்கப்படுவதாக கூறப்படுகிறது.
தரையில் இருந்து 220 மில்லிமீட்டர் கிரவுன்ட் க்ளியரன்ஸ் கொண்டிருக்கும் இந்த மோட்டார்சைக்கிளில் எல்இடி ஹெட்லேம்ப், பாதுகாப்பு வழங்கும் வின்ட்-ஷீல்டு மற்றும் நக்கிள் கார்டுகள் வழங்கப்படுகிறது.
இந்த ஆண்டு விற்பனைக்கு வரயிருக்கும் எக்ஸ் பல்ஸ் 200 இந்தியாவில் ஒரு லட்சம் பட்ஜெட்டில் விலை நிர்ணயம் செய்யப்படும் என ஹீரோ மோட்டோகார்ப் அதிகாரிகள் தெரிவித்திருக்கின்றனர். அந்த வகையில் ஹீரோ எக்ஸ் பல்ஸ் 200 இந்தியாவின் விலை குறைந்த ஆன்-ஆஃப் ரோடு மோட்டார்சைக்கிளாக இருக்கும். இதேபோன்ற வசதிகளை கொண்ட ராயல் என்ஃபீல்டு ஹிமாலயன் மோட்டார்சைக்கிள் இந்திய விலை ரூ.1.8 லட்சம் என நிர்ணயம் செய்யப்பட்டுள்ளது.
