ராமநாதபுரம்
ஆசிரியர் தினத்தை முன்னிட்டு ராமநாதபுரம் செய்யது அம்மாள் பொறியியல் கல்லூரியில் மாணவ, மாணவியர்களுக்கான கல்வி விழிப்புணர்வு முகாம் நடைபெற்றது. இதில் சிறப்பு விருந்தினராக நடிகர் தாமு கலந்து கொண்டு மாணவ, மாணவிகளிடையே கலாம் அவர்களின் சிந்தனை மற்றும் அவர்களின் எதிர்காலம் குறித்த கருத்துக்களை எடுத்துரைத்தார். மேலும் ஆசிரியர் தின கொண்டாட்டத்தின் ஒரு பகுதியாக மாணவர்கள் மற்றும் ஆசிரியர்களுக்கு நடத்தப்பட்ட போட்டிகளில் வெற்றி பெற்றவர்களுக்கு நடிகர் தாமு பரிசுகளை வழங்கினார்.
விழாவில் கல்லூரி தாளாளர் டாக்டர் சின்னத்துரை அப்துல்லா குத்துவிளக்கேற்றி தொடங்கி வைத்தார். கல்லூரி முதல்வர் பெரியசாமி வரவேற்புரை நிகழ்த்தினார். கல்லூரியின் இனிய தமிழ் சங்க ஒருங்கிணைப்பாளர் பேராசிரியர் நெடுமால் புகழேந்தி நன்றியுரை வழங்கினார். விழாவிற்கான ஏற்பாடுகளை கல்லூரியின் இனிய தமிழ் சங்க உறுப்பினர்கள் மற்றும் பேராசிரியர்கள் செய்தனர். செய்யது அம்மாள் பொறியியல் கல்லூரியில் ஆசிரியர் தின விழா கொண்டாட்டம் தாளாளர் டாக்டர் சின்னத்துரை அப்துல்லா தலைமையில் நடைபெற்றது.
