முகவரி கேட்பது போல நடித்து பெண்ணிடம் நகை, செல்போன் பறித்த மர்ம ஆசாமிகள்

கிருஷ்ணகிரி,

கிருஷ்ணகிரி மாவட்டம் ராயக்கோட்டை பகுதியை சேர்ந்தவர் பாலகுமார். இவரது மனைவி ஆஷா (எ) அகிலா (32).

இவர் தனது இருசக்கர வாகனத்தில் கிருஷ்ணகிரி-சென்னை சாலையில் அரசு மருத்துவமனை அருகே சென்று கொண்டிருந்தார். அப்போது அவரை மறித்த அடையாளம் தெரியாத 2 மர்ம நபர்கள் ஒரு முகவரியை கொடுத்து விசாரிப்பது போல நடித்துள்ளனர்.

கண்ணிமைக்கும் நேரத்தில் அவர்கள் அகிலா அணிந்திருந்த 6 பவுன் தங்க சங்கிலி மற்றும் அவர் வைத்திருந்த விலை உயர்ந்த செல்போன் ஆகியவற்றை பறித்துக்கொண்டு தப்பி ஓடிவிட்டனர்.

இது குறித்து அகிலா தந்த புகாரின்பேரில் மகாராஜாக்கடை போலீசார் வழக்கு பதிவு செய்து மர்ம திருடர்களை தேடி வருகின்றனர்.