நாகப்பட்டினம்

நாகப்பட்டினம்:

நாகை நகராட்சிக்குட்பட்ட பகுதிகளில் பன்றிகளை பிடிப்பதற்காக நகராட்சி நிர்வாகம் சார்பில் மயிலாடுதுறை வரதாச்சாரியார் தெருவை சேர்ந்த ராஜா (35) உள்பட 11 பேர் வரவழைக்கப்பட்டனர்.

இவர்கள் கடந்த 3 நாட்களுக்கும் மேலாக நாகையில் தங்கி அக்கரைப் பேட்டை, கீச்சாங்குப்பம், தோணித்துறை ரோடு உள்ளிட்ட பகுதிகளில் பன்றிகளை பிடித்து வந்தனர்.நேற்று நாகை கொத்தள தெருவில் பன்றிகளை பிடிப்பதற்காக ராஜா உள்ளிட்டோர் ஒரு மினி வேனுடன் சென்றனர். அப்போது அப்பகுதியை சேர்ந்த சிலரின் எதிர்ப்பையும் மீறி பன்றிகளை பிடித்தனர்.

இதனால் ஆத்திரம் அடைந்த அவர்கள் ராஜா தரப்பினரை தாக்க தொடங்கினார்கள். இதனால் அனைவரும் மினி வேனில் ஏறி அங்கிருந்து புறப்பட்டு சென்றனர்.

ஆனாலும் ஆத்திரம் தீராத சுமார் 10 பேர் 6 இரு சக்கர வாகனங்களில் பயங்கர ஆயுதங்களுடன் வேனை துரத்தி சென்றனர். கிழக்கு கடற்கரை சாலையில் தனியார் மோட்டார் கம்பெனி அருகில் மினி வேன் வந்த போது அதனை மறித்தனர்.வேனை அடித்து நொறுக்கினர்.

இதனால் பயந்து போன பன்றி பிடிக்கும் தொழிலாளர்கள் கீழே இறங்கி ஓடினர். அப்போது ராஜாவை வழிமறித்து பிடித்து அவரது கழுத்தில் வெட்டினர். இதில் அவர் ரத்த வெள்ளத்தில் சம்பவ இடத்திலே இறந்தார். இது குறித்து தகவல் கிடைத்ததும் நாகை டவுன் போலீசார் அங்கு விரைந்து வந்தனர். ராஜா உடலை கைப்பற்றி பிரேத பரிசோதனைக்காக நாகை அரசு ஆஸ்பத்திரிக்கு அனுப்பி வைத்தனர்.

10 பேர் கும்பலை போலீசார் தேடி வருகிறார்கள்.

வேதாரண்யம்:

வேதாரண்யம் வேதாரண்யேஸ்வரர் கோவில் 2 ஆயிரம் ஆண்டுகள் பழமையானது. இந்த கோவில் மூர்த்தி, தீர்த்தம், தலம் ஆகிய மூன்றிலும் சிறப்புடையது. அகத்திய முனிவருக்கு சிவபெருமான் காட்சி கொடுத்த தலம். வேதங்கள் பூஜை செய்து மூடிக்கிடந்த கதவை அப்பரும், சம்மந்தரும் தேவார திருப்பதிகங்கள் பாடி திறந்து மூடியதாக வரலாறு.

இந்த கோவிலில் ஆண்டுதோறும் மாசிமகப் பெருவிழா 28 நாட்கள் நடைபெறும். இந்த ஆண்டு மாசிமகப் பெருவிழாவிற்கான பந்தக்கால் நடும் நிகழ்ச்சி 3-ந்தேதி நடைபெற்றது. இதையடுத்து இன்று காலை பஞ்சமூர்த்திகள் எழுந்தருள கோவில் கொடிமரத்தில் மாசிமகப் பெருவிழா கொடியேற்றப்பட்டு விழா தொடங்கியது. நிகழ்ச்சியில் கோவில் நிர்வாக அதிகாரி மணவழகன், யாழ்பாணம் பரணீஆதீனம் செவ்வந்திநாத பண்டார சந்நிதி, ஸ்தலத்தார்க் கயிலைமணி வேதரத்தினம், கேடிலியப்பன், உப்பு உற்பத்தியாளர் எஸ்.கே.எம்.எஸ். குரூப் மாரியப்பன், உபயதாரர்கள் எழிலரசு, அம்பிகாதாஸ், சங்கரவடிவேலு உள்பட ஏராளமான பக்தர்கள் கலந்து கொண்டனர்.

வேதாரண்யம்:

வேதாரண்யம் இன்ஸ்பெக்டர் ராஜசேகர் மற்றும் போலீசார் கோடியக்கரை மற்றும் வேதாரண்யம் பகுதியில் ரோந்து பணியில் ஈடுபட்டனர்.

அப்போது கோடியக்காடு பகுதியைச் சேர்ந்த சுப்பிரமணியன் (வயது 52) என்பவரும், வேதாரண்யம் ராஜாஜி பூங்கா அருகே ரமேஷ் (38) என்பவரும் அனுமதியில்லாமல் மதுபானம் விற்று கொண்டிருந்தனர்.

அவர்களை கைது செய்து வழக்கு பதிவுசெய்து விசாரணை நடத்தி வருகின்றனர்.

நாகப்பட்டினம்:

வேலூர் மாவட்டம் குடியாத்தம் ஆரியா தெருவை சேர்ந்தவர் சவுக்கத் அலி. இவரது மகன் ஹனீப் (24). இவர் தனது குடும்பத்தினர், நண்பர்களுடன் வேளாங்கண்ணிக்கு சுற்றுலா வந்தார்.

அவர்கள் கடலில் குளித்து கொண்டிருந்தனர். அப்போது அலைகளின் சீற்றம் அதிகமாக காணப்பட்டதால் ஹனீப் தண்ணீரில் மூழ்கினார். அவரது அலறல் சத்தம் கேட்டு அங்கு குளித்து கொண்டிருந்தவர்களும், கரையில் இருந்தவர்களும் ஹனீப்பை காப்பாற்ற முயன்றனர்.

ஆனால் முடியவில்லை. சுமார் ஒரு மணி நேரம் கழித்து ஹனீப் உடல் அதே பகுதியில் கரை ஒதுங்கியது.

கரூர் மாவட்டம் ஆத்தூர் நொச்சிப்பாளையம் பகுதியை சேர்ந்தவர் பெருமாள். இவரது மகன் மணிகண்டன் (24). அப்பகுதியில் உள்ள கல்லூரியில் எம்.பி.ஏ. 2-ம் ஆண்டு படித்து வந்தார்.இவர் வேளாங்கண்ணிக்கு சுற்றுலா வந்தார்.

கடலில் குளித்த போது அலையில் சிக்கி தண்ணீரில் மூழ்கி இறந்தார். அவரது உடல் கரை ஒதுங்கியது. இருவரது உடல்களையும் கீழையூர் கடற்கரை போலீசார் மீட்டு பிரேத பரிசோதனைக்காக நாகை அரசு ஆஸ்பத்திரிக்கு அனுப்பி வைத்தனர்.

இது குறித்து வேளாங்கண்ணி போலீசார் விசாரணை நடத்தி வருகிறார்கள்.

சீர்காழி:

சீர்காழி பிடாரி தெற்குவீதி திருஞானசம்பந்தர் காலனியை சேர்ந்தவர் செந்தில்நாதன் மனைவி கோமதி (வயது65). இன்று காலை கோமதி கடைக்கு செல்வதற்காக பிடாரி தெற்குவீதி பகுதியில் நடந்து சென்றார். அப்போது அங்கு நிறுத்தப்பட்டிருந்த ஒரு லாரியை அதன் டிரைவர் பின்புறமாக இயக்கினார்.

கோமதி மீது லாரி மோதியதில் படுகாயமடைந்த அவர் சம்பவ இடத்திலேயே பலியானார். இது குறித்து தகவலறிந்து சம்பவ இடத்துக்கு வந்த சீர்காழி இன்ஸ்பெக்டர் அழகுதுரை மற்றும் போலீசார் அவரது உடலை கைப்பற்றி அரசு மருத்துவமனைக்கு பிரேத பரிசோதனைக்காக அனுப்பினர்.

பின்னர் வழக்குப்பதிவு செய்து விபத்தை ஏற்படுத்திய லாரி டிரைவரை வலைவீசி தேடி வருகின்றனர்.

வேதாரண்யம்:

வேதாரண்யத்தை அடுத்த வாய்மேடு காவல் சரகம் பஞ்சநதிக்குளம் நடுச்சேத்தி கிராமம், கணபதி தேவன்காடு பகுதியைச் சேர்ந்தவர் செல்வகுமார் (வயது 34). இவர் சம்பவத்தன்று இரவு மருதூர் கடைத்தெருவிற்கு வந்து விட்டு மோட்டார் சைக்கிளில் வீட்டிற்கு திரும்பினார்.

அப்போது வழியில் சாலையில் உள்ள தடுப்பில் மோதி கீழே விழுந்து படுகாயமடைந்தார். அவரை மீட்டு திருவாரூர் அரசு மருத்துவக்கல்லூரி மருத்துவமனையில் சேர்த்தனர். அங்கு சிகிச்சை பலனில்லாமல் அவர் இறந்தார்.

இதுகுறித்து அவரது மனைவி அபிராமி கொடுத்த புகாரின் பேரில் வாய்மேடு இன்ஸ்பெக்டர் (பொறுப்பு) அருணாச்சலம் வழக்குப்பதிவு செய்து விசாரணை மேற்கொண்டுள்ளார்.

நாகப்பட்டினம்:

காரைக்கால் நிரவி பகுதி வாழை கொல்லைவீதியை சேர்ந்தவர் முகமது சாபி(வயது 58). இவர் திட்டச்சேரியில் ஜவுளிக்கடை நடத்தி வருகிறார்.

சம்பவத்தன்று இவர் நாகூர் பனங்குடி ஆற்று பாலம் அருகே மோட்டார் சைக்கிளில் சென்று கொண்டு இருந்தார். அப்போது பின்னால் மோட்டார் சைக்கிளில் வந்த தஞ்சை கலைஞர் நகரை சேர்ந்த ரமேஷ் மகன் அரவிந்த்குமார்(23) என்பவர் முகமது சாபி மோட்டார் சைக்கிள் மீது மோதினார். இதில் படுகாயம் அடைந்த அவர் சம்பவ இடத்திலேயே இறந்தார்.

இது குறித்து நாகூர் இன்ஸ்பெக்டர் மணிகண்டன் வழக்கு பதிவு செய்து விசாரணை நடத்தி வருகிறார்.