கன்னியாகுமரி :
பத்மநாபபுரம் சட்டமன்றத் தொகுதிக்குட்பட்ட குலசேகரம், திற்பரப்பு பேரூராட்சிகள் மற்றும் சுருளகோடு ஊராட்சியில் வளர்ச்சித் திட்டப்பணிகளை அமைச்சர் மனோதங்கராஜ் தொடங்கி வைத்தார்.
இதனையொட்டி காலையில் குலசேகரம் மாவட்ட மத்திய கூட்டுறவு வங்கியின் நாகக்கோடு பகுதியில் புதிதாக அமைக்கப்பட்ட ஏ.டி.எம். மையத்தை அமைச்சர் மனோதங்கராஜ் திறந்து வைத்தார். பின்னர் குலசேகரம் அருகே காவஸ்தலம் பகுதியில் சிற்றாறு பட்டணம் கால்வாயின் கரையில் ஏற்பட்டுள்ள உடைப்பை பார்வையிட்டு அதனை சீரமைப்பது குறித்து பொதுப்பணிதுறை நீராதாரப்பிரிவு அலுவலர்களிடம் பேசினார்.
தொடர்ந்து திற்பரப்பு பேரூராட்சிக்கு உட்பட்ட திருநந்திகரையில் ரூ. 1 கோடியே 46 லட்சம் மதிப்பீட்டில் நவீன எரிவாயு தகன மேடை அமைக்கும் பணியினை தொடங்கி வைத்தார். பின்னர் சூரியகோடு-திட்டவிளை பகுதியில் ரூ.25 லட்சம் மதிப்பில் சாலை சீரமைக்கும் பணியைத் தொடங்கி வைத்தார். தொடர்ந்து கீழ்விலவூர்கோணம் வேங்கோட்டு குளம் ரூ.37 லட்சம் மதிப்பீட்டில் சீரமைத்து பக்கச்சுவர் கட்டும் பணிகளை தொடங்கி வைத்தார். பிணந்தோட்டில் இ-சேவை மையத்தையும், மாஞ்சக்கோணத்தில் ரூ.12 லட்சம் மதிப்பீட்டில் துணை சுகாதார நிலையம் அமைக்கும் பணிகளையும் தொடங்கி வைத்தார்.
நிகழ்ச்சிகளில், மாவட்ட அரசு வழக்கறிஞர் ஜாண்சன், பொதுப்பணித்துறை உட் கோட்ட என்ஜினீயர் சுகந்தா, உதவி என்ஜினீயர் பிரவீணா, குலசேகரம் பேரூராட்சி செயல் அலுவலர் எட்வின் ஜோஸ், குலசேகரம் பேரூராட்சி துணைத் தலைவர் ஜோஸ் எட்வர்ட், திற்பரப்பு பேரூராட்சி தலைவர் பொன் ரவி, தி.மு.க. மாநில பொதுக்குழு உறுப்பினர் அலாவுதீன், தி.மு.க. கலை இலக்கிய பகுத்தறிவு பேரவை மாவட்ட அமைப்பாளர் ஜெஸ்டின் பால்ராஜ், மாவட்ட வர்த்தக அணி துணை அமைப்பாளர் ஜே.எம். ஆர். ராஜா, திற்பரப்பு தி.மு.க. பேரூர் செயலாளர் ஜாண் எபனேசர், பொன்மனை பேரூர் தி.மு.க. செயலாளர் சாம் பென்னட் சதீஸ், மாவட்ட பிரதிநிதி பொன் ஜேம்ஸ், ஒன்றிய இளைஞரணி துணை அமைப்பாளர் வினித்ஜெரால்ட், திற்பரப்பு பேரூராட்சி முன்னாள் கவுன்சிலர் யோபு உள்பட பலர் கலந்து கொண்டனர்.
