காஞ்சிபுரம்

சென்னை:

கானத்தூரில் நண்பர் வீட்டில் திருடிய வாலிபரை போலீசார் கைது செய்தனர்.

உத்தண்டி, நிலா தெருவில் வசித்து வருபவர் மாரி. கடந்த 6-ந்தேதி இவரது வீட்டில் இருந்த 24 பவுன் நகை திருட்டு போனது.

இதுகுறித்து கானத்தூர் போலீசார் விசாரணை நடத்தினர். அப்போது மாரி வீட்டில் தங்கியிருந்த அவரது நண்பர் திருப்பதியை சேர்ந்த திலீப்குமார் நகையை திருடியது தெரிந்தது. அவரை போலீசார் கைது செய்து 24 பவுன் நகையை மீட்டனர்.

ஆலந்தூர்:

சென்னை விமான நிலையத்தில் மோட்டார் சைக்கிள் திருடிய சிறுவனை போலீசார் கைது செய்தனர்.

சென்னை விமான நிலையத்தில் சரக்கு ஏற்றி, இறக்கும் இடத்தில் நிறுத்தப்படும் மோட்டார் சைக்கிள்கள் அடிக்கடி திருட்டு போனது. இதுகுறித்து விமான நிலைய போலீசில் அதிக அளவு புகார்கள் வந்தன.

இன்ஸ்பெக்டர் வெங்கட் மற்றும் போலீசார் தீவிர கண்காணிப்பில் ஈடுபட்ட போது மீனம்பாக்கத்தை சேர்ந்த 17 வயது சிறுவன் மோட்டார் சைக்கிளை திருடி செல்வது தெரிந்தது. அவனை போலீசார் கைது செய்து விசாரணை நடத்தி வருகிறார்கள்.

மேல்மருவத்தூர்:

மேல்மருவத்தூர் அருகே உள்ளது கீழாமூர் கிராமம். இங்கு ஏராளமானதெரு நாய்கள் இருந்தன.

இந்த நிலையில் கடந்த வாரம் கிராமத்தில் ஒதுக்குபுறமான இடம் மற்றும் வயல்வெளி பகுதியில் ஏராளமான நாய்கள் எரிந்த நிலையில் கொல்லப்பட்டு கிடந்தது.

இதனை பார்த்து அதிர்ச்சி அடைந்த சிலர் பிராணிகள் நல ஆர்வலரும் என்ஜினீரியங் மாணவருமான அஷ்வத்துக்கு தகவல் தெரிவித்தனர். அவரது தலைமையிலான குழுவினர் கீழாமூர் கிராமத்துக்கு வந்து பார்வையிட்டனர் அவர்கள் எரித்து கொல்லப்பட்ட நாய்களின் உடல்களை மீட்டு கிராமநிர்வாக அலுவலர் முன்னிலையில் தகனம் செய்தனர்.

இது குறித்து மேல்மருவத்தூர் போலீசிலும் புகார் செய்யப்பட்டது. போலீசார் வழக்குப்பதிவு செய்து விசாரணை நடத்தினர்.

அப்போது கடந்த சிலமாதங்களில் மட்டும் கீழாமூர் கிராமத்தில் 40–க்கும் மேற்பட்ட ஆடுகளை தெரு நாய்கள் கடித்து கொன்று இருப்பது தெரிந்தது.

இதனால் அதே பகுதியை சேர்ந்த அண்ணன்–தம்பிகளான முத்து, முருகதாஸ் உள்பட 4 பேர் அதிக அளவு பாதிக்கப்பட்டனர். ஆடுகளை இழந்த அவர்கள் பழிக்கு பழியாக 75–க்கும் மேற்பட்ட நாய்களை பிடித்து உயிரோடு எரித்து கொன்று இருப்பது தெரியவந்தது.

இதையடுத்து முத்து, முருகதாசை போலீசார் கைது செய்தனர். மேலும் இது தொடர்பாக அதே பகுதியை சேர்நத மேலும் 2 பேரை தேடி வருகிறார்கள்.

மொத்தமாக 75 நாய்களை விரட்டிப்பிடிப்பது கடினம். எனவே இந்த நாய்களை பிடிக்க மேலும் பலரை அவர்கள் உதவிக்கு அழைத்து இருக்கலாம் என்று தெரிகிறது. அவர்கள் மீதும் நடவடிக்கை எடுக்க போலீசார் முடிவு செய்து உள்ளனர்.

கொல்லப்பட்ட பல நாய்களுக்கு விஷமும் கொடுக்கப்பட்டு உள்ளது. அந்த நாய்களின் உடல்களை தின்ற காகம், பூனையும் அதிக அளவு கீழாமூர் கிராமத்தில் இறந்து இருக்கிறது.

இது குறித்து பிராணிகள் நல ஆர்வலர் அஷ்வத் கூறும் போது: கீழாமூர் கிராமத்தில் ஆடுகளை நாய்கள் கடித்து உள்ளன. அதற்கு பழிவாங்கும் படலமாக நாய்களுக்கு உணவில் பூச்சி மருந்து கலந்து கொடுத்து பிடித்து இருக்கிறார்கள்.

“மயங்கிய அந்த நாய்கள் மீது மண்எண்ணை ஊற்றி உயிரோடு எரித்து கொன்று உள்ளனர். இது தொடர்பாக மேல்மருவத்தூர் போலீசில் புகார் செய்து உள்ளோம்” என்றார்.

ஆடுகளை இழந்த கோபத்தில் பழிவாங்குவதற்காக 75 நாய்கள் உயிரோடு எரிக்கப்பட்ட சம்பவம் பிராணிகள் நல ஆர்வலர்களிடையே அதிர்ச்சியை ஏற்படுத்தி உள்ளது.

சென்னை:

செம்பாக்கம் குடியிருப்போர் நலச்சங்கங்களின் கூட்டமைப்பு சார்பில் தாம்பரம் எம்.எல்.ஏ. எஸ்.ஆர்.ராஜாவுக்கு வரவேற்பு மற்றும் குறைகேட்பு கூட்டம் நடந்தது.

முருகன் தலைமை தாங்கினார். கமலக்கண்ணன் வரவேற்றார். பா.ஜனதா சார்பில் எஸ்.ஆர்.ராஜாவை எதிர்த்து போட்டியிட்டு தோல்வி அடைந்த செம்பாக்கம் வேத சுப்பிரமணியன் கூட்டத்தில் கலந்து கொண்டு பொதுமக்கள் பிரச்சினைகளை எடுத்துக் கூறினார். தாம்பரம்-வேளச்சேரி ரோட்டை அகலப்படுத்தும் போது செம்பாக்கம் பகுதியில் பயணிகள் நிழற்குடை அகற்றப்பட்டது. இதனால் 2 வருடமாக பொதுமக்கள் அவதிப்படுகிறார்கள்.

பொதுமக்கள் புகார்களை ஏற்று தொகுதி மேம்பாட்டு நிதியில் 2 பயணிகள் நிழற் குடைகள், செம்பாக்கம் 7–வது தெருவில் இருந்து நன்மங்கலம் ஏரிக்கு நீர்வழிப்பாதை சீரமைப்பு, அஸ்தினாபுரம்– செம்பாக்கம் சிமெண்டு ரோட்டை அகலப்படுத்துதல் ஆகியவற்றை செய்து தருவதாக உறுதி அளித்தார்.

மேலும் தொல்லியல் துறை யின் தடை ஆணையை ரத்து செய்ய முயற்சி மேற்கொள் வதாகவும், எஸ்.ஆர்.ராஜா உறுதியளித்தார். சுந்தரமூர்த்தி, வெங்கட்ரமணி, லோகநாதன் உள்பட நிர்வாகிகள் பலர் கலந்து கொண்டனர்.

காஞ்சீபுரம்:

காஞ்சீபுரம் உலகளந்த பெருமாள் கோவில் தெரு பகுதியில் காசு வைத்து சிலர் சூதாடி கொண்டிருப்பதாக சிவகாஞ்சி இன்ஸ்பெக்டர் பிரபாகரனுக்கு தகவல் கிடைத்தது.

போலீசார் அங்கு விரைந்து சென்று சூதாட்டத்தில் ஈடுபட்ட காஞ்சீபுரத்தை சேர்ந்த அன்சாரி, குமார், நாகராஜ், முரளி, வாசு, சந்தியப்பன், கணேசன், தமிழ்செல்வன் மற்றும் செந்தில் ஆகியோரை கைது செய்தனர்.

அவர்களிடம் இருந்து ரூ.6 ஆயிரத்து 410 பறிமுதல் செய்யப்பட்டது.

காஞ்சீபுரம்:

காஞ்சீபுரம் பாலாற்று படுகை பகுதியில் மணல் கடத்தல் நடைபெறுவதாக காஞ்சி தாலுக்கா போலீசாருக்கு தகவல் கிடைத்தது. திருப்பருத்திகுன்றம் பகுதியில் போலீசார் ரோந்து பணியில் ஈடுபட்ட போது மாட்டு வண்டியில் மணல் கடத்தி வந்த அதே பகுதியைச் சேர்ந்த சவுந்தர்ராஜனை கைது செய்தனர்.

இதேபோல் மாகறல் பகுதியில் மணல் கடத்தலில் ஈடுபட்ட அதே பகுதியைச் சேர்ந்த டில்லிகணேஷ், நீலகண்டன், இளங்கோ ஆகியோரை மாகறல் போலீசார் கைது செய்தனர். மாட்டு வண்டிகளும் பறிமுதல் செய்யப்பட்டது.