ஈரோடு

ஈரோடு:

ராசிபுரத்தில் இருந்து கோவைக்கு ஒரு அரசு பஸ் சென்றது. அந்த பஸ் ஈரோடு பஸ் நிலையத்தில் சிறிது நேரம் நின்று விட்டு பயணிகளை ஏற்றி கொண்டு புறப்பட்டு சென்றது.

அப்போது பஸ்சில் ஒரு இளம்ஜோடி ஏறியது. இந்த ஜோடி இடது பக்கம் உள்ள இருவர் உட்காரும் சீட்டில் அமர்ந்து கொண்டனர். பஸ் புறப்பட்டதில் இருந்து இருவரும் சிரித்து... சிரித்து பேசி ஒருவர் மீது ஒருவர் விழுந்து மகிழ்ந்தப்படி வந்தனர்.

பஸ்சில் கூட்டம் அதிகம் இல்லாததால் அவர்களுக்கு மேலும் குஷியை ஏற்படுத்தியது. ஜன்னல் ஓரத்தில் உடகார்ந்திருந்த பெண்ணின் தலை முடி காற்றில் பறந்தது. இதை அருகே இருந்த வாலிபர் கவனித்து முடியை கோதி விட்டு கொண்டே இருந்தார். பதிலுக்கு அந்த பெண் வாலிபர் கன்னத்தில் மொட்டுகள் போல இருந்த வியர்வை துளிகளை தனது சேலையால் துடைத்தார். திடீரென அந்த வாலிபர் அந்த பெண்ணின் கன்னத்தில் முத்தமிட... பதிலுக்கு அந்த இளம் பெண்ணும் முத்தமிடவும் அந்த பஸ் காதல் வாகனமாக மாறி விட்டது.

இதை நோட்டமிட்டபடி பார்த்த பயணிகள் சிலர் முகம் சுழித்தனர். ‘‘இவர்கள் புதுமண தம்பதியாகவே இருக்கட்டும் அதற்காக ஓடும் பஸ்சில் இப்படியா கொஞ்சி குலாவுவது...? இது அநாகரீகமாக இல்லையா...? என்று பயணிகள் முணு முணுத்தனர்.

பஸ் அவினாசி சென்றதும் 10 நிமிடம் அந்த பெண் வாலிபர் மடியில் படுக்க அடுத்த 10 நிமிடம் அந்த இளம்பெண் மடியில் வாலிபர் படுத்து கொள்ள இந்த காதல் லீலைகளை ஒரு சில பயணிகள் ரசித்தப்படியே வந்தனர்.

மொடக்குறிச்சி:

மொடக்குறிச்சி அடுத்த 46 புதூர் முத்துக்கவுண்டன் பாளையம், பெரியார்நகரை சேர்ந்தவர் கருப்பசாமி. இவரது மகன் குணா என்கிற எஸ்ரா (வயது19).

குணாவுக்கு குடிப்பழக்கம் இருந்ததாக கூறப்படுகிறது. இதை வீட்டில் உள்ளவர்கள் கண்டித்து உள்ளனர். இதனால் குணா சில நாட்களாக மன வேதனையுடன் இருந்து வந்துள்ளார்.

சம்பவத்தன்று குணா குடிபோதையில் வீட்டுக்கு வந்ததாக கூறப்படுகிறது. நேராக தனது படுக்கையறைக்கு சென்று படுக்க சென்று விட்டார்.

மறுநாள் காலை நீண்ட நேரமாகியும் கதவு திறக்கபடாததால் சந்தேகம் அடைந்த குணாவின் தந்தை கதவை தட்டியுள்ளார். ஆனால் எந்த பதிலும் வரவில்லை. அக்கம் பக்கத்தினர் உதவுயுடன் கதவை உடைத்து உள்ளே சென்று பார்த்த போது படுக்கையறையில் குணா தூக்குபோட்டு தொங்கிய நிலையில் கிடந்தார்.

அவரை மீட்டு சிகிச்சைக்காக ஈரோடு அரசு ஆஸ்பத்திரிக்கு கொண்டு சென்றனர்.அவரை பரிசோதனை செய்த டாக்டர் குணா வரும் வழியிலேயே பரிதாபமாக இறந்து விட்டதாக தெரிவித்தார்.

இது குறித்து மொடக்குறிச்சி போலீசார் வழக்கு பதிவு செய்து விசாரித்து வருகிறார்கள்.

பவானி:

பவானி அருகே உள்ள பவளவாய் பேட்டை தபால் நிலைய வீதியை சேர்ந்தவர் குருவாயம்மாள் (வயது 85).

இவர் குடோன் வைத்து நடத்தி வருகிறார். திருப்பூரில் இருந்து பழைய பனியன், வேட்டி போன்ற துணிகளை வாங்கி கால் மிதிமேட் தயாரித்து வியாபாரிகளுக்கு கொடுத்து விற்பனை செய்து வந்தார்.

இவருக்கு 2 மகன்கள் 2 மகள்கள் உள்ளனர். மகள்களுக்கு திருமணமாகி விட்டது. மாரசாமி என்ற மகன் மட்டும் தாயாருடன் இருந்து வந்தார்.

நேற்று குடோனில் குருவாயம்மாள் படுத்து தூங்கி கொண்டிருந்தார். இன்று (திங்கட்கிழமை) அதிகாலை மாரசாமி எழுந்து வெளியே சென்று விட்டார்.

அவர் போன சிறிது நேரத்தில் குடோனில் திடீரென தீப்பிடித்தது. இதில் ஏற்பட்ட புகை மூட்டத்தில் குருவாயம்மாள் சிக்கி மயங்கினார்.

இதில் அவரது உடலிலும் தீப்பிடித்து எரிந்தது. சிறிது நேரத்தில் குருவாயம்மாள் உடல் கருகி பலியானார்.

குடோனில் தீப்பிடித்து எரிந்ததை கண்ட அந்த பகுதி மக்கள் பவானி தீயணைப்பு நிலையத்துக்கு தகவல் கொடுத்தனர். தீயணைப்பு வீரர்கள் விரைந்து வந்து தீயை அணைத்தனர்.

குடோனில் இருந்த துணிகள் எரிந்து சாம்பலானது. மீதி உள்ள துணிகள் தீ பிடிக்காமல் தீயணைப்பு வீரர்கள் கிளறி விட்டனர்.

இந்த தீ விபத்து எப்படி ஏற்பட்டது? என்று தெரிய வில்லை. மின் கசிவு காரணமாக தீ பிடித்ததா? அல்லது எப்படி தீ பிடித்தது? என்று பவானி போலீசார் வழக்கு பதிவு செய்து விசாரணை நடத்தி வருகிறார்கள்.

இந்த சம்பவம் அந்த பகுதியில் பரபரப்பையும், சோகத்தையும் ஏற்படுத்தியது.

கொடுமுடி:

ஈரோடு மாவட்டம் கொடுமுடி அருகே உள்ள கொம்பணைப்புதூர் அம்மன் திருமண மண்டபத்தில் இன்று மதியம் வேளாண்மை பொறியியல் துறை சார்பில் விவசாய கருத்தரங்கு நடந்தது. கருத்தரங்குக்கு மாவட்ட வருவாய் அதிகாரி சதீஸ் தலைமை தாங்கினார்.

இந்த கருத்தரங்கில் பள்ளி கல்வித்துறை அமைச்சர் கே.ஏ.செங்கோட்டையன் சிறப்பு விருந்தினராக கலந்து கொண்டார்.

விழாவில் கலந்து கொண்டு திரும்பிய அமைச்சர் செங்கோட்டையனிடம் நிருபர்கள் கோவை மாவட்டம் சூலூர் எம்.எல்.ஏ. கனகராஜ், “நான் ஓ.பி.எஸ்.அணிக்கு மாற போவதாக கூறியுள்ளாரே?” என்று கேட்டபோது, அதற்கு செங்கோட்டையன் கூறியதாவது:-

சூலூர் எம்.எல்.ஏ. கனகராஜ் கல்குவாரியில் நடந்துள்ள ஊழலை தான் விசாரிக்க கூறியுள்ளார். அதுகுறித்து விசாரணை நடத்தப்படும். அவர் அணி மாற மாட்டார். எங்களுடன் தான் இருப்பார். இது தவறான தகவல்.

ஆர்.கே.நகர் தொகுதியில் சின்னம்மா சசிகலா ஆசியுடன் துணைப்பொதுச் செயலாளர் தினகரன் போட்டியிடுகிறார். அவர் நிச்சயமாக அதிக வாக்கு வித்தியாசத்தில் அமோகமாக வெற்றி பெறுவார்.

இவ்வாறு அவர் கூறினார்.

இந்த கருத்தரங்கில் அமைச்சர் செங்கோட்டையன் பேசிவிட்டு சென்ற பிறகு அதிகாரிகளை விவசாயிகள் திடீரென்று முற்றுகையிட்டனர்.

“இந்த கருத்தரங்கில் விவசாயிகளுக்கு முக்கியத்துவம் கொடுக்கப்படவில்லை. விவசாயிகளை மேடையில் ஏற அனுமதிக்கவும் இல்லை. இந்த நிகழ்ச்சி விவசாயிகள் நிகழ்ச்சியாக தெரியவில்லை. அரசியல் நிகழ்ச்சியாக தான் தெரிந்தது” என்று கூறினர்.

இதை தொடர்ந்து விவசாயிகளை அதிகாரிகள் சமரசம் செய்தனர்.

மொடக்குறிச்சி:

தமிழக ஊரக வளர்ச்சித்துறை அலுவலர்கள் சங்கம் சார்பில் பல்வேறு கோரிக்கைகளை வலியுறுத்தி காலவரையற்ற வேலை நிறுத்தம் மற்றும் ஆர்ப்பாட்டம் செய்து வருகின்றனர்.

மொடக்குறிச்சி யூனியன் அலுவலகம் முன்பு நடைபெற்ற ஆர்ப்பாட்டத்தில் சத்துணவு ஊழியர் சங்க மாவட்ட தலைவர் மூர்த்தி, தமிழ்நாடு ஊரக வளர்ச்சித்துறை அலுவலர் சங்க மாவட்ட பொருளாளர் லோக நாதன், ஈரோடு மாவட்ட வருவாய்த்துறை சங்க பொறுப் பாளர் மகேந்திரன் உள்பட பலர் கலந்து கொண்டனர்.

ஊராட்சி செயலாளர்களுக்கு இளநிலை உதவியாளர் ஊதியம், தேர்வுநிலை, சிறப்பநிலை, கூடுதல் பொறுப்புப்படி வழங்க வேண்டும் என்பன உள்பட பல்வேறு கோரிக்கைகளை வழியுறுத்தி ஆர்ப்பாட்டம் நடத்தினர்.

ஈரோடு:

முங்கத்தொழுவு கிராம பஞ்சாயத்துக்குட்பட்ட மக்கள் குடிநீர் கேட்டு சென்னிமலை யூனியன் அலுவலம் முன்பு காலி குடங்களுடன் ஆர்ப்பாட்டம் செய்தனர்.

சென்னிமலை ஒன்றியம், முருங்கத்தொழுவு கிராம பஞ்சாயத்துக்குட்பட்ட மங்களபுரம், சல்லிமேடு, அம்மன்கோவில் புதூர் ஆகிய பகுதியில் வசிக்கும் 50க்கும் மேற்பட்டகுடும்பத்தினர் ஒரு மாத காலமாக குடிநீர் இன்றி சிரமப்படுகின்றனர்.

இதுகுறித்து தொடர்ந்து அதிகாரிகளுக்கு புகார் கொடுத்தும் நடவடிக்கை எடுக்கவில்லையாம் இதனால் 50-க்கும்மேற்பட்ட பெண்கள் காலி குடங்களுடன் சென்னிமலை யூனியன்அலுவலகம் வந்து இந்திய கம்யூனிஸ்ட் கட்சி ஒன்றிய செயலாளர் பொன்னுசாமி தலைமையில் ஆர்ப்பாட்டம் செய்தனர். குடிநீர் கேட்டும் அதிகாரிகளை கண்டித்தும் கோ‌ஷம் எழுப்பினர்.

இதனால் அந்த பகுதியில் சிறிது நேரம் பரபரப்பு ஏற்பட்டது.