ஈரோடு

ஈரோடு:

கோபி லக்கம்பட்டி அருகே கரட்டடி பாளையத்தில் அமைச்சர் கே.ஏ. செங்கோட்டையனை வரவேற்று பேனர் வைக்கப்பட்டு இருந்தது. இதில் மறைந்த முதல் அமைச்சர் ஜெயலலிதா, அ.தி.மு.க. பொது செயலாளர் சசிகலா படமும், செங்கோட்டையன் படமும் உள்ளது.

இதில் ஜெயலலிதா- சசிகலா படம் கிழிக்கப்பட்டு உள்ளது, சசிகலா அதிருப்தியாளர்கள் இந்த படத்தை கிழித்தார்களா? அல்லது மாற்று கட்சியை சேர்ந்தவர்கள் இந்த செயலில் ஈடுபட்டார்களா? என்பது தொயவில்லை .

இந்த சம்பவம் கோபி பகுதியில் பரபரப்பை ஏற்படுத்தி உள்ளது.

கவுந்தப்பாடி:

ஈரோடு மாவட்டம் கவுந்தப்பாடி ஆஸ்பத்திரி ரோடு பகுதியை சேர்ந்தவர் ராஜீவ்காந்தி (வயது35). ராஜீவ்காந்தி கவுந்தப்பாடியில் உள்ள தனியார் வீட்டு வசதி கூட்டுறவு கடன் மேலாளராக வேலை பார்த்து வந்தார்.

ராஜீவ்காந்தி கேரள பாலக்காடு கொடுவாயூரை சேர்ந்த சிவரஞ்சினி என்பவரை காதலித்து திருமணம் செய்தார்.இவர்களுக்கு ஸ்ரீதர்(5) என்ற மகனும், பிரிட்ஜிதா(2) என்ற மகளும் உள்ளனர்.

இந்நிலையில் ராஜீவ்காந்தி வங்கிகளில் வேலை வாங்கி தருவதாக கூறி சிலரிடம் பணம் வாங்கி உள்ளதாக கூறப்படுகிறது. பணம் கொடுத்தவர்கள் ராஜீவ்காந்தியிடம் பணம் கேட்டு வந்தனர்.

இது சம்பந்தமாக தலைமை அலுவலகம் ராஜீவ்காந்தியை பணி நீக்கம் செய்ததாக கூறப்படுகிறது. இந்நிலையில் 4 மாதத்திற்கு முன் சிவரஞ்சினி, ராஜீவ்காந்திடம் கோபித்து கொண்டு கேரளாவில் உள்ள பெற்றோர் வீட்டுக்கு சென்று விட்டார்.

இதனால் ராஜீவ்காந்தி கடந்த சில நாட்களாள மனதேவனையுடன் இருந்தார். நேற்று மதியம் வீட்டிற்கு வந்த ராஜீவ்காந்தி திடீரென தனது மனைவி சேலையில் தூக்குபோட்டு தற்கொலை செய்து கொண்டார்.

இது குறித்து கவுந்தப்பாடி போலீசாருக்கு தகவல் தெரிவிக்கப்பட்டது,அவர்கள் சம்பவ இடத்துக்கு விரைந்து வந்து ராஜீவ்காந்தி உடலை மீட்டு பிரேத பரிசோதனைக்காக கோபி அரசு ஆஸ்பத்திரிக்கு அனுப்பி வைத்தனர்.

இது குறித்து காவுந்தப்பாடி போலீசார் வழக்குபதிவு செய்து விசாரித்து வருகிறார்கள்.

பெருந்துறை:

திருப்பூர் மாவட்டம் பெருமாநல்லூரை சேர்ந்தவர் கதிரவன் (வயது40). டிராக்டர் புரோக்கர். டிராக்டர்களை வாங்கி விற்பனை செய்து வருகிறார்.

இவரது மனைவி ஈஸ்வரி (33). இவர்களுக்கு நகுலன் (12), ஜெயபாரதி(7) என்ற 2 குழந்தைகள் உள்ளனர்.

கடந்த சில நாட்களுக்கு முன்பு கணவருடன் ஏற்பட்ட தகராறில் ஈஸ்வரி தனது 2 பிள்ளைகளை அழைத்து கொண்டு நாமக்கல்லில் உள்ள தனது பெற்றோர் வீட்டுக்கு சென்று விட்டார்.

மனைவியையும் , குழந்தைகளையும் பிரியமனம் இல்லாத கதிரவன் தனது நண்பர்கள் மற்றும் உறவினர்களுடன் நாமக்கல் சென்று மனைவியிடம் சமரசம் செய்தார்.

கணவான் சமரசத்தை ஏற்று கொண்ட ஈஸ்வரி குழந்தைகளுடன் கணவருடன் செல்ல முடிவு செய்தார் .

அதன்படி அவர்கள் நேற்று இரவு ஆம்னி வேனில் நாமக்கல்லில் இருந்து பெருமாநல்லூருக்கு புறப்பட்டு சென்று கொண்டு இருந்தனர்.

வேனை கதிரவன் ஓட்டி சென்றார். அவரது மனைவி , 2 குழந்தைகள் உள்பட 8 பேர் வேனில் சென்றனர்.

இன்று அதிகாலை 2.30மணியளவில் வேன் பெருந்துறை அருகே பைபாஸ் ரோட்டில் சென்ற போது நாமக்கல்லில் இருந்து செங்கல் லோடு ஏற்றி கொண்டு ஒரு லாரி கோவை நோக்கி சென்று கொண்டு இருந்தது.  ஒரு பெட்ரோல் பங்கில் பெட்ரோல் போடுவதற்காக மெதுவாக சென்று ஓரங்கட்டியது.

இந்த சமயம் பின்னால் வந்த வேன் எதிர்பாராத வகையில் லாரியின் பின்புறம் “டமார்” என்ற சத்தத்துடன் பயங்கரமாக மோதியது.

இந்த விபத்தில் வேனில் வந்த ஈஸ்வரி.லட்சுமி (70),சந்திரன் (54), ஆகிய 3 பேரும் சம்பவ இட த்திலேயே இடிபாடுகளுக்குள் சிக்கி பாதாபமாக இறந்தனர்.

மேலும் கதிரவன் , நகுலன், ஜெயபாரதி, மனோகரன் (27), மற்றொரு லட்சுமி (54) ஆகிய 5 பேர் படுகாயம் அடைந்தனர். இவர்கள் மீட்கப்பட்டு சிகிச்சைக்காக ஆஸ்பத்திரியில் சேர்க்கப்பட்டு உள்ளனர்.

இந்த விபத்து குறித்து பெருந்துறை போலீஸ் இன்ஸ்பெக்டர் சிவகுமார் சம்பவ இடத்துக்கு சென்று விசாரணை நடத்தினார்.

ஈரோடு:

ஈரோடு மாவட்டம் பவானி மாணிக்கம்பாளையத்தை சேர்ந்தவர் பாலகிருஷ்ணன் (வயது 67). தொழில் அதிபர். இவர் நேற்று முன்தினம் இரவு சென்னையில் இருந்து ஈரோட்டிற்கு ஏற்காடு எக்ஸ்பிரஸ் ரெயிலில் வந்துகொண்டு இருந்தார். ரெயிலில் பாலகிருஷ்ணன் குளிர்சாதன (ஏ.சி.) பிரிவு பெட்டியில் பயணம் செய்தார்.

அந்த ரெயில் வேலூர் மாவட்டம் காட்பாடி ரெயில் நிலையத்தை தாண்டியதும் பாலகிருஷ்ணன் தான் கொண்டு வந்த பணப்பையை அருகில் வைத்துக்கொண்டு தூங்கினார். அந்த பையில் ரூ.57 ஆயிரம் இருந்தது.

இந்தநிலையில் ஜோலார்பேட்டை அருகே ரெயில் வந்தபோது பாலகிருஷ்ணன் கண்விழித்து பார்த்தார். அப்போது அவருக்கு அருகில் இருந்த பணப்பை மாயமானதை கண்டு அதிர்ச்சி அடைந்தார். பாலகிருஷ்ணன் தூங்கிக்கொண்டு இருந்தபோது பணப்பையை யாரோ மர்ம நபர் திருடிவிட்டது தெரியவந்தது.

நேற்று அதிகாலை பாலகிருஷ்ணன் ஈரோடு ரெயில் நிலையத்தில் வந்து இறங்கினார். உடனே ரெயில் நிலையத்தில் உள்ள போலீஸ் நிலையத்திற்கு சென்று அவர் புகார் கொடுத்தார். திருட்டு நடந்த சம்பவம் காட்பாடி பகுதி என்பதால் ஈரோடு ரெயில்வே போலீசார் பாலகிருஷ்ணனின் புகாரை காட்பாடிக்கு அனுப்பி வைத்தனர்.

ஈரோடு:

ராசிபுரத்தில் இருந்து கோவைக்கு ஒரு அரசு பஸ் சென்றது. அந்த பஸ் ஈரோடு பஸ் நிலையத்தில் சிறிது நேரம் நின்று விட்டு பயணிகளை ஏற்றி கொண்டு புறப்பட்டு சென்றது.

அப்போது பஸ்சில் ஒரு இளம்ஜோடி ஏறியது. இந்த ஜோடி இடது பக்கம் உள்ள இருவர் உட்காரும் சீட்டில் அமர்ந்து கொண்டனர். பஸ் புறப்பட்டதில் இருந்து இருவரும் சிரித்து... சிரித்து பேசி ஒருவர் மீது ஒருவர் விழுந்து மகிழ்ந்தப்படி வந்தனர்.

பஸ்சில் கூட்டம் அதிகம் இல்லாததால் அவர்களுக்கு மேலும் குஷியை ஏற்படுத்தியது. ஜன்னல் ஓரத்தில் உடகார்ந்திருந்த பெண்ணின் தலை முடி காற்றில் பறந்தது. இதை அருகே இருந்த வாலிபர் கவனித்து முடியை கோதி விட்டு கொண்டே இருந்தார். பதிலுக்கு அந்த பெண் வாலிபர் கன்னத்தில் மொட்டுகள் போல இருந்த வியர்வை துளிகளை தனது சேலையால் துடைத்தார். திடீரென அந்த வாலிபர் அந்த பெண்ணின் கன்னத்தில் முத்தமிட... பதிலுக்கு அந்த இளம் பெண்ணும் முத்தமிடவும் அந்த பஸ் காதல் வாகனமாக மாறி விட்டது.

இதை நோட்டமிட்டபடி பார்த்த பயணிகள் சிலர் முகம் சுழித்தனர். ‘‘இவர்கள் புதுமண தம்பதியாகவே இருக்கட்டும் அதற்காக ஓடும் பஸ்சில் இப்படியா கொஞ்சி குலாவுவது...? இது அநாகரீகமாக இல்லையா...? என்று பயணிகள் முணு முணுத்தனர்.

பஸ் அவினாசி சென்றதும் 10 நிமிடம் அந்த பெண் வாலிபர் மடியில் படுக்க அடுத்த 10 நிமிடம் அந்த இளம்பெண் மடியில் வாலிபர் படுத்து கொள்ள இந்த காதல் லீலைகளை ஒரு சில பயணிகள் ரசித்தப்படியே வந்தனர்.