ஈரோடு

ஈரோடு:

விழுப்புரம் மாவட்டம் அய்யனார்பாளையம், பிள்ளையார் கோவில் தெருவை சேர்ந்தவர் பெரியசாமி (வயது50).பெரியசாமி ஈரோட்டு வாய்க்கால்மேட்டில் உள்ள தனது தம்பி வீட்டில் தங்கி கரும்பு வெட்டும் கூலி வேலை பார்த்து வந்தார்.

சம்பவத்தன்று பெரியசாமியும் அவருடன் வேலை பார்க்கும் குப்பன் என்பவரும் வேலையை முடித்து கொண்டு வந்து கொண்டிருந்தனர்.

ஈரோடு-பெருந்துறை ரோடு வாய்க்கால்மேடு அருகே உள்ள மீன் கடைக்கு சென்று மீன் சாப்பிட்டு விட்டு வந்த போது அந்த வழியாக வந்த அடையாளம் தெரியாத வாகனம் ஒன்று எதிர்பாராத வகையில் பெரியசாமி மீது மோதி நிற்காமல் சென்று விட்டது.

இதில் படுகாயம் அடைந்து உயிருக்கு போராடிய பெரியசாமியை அருகில் இருந்தவர்கள் 108 ஆம்புலன்ஸ் மூலம் சிகிச்சைக்காக ஈரோடு அரசு ஆஸ்பத்திரிக்கு கொண்டு சென்றனர். அவரை பரிசோதித்த டாக்டர் பெரியசாமி வரும் வழியிலேயே இறந்துவிட்டதாக தெரிவித்தனர்.

இது குறித்து ஈரோடு தாலுகா போலீசார் வழக்குபதிவு செய்து விசாரித்து வருகிறார்கள்.

ஈரோடு:

வெள்ளகோவில் அருகே உள்ள குட்டை காட்டு புதூரை சேர்ந்தவர் சின்னசாமி (வயது 45). பெயிண்டர். இவர் வேலை வி‌ஷயமாக சென்னை சென்றார். பிறகு அங்கிருந்து ரெயில் மூலம் ஈரோடு வந்தார்.

பிறகு இரவு 10 மணி அளவில் ஈரோட்டிலிருந்து வெள்ளகோவிலுக்கு பஸ்சில் ஏறி சென்று கொண்டிருந்தார். பஸ் வெள்ளகோவில் போய் சேர்ந்தது.

பஸ்சில் பயணம் செய்த அனைத்து பயணிகளும் கீழே இறங்கி விட்டனர். ஆனால் சின்னசாமி மட்டும் இறங்க வில்லை.

பஸ் டிரைவர்- கண்டக்டரும் சென்று பார்த்த போது இருக்கையில் அமர்ந்தபடியே சின்னசாமி பரிதாபமாக இறந்து கிடந்தார்.

இது குறித்து வெள்ளகோவில் போலீசுக்கு தகவல் கொடுக்கப்பட்டது. போலீசார் சென்று விசாரணை நடத்தினர். பிறகு அவரது உடலை மீட்டு பிரேத பரிசோதனைக்காக காங்கயம் அரசு ஆஸ்பத்திரிக்கு அனுப்பி வைத்தனர்.

சின்னசாமி எப்படி இறந்தார்? என்று பிரேத பரிசோதனையில் தெரியவரும் என போலீசார் தெரிவித்தனர்.

நம்பியூர்:

நம்பியூர் அருகே உள்ள மூணாம்பள்ளி என்ற இடத்தை சேர்ந்தவர் வேலுச்சாமி (வயது 56). ஐஸ் வியாபாரி,இவருக்கு அமுதா என்ற மனைவியும், சுப்புலட்சுமி என்ற மகளும், ஜீவா என்ற மகனும் உள்ளனர்.

வேலுச்சாமி இன்று அதிகாலை அதே பகுதியில் உள்ள கொளக்காடு கருப்பராயன் கோவிலுக்கு சென்றார்.

கோவிலில் சாமி கும்பிட்ட அவர் அந்த கோவிலிலேயே தூக்குபோட்டு கொண்டார். இதனால் அவர் சிறிது நேரத்தில் பாதாபமாக இறந்தார்.

இதை கோவிலுக்கு சாமி கும்பிட வந்தவர்கள் பார்த்து அதிர்ச்சியடைந்தனர். உடனே இது பற்றி அவர்கள் போலீசில் தெரிவித்தனர்.

நம்பியூர் போலீஸ் இன்ஸ்பெக்டர் விவேகானந்தன் சம்பவ இடத்துக்கு சென்று விசாரணை நடத்தினார்.

சேலுச்சாமியின் உடல் பிரேத பாசோதனைக்கு அரசு ஆஸ்பத்திரிக்கு அனுப்பப்பட்டது.

குடும்ப தகராறு காரணமாக வேலுச்சாமி கோவிலில் தூக்குபோட்டு தற்கொலை செய்து கொண்டதாக கூறப்படுகிறது.

இது குறித்து நம்பியூர் போலீசார் வழக்குப்பதிவு செய்து விசாரணை நடத்தி வருகிறார்கள்.

ஆப்பக்கூடல் அருகே உள்ள குதிரை தோட்டம் என்ற பகுதியில் பணம் வைத்து சூதாடுவதாக ஆப்பக்கூடல் போலீசாருக்கு ரகசிய தகவல் கிடைத்தது. இதையொட்டி போலீசார் அங்கு சென்று ரோந்து பணியில் ஈடுபட்டனர். அப்போது அங்கு பணம் வைத்து சூதாடியது தெரிய வந்தது.

போலீசார் அந்த 3 பேரையும் கைது செய்தனர். மேலமருத்தூரை சேர்ந்த ஆறுமுகம், ஒரிசேரிபுதூர் முருகேஷ், அந்தியூரை சேர்ந்த மகேஷ் என்ற அந்த 3பேர் மீதும் போலீசார் வழக்கு பதிவு செய்தனர். மேலும் அவர்களிடமிருந்து சூதாட்ட பணம் ரூ.10,200 பறிமுதல் செய்யப்பட்டது.

பெருந்துறை:

பெருந்துறை அருகே உள்ள திருவேங்கடம் பாளையத்தை சேர்ந்தவர் சண்முகம். இவரது மகன் அரிகரசுதன் (வயது 18).

இவர் கோவையில் உள்ள ஒருதனியார் கல்லூரியில் பிகாம் முதல் ஆண்டு படித்து வந்தார்.

இவர் நோய்க் கொடுமையால் அவதிப்பட்டு வந்தார். இதற்காக பல இடங்களில் வைத்தியம் பார்த்தும் நோய் குணமாகவில்லை.

இதனால் மனம் உடைந்த நிலையில் அரிகரசுதன் காணப்பட்டார். இதை தொடர்ந்து நேற்று அவர் தனது தாயாரின் சேலையால் பேனில் தூக்குபோட்டு தற்கொலை செய்து கொண்டார்.

இது குறித்து பெருந்துறை போலீஸ் சப் இன்ஸ்பெக்டர் எட்வர்டு ராஜ் வழக்குப்பதிவு செய்து விசாரணை நடத்தி வருகிறார்.

ஈரோடு:

ஈரோடு சென்னிமலை ரோட்டில் உள்ள பெருமாள் காடு வீதியை சேர்ந்தவர் குமார் (வயது 57). ரெயில்வே ஊழியர்.

அதே பகுதியில் வசிக்கும் சிலருடன் சேர்ந்து குமார் தனது மனைவியுடன் ஆன்மீக சுற்றுலா சென்று உள்ளார்.

இந்த நிலையில் நேற்று இரவு இவரது வீட்டின் பூட்டை உடைத்து கொள்ளையர்கள் உள்ளே சென்று உள்ளனர்.

பிறகு அங்கிருந்த பீரோவையும் உடைத்து நகை-பணத்தை கொள்ளையடித்தனர்.

இதே போல அதே பகுதியில் ராஜமாணிக்கம் என்பவர் வசித்து வருகிறார். காவலாளியான இவர் நேற்று இரவுவேலைக்கு சென்று விட்டார்.

அப்போது இவரது வீட்டின் பூட்டை உடைத்து உள்ளே சென்ற மர்ம ஆசாமிகள் அங்கு பெட்டியில் வைக்கப்பட்டு இருந்த ரூ.950-ஐ திருடினர்.

இது பற்றி தகவல் கிடைத்ததும் சூரம்பட்டி போலீசார் சம்பவ இடத்துக்கு சென்று விசாரணை நடத்தினர்.

கைரேகை நிபுணர்களும் சம்பவ இடத்துக்கு சென்று அங்கு பதிவாகி இருந்த தடயங்களை பதிவு செய்தனர்.

குமார், ராஜமாணிக்கம் ஆகியோரின் வீடுகளில் கொள்ளைடித்தவர்கள் ஒரே கும்பலை சேர்ந்தவர்கள் என்று கூறப்படுகிறது.

இது குறித்து சூரம்பட்டி போலீசார் வழக்குப்பதிவு செய்து விசாரணை நடத்தி வருகிறார்கள்.