கடலூர்

பண்ருட்டி:

பண்ருட்டி அருகே உள்ள திருவாமூர் பகுதியை சேர்ந்தவர் சீனிவாச ரெட்டியார். இவருக்கு சொந்தமான நிலத்தில் ஏராளமான சவுக்குமரங்கள் இருந்தன.

நேற்று மாலை சவுக்குமரங்களுக்கு மேலே சென்ற மின்கம்பிகள் உரசியதால் தீப்பொறி பறந்தன. இதனால் அந்த மரங்கள் தீ பிடித்து எரிந்தது. 2 ஏக்கர் நிலப்பரப்பில் இருந்த சவுக்குமரங்கள் எரிந்து சாம்பலாகின.

இதேபோல் அதே பகுதியில் உள்ள அருணாசலம் என்பவருக்கு சொந்தமான சவுக்குமரங்களிலும் தீ பற்றியது. சிறிது நேரத்தில தீ அந்த பகுதி முழுவதும் பரவியது. இதில் அங்கிருந்த 2 ஏக்கர் நிலப்பரப்பில் உள்ள சவுக்குமரங்கள் எரிந்து சேதமடைந்தன.

இதுகுறித்து பண்ருட்டி தீயணைப்பு படைக்கு தகவல் தெரிவிக்கப்பட்டது. தீயணைப்பு நிலைய அதிகாரி செந்தில்குமார் தலைமையில் தீயணைப்பு படை வீரர்கள் விரைந்து வந்து தீயை அணைத்தனர். தீ விபத்தில் ரூ.10 லட்சம் சேதம் ஏற்பட்டுள்ளது.

இதுகுறித்து காடாம்புலியூர் போலீசில் புகார் செய்யப்பட்டது. போலீசார் விசாரணை நடத்தி வருகின்றனர்.

நெய்வேலி:

நெய்வேலி 2-வது சுரங்கத்தில் ஒப்பந்த தொழிலாளர்களின் பணி நாட்கள் குறைக்கப்பட்டதை கண்டித்து உள்ளிருப்பு வேலை நிறுத்தம், பிக்அப் வாகனத்தை மறித்தல் உள்ளிட்ட போராட்டங்களில் இன்று காலை ஈடுபட்டனர்.

என்.எல்.சி. 2-வது சுரங்கத்தில் நியூ சர்போஸ் பெஞ்ச் பிரிவை சேர்ந்த 208 தொழிலாளர்கள், லிக்னைட் பெஞ்ச் பிரிவை சேர்ந்த 52 தொழிலாளர்கள், ஒப்பந்த தொழிலாளர்களாக வேலை பார்த்து வருகின்றனர்.

தங்களுக்கு வழங்கப்பட்டிருந்த பணி நாட்கள் ஏற்கனவே குறைக்கப்பட்டன. இந்நிலையில், தற்போது மீண்டும் 7 தினங்கள் குறைப்பதற்கான நடவடிக்கையை சுரங்க நிர்வாகம் மேற்கொண்டுள்ளது. இதைஅறிந்த தொழிலாளர்கள் போராட்டத்தில் குதித்தனர்.

இன்று காலை முதலாவது (ஷிப்ட்)பணிக்கு சென்றவர்கள் பணிகள் ஏதும் செய்யாமல், உள்ளிருப்பு வேலை நிறுத்தத்தில் ஈடுபட்டனர். பின்னர் அவர்கள் சுரங்கத்திற்கு தொழிலாளர்களை ஏற்றிச் செல்லும் வாகனங்களை மறித்து போராட்டத்தில் ஈடுபட்டனர்.

தகவல் அறிந்த மனித வளத்துறை பொது மேலாளர் ஞானசேகரன், அங்கு விரைந்து வந்தார். போராட்டத்தில் ஈடுபட்டுள்ள தொழிலாளர்களிடம் சமரச பேச்சு வார்த்தை நடத்தினார்.

பிரச்சினை குறித்து சுரங்க அதிகாரிகளுடன் பேச்சுவார்த்தைக்கு ஏற்பாடு செய்வதாகவும், பின்னர் பணிநாட்கள் தொடர்பான வி‌ஷயத்தில் ஆக்கப்பூர்வமான நடவடிக்கை மேற்கொள்ள உறுதி அளித்ததன் பேரில் போராட்டத்தினை கைவிட்டனர்.

இதனால் இன்று காலை இரண்டாவது சுரங்கத்தில் பரபரப்பான சூழ்நிலை நிலவி வருகிறது.

கடலூர்:

சிதம்பரம் அருகே உள்ள குமராட்சி பகுதி கல்யாணி நகரை சேர்ந்தவர் கணேசன்(வயது 45) விவசாயி. இவர் நேற்று வீட்டில் குடும்பத்தினருடன் தூங்கிக்கொண்டிருந்தார். நள்ளிரவு 1 மணியளவில் அவரது வீட்டின் முன்பக்க கதவை யாரோ தட்டுவதுபோல் இருந்தது.

இதனால் அதிர்ச்சி அடைந்த கணேசன் வீட்டிலிருந்து வெளியே வந்து பார்த்தார். அப்போது வீட்டின்முன் 7 அடி நீளமும், 500 கிலோ எடையும் முள்ள முதலை படுத்து கிடந்தது.

அந்த வழியாக காரில் வந்த சிலரும் ராட்சத முதலையை பார்த்து திடுக்கிட்டனர். இந்த தகவல் அந்த பகுதி முழுவதும் பரவியது. அனைவரும் முதலையை பார்த்தனர்.

இதுகுறித்து சிதம்பரம் வனத்துறையினருக்கு தகவல் தெரிவிக்கப்பட்டது. அவர்கள் அங்கு விரைந்து வந்தனர். வீட்டுமுன் கிடந்த முதலையை பிடிக்க முயன்றனர். ஆனால் அது அவர்கள் கையில் சிக்காமல் அங்குமிங்கும் ஓடியது.

2 மணிநேரம் போராடி முதலையை வனத்துறையினர் மடக்கி பிடித்தனர். பின்னர் முதலையை வக்காரமாரி குளத்தில் கொண்டு விட்டனர். அதன் பின்னர் பொதுமக்கள் நிம்மதி பெருமூச்சு விட்டனர். இதுகுறித்து பொதுமக்கள் கூறியதாவது:-

சிதம்பரம் அருகே உள்ள வக்காரமாரி நீர்த்தேக்கத்தில் ஏராளமான முதலைகள் உள்ளன. இந்த குளத்தில் தற்போது தண்ணீர் வற்றி வருகிறது. இதனால் குளத்தில் உள்ள முதலைகள் அங்கிருந்து வெளியேறி கால்வாய் மற்றும் குளங்கள் வழியாக ஊருக்குள் வருகின்றன.

கணேசனின் வீட்டின் அருகில் உள்ள பெரியவாய்க்கால் சேறும், சகதியுமாய் உள்ளது. அங்கிருந்து வந்த முதலைதான் பொதுமக்களை பயமுறுத்தி உள்ளது. வக்காரமாரி குளத்தில் இருந்து வெளியேறும் முதலைகள் சிதம்பரத்தின் பல்வேறு பகுதிகளில் அடிக்கடி பொதுமக்களை கடித்து குதறி வருகிறது.

இதனால் உயிர்பலி ஏற்படும் அபாயம் நீடிக்கிறது. பொதுமக்கள் இரவில் நேரங்களில் ரோட்டில் நடந்து செல்ல அஞ்சுகின்றனர். முதலை பீதியினால் பொதுமக்கள் இரவு தூங்காமல் தவிக்கும் சூழ்நிலை ஏற்பட்டுள்ளது.

எனவே வக்காரமாரி குளத்தில் அதிக அளவு தண்ணீர் தேக்க வேண்டும். அங்கிருந்து முதலைகள் வெளியேறாத வண்ணம் நடவடிக்கை எடுக்க வேண்டும். அப்போதுதான் முதலை பீதி நீங்கும்.

இவ்வாறு அவர்கள் கூறினார்கள்.