ரூ.2 கோடியில் நூலகத்துடன் கூடிய அறிவுசார் மையம் - கலெக்டர் தகவல்

மயிலாடுதுறை:

மயிலாடுதுறை மாவட்டத்தில் தருமபுரம் சாலை ராஜன் தோட்டத்தில் ரூ.2 கோடி செலவில் கலைஞர் நகர்புற மேம்பாட்டு திட்டம் நூலகத்துடன் கூடிய அறிவுசார் மையம் பணிகள் நடைபெற்று வருகின்றன என மாவட்ட  கலெக்டர் லலிதா  தெரிவித்தார்.

அவர் மேலும் கூறியதாவது,



இதே திட்டம் மயிலாடுதுறை மாவட்டத்திற்குட்பட்ட வைத்தீஸ்வரன் கோவில் பேரூராட்சி பகுதியில் ரூ.2 கோடி மதிப்பில் வர உள்ளது. ஞானாம்பிகை அரசு மகளிர் கலைக்கல்லூரி அருகில் அமைந்துள்ளது. இதில் சுமார் 2000-க்கும் மேற்பட்ட மாணவிகள் பயின்று வருகின்றனர். அறிவுசார் மையம் 5000 ச.அடி பரப்பளவில் அமையவுள்ளது.

தரைத்தளம் மற்றும் முதல்தளம் போன்ற வசதிகளுடன் அமையவுள்ளது. மாணவிகள் தங்களின் எதிர்காலத்தை திறம்பட அமைத்திட இந்நூலகத்துடன் கூடிய அறிவுசார் மையம் பயனுள்ளதாக இருக்கும். அருகிலுள்ள பள்ளி, கல்லூரி மாணவ, மாணவிகளுக்கும் பல்வேறு வகையில் இத்திட்டம் உதவிகரமாக இருக்கும்.

இந்த அறிவுசார் மையத்தில் மாணவ, மாணவிகள், சிறுவர்கள், பொதுமக்கள் படிக்கும் அறைகள், இணையதள வசதியுடன் கூடிய கணினி அறை, கணினி உபகரணங்கள் மூலம் பயிற்சி வழங்கும் அறை, சிறுவர்கள் விளையாட வசதிகள், போன்ற வசதிகளுடன் இங்கு அமைய உள்ளது. மேலும் மயிலாடுதுறை மாவட்டத்திற்கு புதிய திட்டங்கள் விரைவில் வர உள்ளன. இவ்வாறு அவர் கூறினார்.

அப்போது நகராட்சி பொறியாளர் சனல்குமார், ஒப்பந்ததாரர் உத்திராபதி ஆகியோர் உடனிருந்தனர்.