கணினி மூலம் மின்னணு வாக்குப்பதிவு எந்திரங்கள் தேர்வு

புதுக்கோட்டை:

புதுக்கோட்டை மாவட்டத்தில் நடைபெறவுள்ள நகர்ப்புற உள்ளாட்சி தேர்தல் வாக்குச் சாவடிக்கான, மின்னனு வாக்குப்பதிவு எந்திரத்தினை கணினி மென்பொருள் மூலமாக தேர்வு செய்யும் இரண்டாம் ஆம் கட்டப்பணி நடைபெற்றது.

மாவட்ட தேர்தல் பார்வையாளர் டாக்டர்.மோனிகாராணா, மாவட்ட தேர்தல் அலுவலர் மற்றும் மாவட்ட கலெக்டர் கவிதா ராமு ஆகியோர் அலுவலர்கள் மற்றும் அனைத்து கட்சி பிரதிநிதிகள் முன்னிலையில் மாவட்ட கலெக்டர் அலுவலகத்தில் மேற்கொண்டனர்.

புதுக்கோட்டை மாவட்டத்தில் உள்ள 8 பேரூராட்சிகளில் அமைக்கப்பட்டுள்ள 121 வாக்குச்சாவடிகளுக்கு 146 மின்னணு வாக்குப்பதிவு எந்திரங்களும், இரண்டு நகராட்சிகளில் அமைக்கப்பட்டுள்ள 159 வாக்குச்சாவடிகளுக்கு 191 மின்னணு வாக்குப் பதிவு எந்திரங்களும் என மொத்தம் 337 மின்னணு வாக்குப்பதிவு எந்திரங்களும் ஒதுக்கீடு செய்யப்பட்டது. 

அதனைத்தொடர்ந்து, 28.01.2022 முதல் 04.02.2022 வரை வேட்புமனுதாக்கல் நடைபெற்று, வேட்பு மனுக்களை  ஆய்வு  செய்து, 07.02.2022  அன்று  இறுதி வேட்பாளர் பட்டியல் வெளியிடப்பட்டதை தொடர்ந்து, வாக்குச்சாவடி மையங்களுக்கு தேவையான மற்றும் கூடுதல் மின்னனு வாக்குப்பதிவு எந்திரங்களை வாக்குச்சாவடி மையங்களுக்கு ஒதுக்கீடு செய்யும் பணியை மாவட்ட தேர்தல் பார்வையாளர் டாக்டர். மோனிகா ராணா, மாவட்ட தேர்தல் அலுவலரும், கலெக்டருமான கவிதா ராமு ஆகியோர் அலுவலர்கள் மற்றும் அனைத்துக் கட்சி பிரதிநிதிகள் முன்னிலையில் மேற்கொண்டனர்.

அதன்படி, புதுக்கோட்டை மாவட்டத்தில் தேர்தல் நடைபெறும் 189 வார்டுகளில் 2 வார்டுகளில் போட்டியின்றி வேட்பாளர்கள் தேர்ந்தெடுக்கப்பட்டதை தொடர்ந்து, மீதமுள்ள 187 வார்டுகளுக்கு தேவைப்படும் 278 மற்றும் கூடுதல் இருப்புடன் 57 என மொத்தம் 335 மின்னனு வாக்குப்பதிவு எந்திரங்கள் ஒதுக்கீடு செய்யப்பட்டது.