வத்திராயிருப்பு:
வத்திராயிருப்பில் இருந்து கூமாப்பட்டி செல்லும் சாலையில் பெரியகுளம் கண்மாய் அமைந்துள்ளது. இந்த கண்மாயை நம்பி 800-க்கும் மேற்பட்ட ஏக்கரில் விவசாயிகள் விவசாயம் செய்து வருகின்றனர். மேற்கு தொடர்ச்சி மலைப்பகுதியில் பெய்த தொடர் மழையின் காரணமாக இந்த கண்மாய் முழு கொள்ளளவை எட்டியது. இதனால் விவசாயிகள் சாகுபடி செய்து கோடை அறுவடையை முடித்தனர்.
இந்த ஆண்டு பருவமழை இன்னும் தொடங்காத சூழ்நிலையில் கண்மாயில் உள்ள தண்ணீர் முழுவதும் குறைந்து வறண்டு போய் உள்ளது. இதுகுறித்து அப்பகுதி விவசாயிகள் கூறியதாவது:-
வத்திராயிருப்பு மற்றும் அதன் சுற்றுவட்டார பகுதிகளில் உள்ள மக்கள் எண்ணற்ற பேர் விவசாயத்தை நம்பி தான் பிழைத்து வருகிறோம். பாசனத்திற்கு தேவையான தண்ணீர் கிணற்றில் இருந்தாலும் கை கொடுப்பது கண்மாய்களில் உள்ள தண்ணீர் தான்.
பெரியகுளம் கண்மாயை நம்பி நிறைய பேர் விவசாய பணிகளை மேற்கொண்டு வருகிறோம். இந்தநிலையில் தற்போது இந்த கண்மாயில் தண்ணீர் இன்றி வறண்டு காணப்படுகிறது.
முதல் போக நெல் நடவிற்கு போதுமான தண்ணீர் கிணறுகளில் இருப்பதால் நெல் நாற்று நடவு பணியை தொடங்கியுள்ளோம். பருவமழை இன்னும் தொடங்கவில்லை. எனவே தற்போது விவசாய பணியினை கிணற்றுப்பாசனம் மூலம் மேற்கொண்டு வருகிறோம். ஆனால் பருவமழை பெய்து நீர்நிலைகளிலும், கண்மாய்களிலும் தண்ணீர் வந்தால் மட்டுமே இந்த ஆண்டு தண்ணீர் பற்றாக்குறை இன்றி நெல் விவசாய பணியினை தொடர்ந்து மேற்கொள்ள முடியும்.
இவ்வாறு அவர்கள் கூறினர்.
