சீர்காழி:
மயிலாடுதுறை மாவட்டம் சீர்காழி அருகே நெப்பத்தூர் கிராமத்தில் தனியார் செங்கல் சூளையில் பணியாற்றி வந்த நிம்மேலி கிராமத்தை சேர்ந்த தொழிலாளி சீனிவாசன்(40) கடந்த 17-ம் தேதி செங்கல் சூளை வளாகத்தில் மர்மமான முறையில் சடலமாக தூக்கில் தொங்கினர். இவரது சாவில் மர்மம் இருப்பதாகக்கூறி உறவினர்கள் மற்றும் கிராமமக்கள் மறியலில் ஈடுப்பட்டனர்.
கடந்த 18ம் தேதி நடைபெற இருந்த சீனிவாசனின் உடற் கூறாய்வை உறவினர்கள் தடுத்து, உள்ளூர் மருத்துவர்களை கொண்டு உடற்கூறாய்வு செய்யக்கூடாது. பாதிக்கப்பட்ட தரப்பிலிருந்து வீடியோ பதிவு மற்றும் வழக்குரைஞரை உள்ளே அனுமதிக்கவேண்டும் எனக்கூறி தொடர் உள்ளிருப்பு போராட்டத்தில் ஈடுப்பட்டனர்.
எனினும் இந்த கோரிக்கை சுகாதாரத்துறையினரால் ஏற்கபடாததால் சீனிவாசனின் உடற்கூறாய்வு பணி நிறுத்திவைக்கப்பட்டிருந்தது. இந்நிலையில் ஏப்19ம் தேதியும் அதே கோரிக்கையை வலியுறுத்தி உள்ளிருப்பு போராட்டம் தொடர்ந்தது. இந்நிலையில் திங்கள்கிழமை சீனிவாசனின் உறவினர், கிராமமக்கள் சிலர் மயிலாடுதுறை கலெக்டர் இரா.லலிதாவை சந்தித்து, உடற்கூறு ஆய்வு தொடர்பாக மனு அளித்தனர்.
இந்நிலையில் நேற்று பிற்பகல் சீனிவாசனின் சடலத்தை உடற்கூறு ஆய்வு செய்திட முடிவு எட்டப்பட்டது. ஆர்.டி.ஓ நாராயணன் முன்னிலையில்,அரசு தரப்பு வீடியோ பதிவு கொண்டு உடற்கூறுஆய்வு செய்யப்பட்டது.முன்னதாக பாதிக்கப்பட்டவர்கள் தரப்பு கோரிக்கையை ஏற்று 3அரசு மருத்துவர்கள் உடற்கூறு ஆய்வை பார்வையிட்டனர். உடற்கூறு ஆய்வு தொடங்குவதற்கு முன்னர் இறந்த சீனிவாசனின் மனைவி மற்றும் உறவினர்கள் சடலத்தை பார்வையிட அனுமதி அளிக்கப்பட்டது.
அதன்பின்னர் உடற்கூறு ஆய்வு செய்யப்பட்டது.ஆனால் உடற்கூறு ஆய்வு முடிந்தவுடன் உறவினர்கள் பிரேதத்தை வாங்க மறுத்தனர். சீனிவாசன் மர்ம சாவு தொடர்பாக கொலை முயற்சி வழக்கை,கொலை வழக்காக மாற்றி பதிவு செய்திடவேண்டும் என வலியுறுத்தினர்.உடற்கூறு ஆய்வு முடிவுகள் வந்தவுடன் தான் மேற்கண்ட முடிவு எட்டப்படும் என தெரிவிக்கப்பட்டதால், சீனிவாசனன் உடலை வாங்க உறவினர்கள் மறுத்ததால் உடல் அரசு மருத்துவமனை பிணவறையில் வைக்கப்பட்டது.
இந்நிலையில் கிராமமக்கள் சிலர் காவல்நிலையம் முன்பு திரண்டதால் பரபரப்பு ஏற்பட்டது. இந்த சம்பவங்களால் சீர்காழி அரசு மருத்துவமனை மற்றும் நகரில் டி.எஸ்.பி யுவபிரியா தலைமையில் போலீஸ் பாதுகாப்பு போடபட்டுள்ளது.
