அதிமுக- திமுக நேருக்குநேர் மோதும் ஓசூர் தொகுதி கண்ணோட்டம்

அதிமுக சார்பில் எஸ். ஜோதி பாலகிருஷ்ணரெட்டி, திமுக சார்பில் ஒய். பிரகாஷ், மக்கள் நீதி மய்யம் சார்பில் மசூத், நாம் தமிழர் கட்சி சார்பில் கீதாலட்சும், அமமுக சார்பில் எம். மாரு கவுடு ஆகியோர் நிறுத்தப்பட்டுள்ளனர்.

1. கையிருப்பு- ரூ. 45,000

2. அசையும் சொத்து- ரூ. 47,27,114

3. அசையா சொத்து- ரூ. 2,61,86,100

1. கையிருப்பு- ரூ. 90,900

2. அசையும் சொத்து- ரூ. 83,21,265

3. அசையா சொத்து- ரூ. 6,85,00,760

தமிழக கர்நாடக மாநில எல்லையில் கிருஷ்ணகிரி மாவட்டத்தில் ஓசூர் சட்டமன்ற தொகுதி உள்ளது. ஒசூர் மாநகரத்தில் அமையப் பெற்றுள்ள இரண்டு சிப்காட் தொழில் பேட்டைகளில் கனரக வாகனங்கள் தயார் செய்யும் அசோக் லேலண்ட் தொழிற்சாலை, இருசக்கர வாகனங்கள் தயார் செய்யும் டி.வி.எஸ். தொழிற்சாலை மற்றும் உலகத்தரம் வாய்ந்த டாடா கம்பெனியின் டைட்டன் வாட்ச் மற்றும் நகைகள் செய்யும் தொழிற்சாலைகள் உள்ளன.

இதுதவிர 3 ஆயிரத்திற்கும் மேற்பட்ட பலவகையான மக்கள் பயன்பாட்டிற்குரிய பொருட்களை உற்பத்தி செய்யும் தொழிற்சாலைகளும் உள்ளன. இந்த தொழிற்சாலைகளை நம்பியுள்ள 2 ஆயிரத்திற்கும் மேற்பட்ட சிறு குறு தொழில் நிறுவனங்களும் உள்ளன. இந்த தொழிற்சாலைகளில் சுமார் 2 லட்சத்துக்கும் அதிகமான தொழிலாளர்கள் பணியாற்றி வருகின்றனர்.

ஒசூர் சட்டமன்ற தொகுதியில் கர்நாடகா மாநிலம் நந்தி மலையில் உற்பத்தியாகி தமிழகத்தில் கிருஷ்ணகிரி, தருமபுரி, திருவண்ணாமலை, விழுப்புரம், கடலூர் ஆகிய மாவட்ட விவசாய நிலங்களை வளம் கொழிக்க செய்யும் தென்பெண்ணை ஆறு ஒடுகிறது.

ஒசூர் மாநகரத்தில் மலைக்கோயில் என்று அழைக்கப்படும் 800 ஆண்டுகளுக்கு முன்பு கட்டப்பட்ட ஸ்ரீமரக தாம்பாள் உடனுறை ஸ்ரீசந்திர சூடேஸ்வரர் சிவன் கோவில் அமைந்துள்ளது. இங்கு ஒரே நேர்கோட்டில் உலகில் எங்கும் காணக்கிடைக்காத சிவன், விஷ்ணு மற்றும் பிரம் மன் ஆகிய கோவில்கள் 3 மலைகளில் அமைந்துள்ளன.

ஒசூர் பகுதி காய்கறிகள், கீரைகள் மற்றும் மலர்கள் உற்பத்தியில் சிறந்து விளங்குகிறது. இங்கு விளையும் தக்காளி, பீன்ஸ், கேரட், உருளைகிழங்கு, முட்டை கோஸ், பூகோசு, பீட்ரூட், முள்ளங்கி உள்ளிட்ட காய்கறிகள் தமிழகத்தின் பல்வேறு பகுதிகளுக்கும், கர்நாடகா, கேரளா, ஆந்திரா உள்ளிட்ட அண்டை மாநிலங்களுக்கும் ஏற்றுமதி செய்யப்படுகிறது. 

அதேபோல மலர்கள் உற்பத்தியில் இங்கு விளையும் ரோஜா மலர்கள் உலகத்தரம் வாய்ந்தவையாகும், அதேபோல கார்னேசன், ஜெர்பரா உள்ளிட்ட அலங் கார மலர்களும் ரோஜாவை போல அதிக அளவில் உற்பத்தி செய்யப்பட்டு மலேசியா, சிங்கப்பூர், உள்ளிட்ட பல்வேறு வெளி நாடுகளுக்கு ஏற்றுமதி செய்யப்பட்டு வருகிறது.

இந்தியாவின் கடை கோடியான கன்னியாகுமரியில் இருந்து காஷ்மீர் வரை செல்லும் முக்கிய தேசிய நெடுஞ்சாலை உள்பட 3 நெடுஞ்சாலைகள் இந்த தொகுதி வழியாக செல்கிறது. இதனால் வாகன போக்குவரத்து மிகுதியான நகரமாக ஒசூர் பார்க்கப்படுகிறது.

சுதந்திர போராட்ட வீரரும், இந்தியாவின் முதல் கவர்னர் ஜெனரலும், தமிழக முதலமைச்சர் உள்ளிட்ட பல பொறுப்புகளை வகித்த மூதறிஞர் ராஜாஜி ஒசூர் அருகேயுள்ள தொரப்பள்ளி அக்ரஹாரம் பகுதியில் பிறந்தவர் என்பது கூடுதல் சிறப்பாக உள்ளது.

ஓசூர் தொகுதியில் ஆண் வாக்காளர்கள் - 1,69,923 பேர் உள்ளனர். பெண் வாக்காளர்கள் - 1,60,807 பேர் உள்ளனர்.மூன்றாம் பாலினத்தவர்கள் - 96 பேர் என மொத்தம் -3,30,826 வாக்காளர்கள் உள்ளனர்.

ஒசூர் சட்டமன்ற தொகுதியில் வாழும் பொது மக்களுக்கு தொழிற்சாலைகளும், விவசாயமுமே முதுகெலும்பாக உள்ளது. நகர் புறங்களில் அதிக அளவு தொழிற்சாலைகள் உள்ளதால் இங்கு அதிக அளவில் தொழிலாளர்கள் வாழ்கின்றனர். நகரை சுற்றியுள்ள கிராமப் பகுதிகளில் அதிக அளவு விவசாயம் நடைபெற்று வருவதால் விவசாயிகள் அதிக அளவில் உள்ளனர்.

இதுதவிர விவசாயம், தொழிற்சாலைகள், கோழி பண்ணைகள், செங்கல் சூளைகள், ஒட்டல்கள் போன்றவற்றில் பணிபுரியும் வடமாநிலத் தவர்களும் நகர் புறங்களிலும் கிராமப்பகுதிகளிலும் வாழ்கின்றனர். விவசாயம், தொழிற்சாலைகள் தவிர கோழிப்பண்ணைகள், செங்கல் சூளைகள், மீன்கள் வளர்ப்பு, கல்குவாரி, கிரானைட் ஏற்றுமதி உள்ளிட்ட தொழில்களும் இங்கு பிரதானமாக உள்ளன.

ஒசூர் சட்டமன்ற தொகுதியானது பழமையான தொகுதியாகும், இந்த தொகுதி மக்கள், 1951 முதல் தற்போது கடைசி தேர்தல் நடைபெற்ற 2019-ம் ஆண்டு வரை 16 சட்டமன்ற உறுப்பினர்களை சட்டமன்றத்திற்கு அனுப்பி உள்ளனர். இந்த தொகுதியில் சுயேட்சை வேட்பாளர்கள் 2 முறையும், சுதந்திரா கட்சி வேட்பாளர்கள் 2 முறையும், காங்கிரஸ் கட்சி வேட்பாளர்கள் 9 முறையும், ஜனதா தள வேட்பாளர் ஒரு முறையும், அ.தி.மு.க. வேட் பாளர் ஒரு முறையும், தி.மு.க. வேட்பாளர் ஒரு முறையும் வெற்றி பெற்றுள்ளனர்.

ஒசூர் சட்டமன்ற தொகுதியில் ஆதி திராவிடர்கள், 13 சதவீதமும், வன்னியர்கள் 12 சதவீதமும், நாயுடு சமுகத்தவர்கள் 11 சதவீதமும், ஒக்கலிகா சமூகத்தை சேர்ந்தவர்கள் 10 சதவீதமும், இதர வகுப்பினர் 54 சதவீதமும் வாழ்கின்றனர். 

ஒசூர் சட்டமன்ற தொகுதியில் 2016-ம் ஆண்டு நடைபெற்ற சட்டமன்ற பொதுத்தேர்தலில் பால கிருஷ்ணா ரெட்டி வெற்றி பெற்றார். கடைசியாக ஒசூர் சட்டமன்ற தொகுதியில் 2019 ம் ஆண்டு நடைபெற்ற சட்டமன்ற இடைத்தேர்தலில் தி.மு.க. வேட்பாளர் சத்யா வெற்றி பெற்றார். 

தொகுதி மக்களின் முக்கிய பிரச்சனையான குடிநீர் தேவைகள் இன்றளவும் முழுமையாக பூர்த்தி செய்யப்படவில்லை, குறிப்பாக ஒகேனக்கல் கூட்டுக் குடிநீர் திட்டம் தி.மு.க., அ,தி.மு.க. ஆட்சி காலத்தில் கொண்டு வரப்பட்டது என இரண்டு கட்சிகளும் மாறி மாறி போட்டி போட்டுக்கொண்டு வருகிறது. இன்றளவும் ஒசூர் நகரப்பகுதி மற்றும் அதனை சுற்றியுள்ள கிராமப் பகுதிகளுக்கு ஒகேனக்கல் கூட்டுக்குடிநீர் திட்டமானது முழுமையாக நிறைவேற்றப்படவில்லை என்ற குற்றச்சாட்டு உள்ளது.

அதேபோல ஒசூர் மாநகரின் நிலத்தடி நீர் மட்டத்தை உயர்த்த பழமையான 140 ஏக்கர் பரப்பளவில் உள்ள ஒசூர் ராமநாயக்கன் ஏரியில் தெண்பெண்ணை ஆற்று தண்ணீரை கொண்டு வந்து சேமிக்கும் திட்டம் முழுமையாக நிறைவேற்றப்படவில்லை, இந்த திட்டத்தையும் ஒசூர் பகுதியில் உள்ள பொது மக்கள் எதிர்பார்த்து காத்திருக்கின்றனர். இந்த திட்டம் முழுமையாக நிறைவேற்றப்பட்டால் நகர பகுதியில் நிலத்தடி நீர்மட்டம் உயரும் குடிநீர் தேவைகள் பூர்த்தி செய்யப்படும் என எதிர்பார்ப்பு உள்ளது.

ஒசூர் நகர பகுதியில் முக்கிய இடமாக உள்ள மகாத்மா காந்தி சாலை, நேதாஜி சாலை, தாலுக்கா அலுவலக சாலை, ஏரித்தெரு, பழைய பெங்களுர் சாலை உள்ளிட்ட இடங்களில் அதிக அளவில் போக்குவரத்து நெரிசல் காணப்பட்டு வருகிறது. இதனை தவிர்க்க முழுமையாக இந்த பகுதிகளை ஒரு வழிப் பாதையாக மாற்ற வேண்டும், போக்குவரத்தை ஒழுங்குபடுத்த கூடுதல் போக்கு வரத்து காவலர்களை நியமிக்க வேண் டும் என பொதுமக்கள், வாகன ஒட்டிகள் எதிர்பார்த்துள்ளனர்.

மேலும், ஒசூர் பகுதியில் மத்தியஅரசு அறிவித்தபடி விரைவில் உதான் திட்டத்தில் விமான போக்குவரத்தை கொண்டுவர வேண்டும் என பொது மக்களும், தொழில் முதலீட்டாளர்களும் எதிர் பார்த்துள்ளனர். அதேபோல பல ஆண்டு கோரிக்கையான பாதாள சாக்கடை திட்டத்தையும் ஒசூர் பகுதியில் செயல்படுத்த வேண்டும் என மக்கள் எதிர்பார்க்கின்றனர்.

1952 முனிரெட்டி (சுயே).

1957 அப்பாவு பிள்ளை (சுயே).

1962 ராமசந்திரரெட்டி (காங்)

1967 வெங்கடசாமி (சுதந்திரா கட்சி).

1971 வெங்கடசாமி  (சுதந்திரா கட்சி).

1977 ராமசந்திரரெட்டி (காங்).

1980 வெங்கடரெட்டி (காங்).

1984 வெங்கட்ட ரெட்டி (காங்).

1989 ராமசந்திரரெட்டி (காங்).

1991 மனோகரன்  (காங்).

1996 வெங்கட்டசாமி  ஜனதா தளம்

2001 கோபிநாத் (காங்).

2006 கோபிநாத்  (காங்).

2011 கோபிநாத் (காங்).

2016 பாலகிருஷ்ணரெட்டி  (அ.தி.மு.க.)

2019 இடைத்தேர்தல்- சத்யா (தி.மு.க.)