சிதம்பரம் தொகுதி கண்ணோட்டம்

கே.ஏ. பாண்டியன்

1. கையிருப்பு- ஒரு லட்சம் ரூபாய்

2. அசையும் சொத்து- ரூ. 63,03,722.71

3. அசையா சொத்து- ரூ, 1,21,50,000

அப்துல் ரகுமான்

1. கையிருப்பு- ரூ. 15,000

2. அசையும் சொத்து- ரூ. 26,874

3. அசையா சொத்து- ரூ. 32,00,000

கடலூர் மாவட்டத்தில் உள்ள 9 சட்டப்பேரவைத் தொகுதிகளில் சிதம்பரம் சட்டப்பேரவைத் தொகுதி சிறிய தொகுதியாக விளங்குகிறது. சிதம்பரம் நடராஜர் கோவில், அண்ணாமலைப் பல்கலைக்கழகம், பிச்சாவரம் சுற்றுலாவனப்பகுதி, பரங்கிப்பேட்டை பாபா கோவில் அடங்கிய சுற்றுலா தலமாக சிதம்பரம் தொகுதி திகழ்கிறது. இந்த பகுதியில் பெரும்பான்மையான மக்கள் விவசாயத்தை நம்பி வாழுகின்றனர்.

சிதம்பரம் தொகுதியில் ஏற்கனவே புவனகிரி தொகுதியில் இருந்த கிள்ளை பேரூராட்சி மற்றும் பரங்கிப்பேட்டை ஒன்றிய முழுவதும் சேர்க்கப்பட்டுள்ளது. ஏற்கனவே சிதம்பரம் தொகுதியில் இருந்த ஸ்ரீமுஷ்ணம் பேரூராட்சி, காட்டுமன்னார்கோவில் சட்டப்பேரவை தொகுதிக்கு மாற்றம் செய்யப்பட்டுள்ளது.

தற்போது சிதம்பரம் நகராட்சி, அண்ணாமலைநகர், பரங்கிப்பேட்டை, மற்றும் கிள்ளை பேரூராட்சிகளையும், பரங்கிப்பேட்டை ஒன்றியம் முழுவதையும், குமராட்சி ஒன்றியத்தில் 21 ஊராட்சிகள், மேலபுவனகிரி ஒன்றியத்தில் 7 ஊராட்சிகளையும் உள்ளடக்கி இத்தொகுதி உருவாக்கப்பட்டுள்ளது.

சிதம்பரம் தொகுதியில் வன்னியர்கள், ஆதிதிராவிடர்கள் அதிகளவில் வசித்து வருகின்றனர். சிதம்பரம் தொகுதிக்கு உட்பட்ட பரங்கிப்பேட்டை பகுதியில் இஸ்லாமியர்கள், மீனவர்கள் உள்ளிட்ட சமூகத்தினரின் வாக்குகள் கணிசமாக உள்ளது.

சிதம்பரம் சட்டசபை தொகுதியில் 1952 முதல் நடைபெற்ற சட்டசபைத் தேர்தலில் காங்கிரஸ் கட்சி 5 முறையும், தி.மு.க. 4 முறையும், அ.தி.மு.க. 4 முறையும், தா.மா.க. 1 முறையும், மார்க்சிஸ்ட் கம்யூனிஸ்டு கட்சி 1 முறையும் வென்றுள்ளது. 

சிதம்பரம் தொகுதியில் அண்ணாமலைப் பல்கலைக்கழகமும், நடராஜர் ஆலயமும், பிச்சாவரம் சுற்றுலா மையமும் பிரதானமாக விளங்குகிறது. பெரும்பாலான மக்கள் விவசாயத்தை தொழிலாக கொண்டுள்ளனர்.

சிதம்பரம் சட்டமன்ற தொகுதி குமராட்சி ஊராட்சி ஒன்றியத்தில் பெராம்பட்டு- திட்டுகாட்டூர் இடையே ரூ.20 கோடி மதிப்பில் உயர்மட்ட பாலம் கட்ட வேண்டும் என்ற பொதுமக்களின் 50 ஆண்டுகால கோரிக்கை நிறைவேற்றபட்டுள்ளது. 

தமிழ்நாடு அரசின் புவியியல் மற்றும் கனிம அறக்கட்டளை நிதியில் இருந்து ரூ.19.50 கோடி நிதி ஒதுக்கி மேற்கண்ட பெராம்பட்டு &திட்டுகாட்டூர் கிராமங்களை இணைக்கும் சுமார் 500 மீட்டர் நீளத்திற்கு உயர்மட்ட பாலம் வேலை தற்போது நடைப்பெற்று வருகின்றது.

மேலும் சிதம்பரம் பகுதி வேளாண் மக்களின் நீண்ட நாள் கோரிக்கையான கொள்ளிடம் ஆற்றில் கடல் நீர் உட்புகுதலை தடுக்கும் வகையில் திருக்கழிப்பாலை கிராமத்தில் தடுப்பணை அமைப்பதற்கு நில அளவை பணிகளுக்காக ரூ.1 கோடி நிதி ஒதுக்கப்பட்டுள்ளது.

சிதம்பரம் தொகுதி குமராட்சி ஊராட்சி ஒன்றியத்தில் அகரநல்லூர் கிராமத்தில் பழைய கொள்ளிடம் ஆற்றின் குறுக்கே ரூ.10 கோடி மதிப்பில் கனிம வள நிதியில் இருந்து தடுப்பணை கட்டும் பணிகள் நடைபெற்று வருகிறது.

அதைபோல் அக்கரை ஜெயங்கொண்டபட்டினம் கிராமத்தில் கொள்ளிடம் ஆற்றின் கரையில் ரூ.15 கோடி மதிப்பில் தடுப்பு சுவர் அமைக்கும் பணிகள் விரைவில் தொடங்கப்பட உள்ளது.

சிதம்பரம் தொகுதி பிச்சாவரம் கிராமத்தில் கடல் நீர் உட்புகுதலை தடுக்க உப்பனார் வடிகாலின் குறுக்கே கடைமடையில் ரூ.15 கோடி மதிப்பில் ஒழுங்கியம் கட்டும் பணிகள் நடைப்பெற்று வருகின்றது.

சிதம்பரம் பகுதியில் பல்வேறு திட்டங்கள் நிறைவேற்றபட்ட போதிலும் இந்த பகுதியில் தொழிற்சாலைகள் எதுவும் இல்லாதததால் பொருளாதாரத்தில் பின்தங்கிய நிலையில் உள்ள தொகுதியாக திகழ்கிறது. எனவே அந்த பகுதியில் தொழிற்சாலைகள் நிறுவ வேண்டும் என அந்த பகுதியில் உள்ள பொதுமக்கள் கோரிக்கை விடுத்துள்ளனர்.

மொத்தம்- 2,50,735

ஆண்கள்- 1,22,800

பெண்கள்- 1,27,913

திருநங்கைகள்- 22

1962 சிவசுப்பிரமணியன் (இந்திய தேசிய காங்கிரஸ்)

1967 ஆர்.கனகசபை பிள்ளை (இந்திய தேசிய காங்கிரஸ்)

1971 பொன்.சொக்கலிங்கம் (தி.மு.க.)

1977 துரை.கலியமூர்த்தி (தி.மு.க.)

1980 கே.ஆர்.கணபதி (அ.தி.மு.க.)

1984 கே.ஆர்.கணபதி (அ.தி.மு.க.)

1989 துரை.கிருஷ்ணமூர்த்தி (தி.மு.க.)

1991- கே.எஸ்.அழகிரி (இந்திய தேசிய காங்கிரஸ்))

1996 கே.எஸ்.அழகிரி (த.மா.கா.)

2001 துரை. கி.சரவணன் (தி.மு.க.)

2006 ஏ.அருண்மொழிதேவன் (அ.தி.மு.க.)

2011 கே.பாலகிருஷ்ணன் (மார்க்சிஸ்ட் கம்யூ.)

2016 கே.ஏ. பாண்டியன் (அ.தி.மு.க.)