மேல்மலையனூர் அருகே அம்மன் கோவில்களில் சாகை வார்த்தல் விழா

மேல்மலையனூர் அருகே கீழ்செவளாம்பாடி கிராமத்தில் பழமையான மாரியம்மன், பொன்னியம்மன், கங்கையம்மன் ஆகிய கோவில்கள் உள்ளன. இக்கோவில்களில் ஆண்டுதோறும் ஆடித்திருவிழா 3 நாட்கள் நடைபெறுவது வழக்கம்.

அதன்படி இந்தாண்டுக்கான திருவிழா கடந்த 25-ந் தேதி காப்பு கட்டுதலுடன் தொடங்கியது. தொடர்ந்து சாமிக்கு சிறப்பு பூஜை நடைபெற்றது. விழாவில் நேற்று முன்தினம் சாகை வார்த்தல் நிகழ்ச்சி நடைபெற்றது. இதையொட்டி சாமிக்கு சிறப்பு அபிஷேக, ஆராதனை நடைபெற்றது. பின்னர் மதியம் மேளதாளம் முழங்க 3 பூங்கரகங்கள் முன் செல்ல பக்தர்கள் கூழ் குடங்களை சுமந்தபடி கோவிலுக்கு சென்றனர். தொடர்ந்து அங்கு சாகை வார்த்தல் நடைபெற்றது.

பின்னர் பக்தர்களுக்கு பிரசாதம் வழங்கப்பட்டது. இரவு சாமி வீதிஉலா நடைபெற்றது. இதற்கான ஏற்பாடுகளை விழாக்குழுவினர் மற்றும் கிராம மக்கள் செய்திருந்தனர்.