அலங்காநல்லூரில் பிரசித்தி பெற்ற ஸ்ரீ முத்தாலம்மன், முனியாண்டி சுவாமி, அய்யனார், கருப்புசாமி கோவில் பங்குனி மாத உற்சவ விழா நடைபெற்றது. ஐந்து நாட்கள் நடக்கும் இந்த திருவிழாவில் கடந்த 30-ந் தேதி இரவு முத்தாலம்மன், முளைப்பாரியுடன் நகர்வலம் வந்து பக்தர்களுக்கு அருள்பாலித்தார். இதில் ஏராளமான பக்தர்கள் முளைப்பாரி எடுத்து வந்து தங்களது நேர்த்திக்கடனை செலுத்தினர்.
தொடர்ந்து 2-ம் நாள் திருவிழாவான நேற்று முன்தினம் அலங்காநல்லூர் மற்றும் அதன் சுற்றுவட்டார கிராமங்களுக்கு காவல் தெய்வமான முனியாண்டி சுவாமி குதிரை வாகனத்தில் மேளதாளம் முழங்க தீவட்டி பரிவாரங்களுடன் பவனி வந்தார். இதனைத் தொடர்ந்து 3-ம் நாள் திருவிழாவான நேற்று முனியாண்டி சுவாமிக்கு பக்தர்கள் கிடாய் வெட்டி நேர்த்திக் கடனை செலுத்தினர். பின்னர் அய்யனார், கருப்புசாமி புறப்பாடு நிகழ்ச்சி நடைபெற்றது.
இன்று 4-ம் நாள் திருவிழாவில் சுவாமிகள் எழுந்தருளி சென்றுஇருப்பிடம் சேருகிறது. 5-ம் நாள் திருவிழாவாக நாளை 3-ந் தேதி மதியம் 2 மணிக்கு எருதுகட்டு விழா நடைபெறுகிறது. இத்துடன் இந்த திருவிழா நிறைவு பெறுகிறது. இதற்கான ஏற்பாடுகளை விழா குழுவினர் அலங்காநல்லூர் கிராம பொதுமக்கள் செய்திருந்தனர்.
