இஸ்லாம்

யமன் நாட்டின் ஒரு நகரத்தின் ஆட்சியாளரான அப்ரஹா, மக்காவில் உள்ள கஅபாவிற்கு மக்கள் குவிவதைப் பொறுக்க முடியாமல், அதனைத் தகர்க்க யானைப் படையைத் திரட்டிக் கொண்டு மக்காவிற்குச் சென்றான். மக்காவின் தலைவர்களில் ஒருவரான அப்துல் முத்தலிப்பை சந்தித்தபோது, அவர் தமது ஒட்டகத்தைத் திரும்பக் கேட்டார் தவிர, கஅபாவை இடித்துவிடாதீர்கள் என்ற கோரிக்கையை வைக்கவில்லை. காரணம் அவர் திடமாக இறைவனை நம்பினார். ‘இறை இல்லத்தை’ அல்லாஹ்வே காத்துக் கொள்வான் என்று அப்ரஹாவிடம் சொல்லியதோடு அல்லாஹ்விடம் கஅபாவை காக்கும்படி பிரார்த்தித்தார்.

ஒட்டகத்தைத் திரும்பப் பெற்றுக் கொண்டு மக்கா நகரத்திற்குத் திரும்பிய அப்துல் முத்தலிப் அவர்கள், மக்களிடம் பாதுகாப்பான இடத்திற்குச் சென்றுவிடும்படி உத்தரவிட்டார்.  

மறுநாள் காலையில் தம் படைகளோடு அப்ரஹா மக்கா நகரத்திற்குள் நுழைந்தான். பயிற்சியளிக்கப்பட்ட யானைகளோடு கஅபாவை நெருங்கினான். மக்களைக் கொலை செய்வதோ, மக்களுக்கு இடையூறு தருவதோ அப்ரஹாவின் நோக்கமாக இல்லை. மாறாக, கஅபாவை அழிக்க வேண்டுமென்ற ஒரே குறிக்கோளோடு வந்தவன் யானைகளுக்கு ஆணையிட்டான்.

யானைகளை முன்னேறச் சொன்னான். பயிற்சியளிக்கப்பட்ட யானைகள் முன்னேறிச் சென்று, மிக வேகமாக கஅபாவின் அருகில் வந்து அமர்ந்து கொண்டன. படை வீரர்களும் யானைப்பாகர்களும் யானைகளை எழுந்து நிற்கும்படி அடித்துத் துன்புறுத்தினர். யானைகள் இறைவனின் கட்டளைக்கு அடிபணிந்து கஅபாவை முற்றுகையிட மறுத்தன. யானைகள் எழுந்து நின்றாலும் இறை இல்லத்தை எதிர்கொள்ளவில்லை. படுத்திருந்த தலைமை யானை நிற்க மறுத்தது.

“யானைகளை விட்டொழியுங்கள், படைவீரர்களே நாமே கஅபாவை தகர்ப்போம்” என்ற அப்ரஹாவின் கட்டளையின்படி வீரர்கள் முன்னேறினர். அப்போது திடீரென்று மேகம் சூழ்ந்தது போலிருந்தது. அப்ரஹாவும் படைவீரர்களும் மழையை எண்ணி மேலே பார்த்தனர். ஆனால் அவர்கள் கண்டதை அவர்களால் நம்ப முடியவில்லை, அது மழை மேகமல்ல, கோடிக் கணக்கான கருநிற அபாபீல் பறவைகள்.

ஒவ்வொரு பறவையின் அலகிலும், இரு கால்களிலும் சுடப்பட்ட பொடிக் கற்கள் இருந்தன.  வானத்திலிருந்து அப்பொடிக் கற்களை, படைகள் மீது பறவைகள் எறிந்தன. மழைபோல் விழுந்த கற்கள் மேனியின் மேல் பட்டவுடன் படைவீரர்கள் சுருண்டு கீழே விழுந்து வைக்கோல்களின் சக்கைபோல்  மடிந்தனர்.

ஆங்காங்கே மறைந்திருந்த மக்காவாசிகள் குரைஷியினர் இக்காட்சியைக் கண்டு திகைத்தனர். கஅபாவை தாக்க வந்த பெரும்படையோடு ஒப்பிடும் போது பறவைகள் மிகச் சிறிய உயிரினம். ஆயினும், எண்ணிக்கையில் அதிகமாக இருந்ததாலும், அல்லாஹ்வின் அருளாலும் அதனைக் கொண்டு எதிர்த்து, அன்று இறை இல்லம் காப்பாற்றப்பட்டது.

யமனுக்குத் திரும்பிய பிறகு கொடுங்கோல் ஆட்சியாளரான அப்ரஹாவை அல்லாஹ் அழித்தொழித்தான்.

ஹிஜ்ராவை அடிப்படையாகக் கொண்டு இஸ்லாமிய ஆண்டு முறையை அமல்படுத்தும் வரை, அரேபியர்கள் இந்த நிகழ்ச்சியினை `யானைகளின் ஆண்டு` என்று காலக்கணக்கை வைத்திருந்தனர்.

திருக்குர்ஆன் 105:1-5

- ஜெஸிலா பானு

யமன் நாட்டில் ஒரு நகரத்தை ஆட்சி செய்து வந்த அப்ரஹா என்பவன் மக்காவில் அமைந்துள்ள கஅபாவின் மீது பொறாமை கொண்டான். இப்ராஹிம் (அலை) மற்றும் இஸ்மாயீல் (அலை) அவர்கள் சொல்லித் தந்து போயிருந்த அதே வழிமுறையைப் பல தலைமுறைகளுக்குப் பிறகும் மக்கள் தொடர்ந்து கடைப்பிடித்து `ஹஜ்` செய்து வருவதை வெறுத்தான் அப்ரஹா.

மக்காவில் உள்ள கஅபாவிற்குக் குவியும் மக்களைத் தம் பக்கம் திருப்ப எண்ணித் திட்டம் தீட்டினான். தன் நகரத்தில் மிகுந்த வேலைப்பாடுகள் நிறைந்த அழகிய வடிவமைப்பில் ஒரு பிரமாண்டமான தேவாலயத்தை எழுப்பினான். மக்களைக் கவரும் வகையில் அந்த ஆலயத்தை விலை மதிப்பற்ற கற்களைக் கொண்டு நிறுவினான். கண்கவர் வண்ணங்களைத் தீட்டி அதன் அழகைக் கூட்டினான். மக்களும் அங்குச் செல்ல ஆரம்பித்தனர். அந்த ஆலயத்தைக் கண்டு வியந்தனர். அதனைச் சுற்றிப் பார்த்து வர்ணித்தனர். ஆனாலும், யமனுக்கு ஆலயத்தைப் பார்க்கச் சென்றவர்களும் மக்காவிலுள்ள கஅபாவிற்கே யாத்திரை சென்று `ஹஜ்` செய்தனர்.

மக்கள் மக்காவிற்குச் சென்று ஹஜ் செய்யக் கூடாதென்பதற்காகவே பிரமாண்ட ஆலயத்தை எழுப்பியிருந்த கெட்ட குணம் கொண்ட அப்ரஹா, மக்கள் `ஹஜ்` செய்வதையும் கஅபாவிற்குத் தொடர்ச்சியாகச் செல்வதையும் தடுத்து நிறுத்த முடியாததை எண்ணி மனம் வெதும்பினான்.

நேரடியாக மக்காவிற்குப் படையெடுத்துச் சென்று கஅபாவை இடித்துவிட வேண்டுமென்று முடிவெடுத்தான். அதற்கான படைகளைத் திரட்டினான். அவன் படை தயார் நிலையில் இருந்தது. படைவீரர்கள் தேவையான ஆயுதங்களையும் ஒட்டகங்களையும் மக்காவாசிகளிடமிருந்தே வாங்கி, தங்கள் படைக்கு பலம் சேர்த்திருந்தனர். படையில் சேர்க்கப்பட்ட ஒட்டகங்கள் மக்காவைச் சேர்ந்த அப்துல் முத்தலிபிற்குச் சொந்தமானது.

மக்காவை நோக்கிப் படையுடன் நகர்ந்தான் அப்ரஹா. அந்தப் படையில் மிகப் பெரிய யானையும் இருந்தது. மக்காவிற்கு அருகில் மாபெரும் கூடாரம் அமைத்து, தம் படையினரோடு தங்கியிருந்தான் அப்ரஹா. மக்காவின் முக்கியத் தலைவரோடு தாம் பேச வேண்டுமென்று அழைப்புவிடுத்திருந்தான் அப்ரஹா.

மக்காவின் தலைவராக விளங்கிய அப்துல் முத்தலிப் இன்னும் இரண்டு தலைவர்களுடன் அப்ரஹாவை சந்தித்தார்கள். அவர்களைப் பார்த்ததும் இனம் புரியாத மரியாதையோடு மிகப் பவ்யமாக நடந்து கொண்டான் அப்ரஹா. தன்னிடமிருப்பதிலிருந்து ஏதேனும் அவர்களுக்கு வேண்டுமா என்று அப்ரஹா கேட்டான்.

அதற்கு அப்துல் முத்தலிப் “தங்களின் படை வீரர்கள் என்னுடைய இருநூறு ஒட்டங்களை எடுத்துச் சென்றுவிட்டனர். அதனைத் திருப்பிக் கொடுத்துவிடுங்கள்” என்று கேட்டார். அதைக் கேட்டு மிகுந்த ஆச்சர்யத்துடன் அப்ரஹா, “அவ்வளவுதானா? நான் நீங்கள் உங்கள் மக்களின் நலம் விரும்பி என்று உங்களைத் தவறாக நினைத்துவிட்டேன். நான் கஅபாவை அழிக்க வந்துள்ளேன், நீங்கள் அதனைக் காக்க வந்தவராகத் தெரியவில்லை, மாறாக உங்கள் ஒட்டகங்களை அல்லவா கேட்கிறீர்கள்?” என்று ஏளனமாகப் பேசினான்.

அதற்கு அப்துல் முத்தலிப் அவர்கள் “நான் ஒட்டகங்களின் உரிமையாளர், அதனைக் காக்கும் பொறுப்பு எனக்குள்ளது. அதனால்தான் நான் எனக்குரியதை மட்டும் கேட்கிறேன். கஅபா என்பது ‘இறை இல்லம்’ அதற்கான உடைமைக்குரியவன் அல்லாஹ். அவன் அதனைக் காத்துக் கொள்வான், எல்லாவற்றையும் பார்த்துக் கொள்வான்” என்று உறுதி்பட யாரும் எதிர்பார்த்திராத பதிலைத் தந்தார்.

வாயடைத்த அப்ரஹா ஒட்டகங்களை அப்துல் முத்தலிப்புக்குத் திருப்பித் தந்துவிட்டான்.

- ஜெஸிலா பானு

'அரப்’ என்ற சொல்லுக்குப் பாலைவனம், புற்பூண்டு முளைக்காத வறட்சியான இடம் எனப் பொருள் வருகிறது. அந்தக் காலத்திலேயே அரேபிய தீபகற்பத்தில் இருந்தவர்களை ‘அரப்’ ‘அரபி’ என்றே அழைக்கப்பட்டார்கள்.

இன்றைய சவூதி அரேபியாவான அந்த இடத்தின் மேற்கே செங்கடலும், கிழக்கே அரேபிய வளைகுடாவும், வடக்கே சிரியா என்னும் ஷாம் தேசம், வட-கிழக்கில் ஈராக், தெற்கே அரபிக் கடல் இந்தியப் பெருங்கடல் வரையிலும் பரந்துள்ளது.

புவியியல் ரீதியாக மிகவும் முக்கியத்துவம் வாய்ந்ததான இந்த அமைப்பின் காரணமாகவே அரேபிய தீபகற்பத்தை வெளிநாட்டவர்கள் ஆதிக்கம் செலுத்த முடியாதபடி இருந்தனர். அப்படியே ரோம்- பாரசீகம் வல்லரசுகள் அரேபிய தீபகற்பத்தில் ஆதிக்கம் செலுத்த முடியாதபடியே அப்பகுதியின் புவியியல் அமைப்பு அமைந்திருந்தாலும், அரேபியர்களுக்குள்ளே ஏற்பட்ட உள்நாட்டு குழப்பங்களையும், சண்டைகளையும் பயன்படுத்தி ரோமானியர்களும் பாரசீகர்களும் அங்கு சில பகுதிகளைக் கைப்பற்றினர்.

ஆப்பிரிக்கா, ஐரோப்பியா, ஆசியா என்று எல்லாக் கண்டங்களும் கடல் வழியாக அரேபிய தீபகற்பத்துடன் இணைவதால் அப்பகுதி பண்பாடு, கலை மற்றும் வியாபாரப் பரிமாற்றங்களின் மையமாக இருந்து வந்தது.

அவர்கள் ஒற்றுமையின்றிப் பலவாறாகப் பிரிந்து வாழ்ந்தனர். அல்லாஹ்வை நினைக்காமல், நன்றி செலுத்தாமல் பாவங்கள் புரிந்தனர். மிகப் பெரிய வெள்ளப்பிரளயம் ஏற்பட்டு நகரங்கள் சேதம் அடைந்ததால் மக்கள் பல இடங்களுக்குச் சென்று குடியேறினர்.

ஈஸா (அலை) அவர்களின் காலத்திற்குப் பிறகும், அவர்கள் போதித்துச் சென்ற ஏகத்துவத்தைப் பின்பற்றி ஓரிறைக் கொள்கையில் இருந்தவர்களின் மீது யமன் நாட்டை ஆட்சி செய்த யூதக் கொடுங்கோல் மன்னனின் ஆணையின் பேரில் தாக்குதல் நடந்தது. அவர்களை அக்கொள்கையைக் கைவிடும்படி யூதர்கள் வற்புறுத்தினர். இறைவன் ஒருவனே என்று துதித்துக் கொண்டிருந்த கிறிஸ்தவர்களை யூதர்கள் அகழிகளைத் தோண்டி, அதில் நெருப்புக் குண்டத்தை வளர்த்து, அதனுள் அவர்களை உயிருடன் போட்டு எரித்தனர்.

இதைக் கேள்விப்பட்ட மற்ற நாட்டில் இருக்கும் கிறிஸ்தவர்கள் ரோமானிய அரசர்களின் ஆதரவுடன் யமன் நாட்டை முற்றுகையிட்டனர். ஆப்பிரிக்க நாடான ஹபஷாவின் பொறுப்பில் இருந்த அர்யாத் என்பவர் மிகச் சாமர்த்தியமாக யமன் நாட்டைக் கைப்பற்றினார். அர்யாத்தின் தளபதிகளில் ஒருவனான அப்ரஹா மிகத் தந்திரமாக அர்யாத்தையே கொலை செய்துவிட்டுப் பொறுப்பில் அமர்ந்தான்.

யமனின் ஒரு நகரத்தை தமது கட்டுப்பாட்டில் வைத்திருந்த அப்ரஹா, மக்காவில் கஅபாவிற்கு மக்கள் குவிவதும், இப்ராஹிம் (அலை) மற்றும் இஸ்மாயீல் (அலை) அவர்கள் சொல்லித் தந்து போயிருந்த அதே வழிமுறையைப் பல தலைமுறைகளுக்குப் பிறகும் தொடர்ந்து கடைப்பிடித்து `ஹஜ்` செய்தும் வந்தவர்களை வெறுத்தான். மக்காவில் உள்ள கஅபாவிற்குக் குவியும் மக்களைத் தன் பக்கம் திருப்ப எண்ணித் திட்டம் தீட்டினான்.

நயவஞ்சகம் செய்பவர்களுக்கும், பொறாமை கொள்பவர்களுக்கும் வெற்றி கிடைப்பதில்லை.

திருக்குர்ஆன் 25:18, 85:4-7

- ஜெஸிலா பானு.

இஸ்லாம் என்பது ஐந்து தூண்களின் மீது எழுப்பப்பட்டுள்ளதாக நபிகள் நாயகம் (ஸல்) அவர்கள் இவ்வாறு எடுத்துரைக்கிறார்கள்:

‘இஸ்லாம் ஐந்து தூண்களின் மீது (அதன் கூடாரம்) அமைக்கப்பட்டிருக்கிறது. அவை: 1. வணக்கத்திற்குரியவன் அல்லாஹ்வைத் தவிர வேறு எந்தக் கடவுளும் இல்லை. மேலும் முகம்மது நபி (ஸல்) அவர்கள் அல்லாஹ்வின் அடியாராகவும், அவனின் திருத்தூதராகவும் இருக்கிறார்கள் என சாட்சியம் கூறுவது. 2. தொழுகையை தவறாமல் தொழுது வருவது. 3. புனித ரமலானில் நோன்பு நோற்பது. 4. கடமையான ஜகாத்தைக் கொடுத்து வருவது. 5. ஹஜ் செய்வது,

இவ்வாறு நபி (ஸல்) அவர்கள் கூறினார்கள். (அறிவிப்பாளர்: இப்னு உமர் (ரலி), புகாரி, முஸ்லிம்)

மேற்கூறப்பட்ட இஸ்லாமிய அடிப்படையான ஐந்து கடமைகளும், ஐந்துவிதமான தத்துவங்களை எடுத்துரைக்கிறது. அந்த தத்துவங்கள் வருமாறு:-

‘கலிமா’: ‘ஒன்றே குலம்; ஒருவனே தேவன்’ எனும் உயர்ந்த இறை கோட்பாட்டை நினைவு கூர்கிறது.

‘தொழுகை’: ஆடம்பர வாழ்க்கையின் ஆதாரத்தைத் தேடுவதில் இருந்து ஆன்மாவைக் கட்டுப்படுத்தாத வரை தொழுகையை நிறைவு செய்ய முடியாது. தொழுகை ஆன்மாக் கட்டுப்பாட்டை நினைவு கூர்கிறது.

‘ஜகாத்’: சேமித்து வைத்துள்ள பொருளின் மீதுள்ள பற்றைத் துறக்காத வரை ஜகாத்தை நிறைவேற்ற முடியாது. ‘ஜகாத்’ என்பது பணப்பற்றை துறப்பதை நினைவு கூர்கிறது.

‘நோன்பு’: மனோ இச்சைகளைக் கட்டுப்படுத்தாத வரை நோன்பை நோற்க முடியாது. நோன்பு மனக்கட்டுப்பாட்டை நினைவு கூர்கிறது.

‘ஹஜ்’: வீடு, வாசல், மனைவி, மக்கள், நிலபுலன்கள் போன்றவற்றின் ஆசைகளை அடக்கிக் கொள்ளாத வரை ஹஜ்ஜை பூர்த்தி செய்ய முடியாது. ‘ஹஜ்’ என்பது அனைத்துவிதமான ஆசைகளையும் துறந்து விடும் தியாகத்தை நினைவு கூர்கிறது.

இஸ்லாமிய ஐந்து கடமைகளும் ஐந்துவிதமான அம்சங்களை எடுத்துரைத்தாலும் அடிப்படை அம்சமாக உள்ள ‘ஒற்றுமை’யை இதில் வலியுறுத்துகிறது.

‘லாயிலாஹ இல்லல்லாஹ்’ என்று கூறுவதன் மூலம் அனைத்து முஸ்லிம்களும் ஒரே குடையின் கீழ் ஒன்றுபடுகிறார்கள். ‘அல்லாஹ் தான் ஒரே இறைவன்; நாம் அனைவரும் அவனது அடிமைகள்’ என்ற வார்த்தை இனவாதம், நிறவாதம், மொழிவாதம், சாதிவாதம், மதவாதம் போன்ற அனைத்து வெறிகளையும் தவிடு பொடியாக்கி தகர்த்து விடுகிறது.

தொழுகை என்பது அந்தந்த ஊரில் வசிக்கும் மக்களை ஐந்து வேளை ஒன்று திரட்டி, ஒரே அணியாக நிற்பதற்கு பயிற்சி கொடுத்து ஒற்றுமையை மென்மேலும் ஓங்கச் செய்கிறது. தொழுகைக்காக அணி வகுத்து வரிசையாக நிற்கும்போது வெள்ளைத் தோலும், கருப்புத் தோலும், முதலாளியின் காலும், தொழிலாளியின் காலும் ஒன்று சேர்கிறது. ஏழையின் தோளும், பணக்காரரின் தோளும் ஒன்றுபடுகிறது.

“நீங்கள் உங்களின் தொழுகையின் வரிசைகளை சரி சமமாகச் சீர்படுத்திக் கொள்ளுங்கள். இல்லையென்றால், அல்லாஹ் உங்களுக்கு மத்தியில் விரோதத்தையும், குரோதத்தையும் ஏற்படுத்தி விடுவான்” என்று நபி (ஸல்) அவர்கள் கூறினார்கள்.

மக்காவில் ஹஜ்ஜுக்காக ஒன்று கூடும்போது, புனித ஹரமும், அரபா மைதானமும், முஸ்தலிபா எனும் திடலும், மினா எனும் பரந்த கூடாரங்களும் அனைத்து நாட்டவரையும், அனைத்து நிறத்தவரையும், அனைத்து மொழியினரையும் ஒன்று திரட்டி உலக மகா ஒற்றுமையை ஒவ்வொரு ஆண்டும் புனித ஹஜ் ஏற்படுத்தி பிரமிக்க வைக்கிறது. இத்தகைய ஒற்றுமையைத்தான் முஸ்லிம்களையும் தாண்டி அகில உலக மக்களிடமும் இஸ்லாம் எதிர்நோக்குகிறது.

“நிச்சயமாக உங்கள் சமுதாயம் (வேற்றுமை ஏதுமில்லா) ஒரே சமுதாயம்தான். மேலும் நானே உங்கள் இறைவன்; ஆகையால் என்னையே நீங்கள் வணங்குங்கள்” என்கிறது திருக்குர்ஆன். (21:92)

“படைப்பினங்கள் அனைத்தும் இறைவனின் குடும்பம் ஆகும்” என்று நபி (ஸல்) அவர்கள் கூறினார்கள். (அறிவிப்பாளர்: அனஸ் (ரலி)

கலிமாவில் இருந்து ஹஜ் வரைக்கும் ஊர் ஒற்றுமையில் இருந்து உலக ஒற்றுமை வரைக்கும் போதிக்கிறது. இஸ்லாம் கூறும் ஒற்றுமை என்பது ஒரு மதம் சார்ந்த ஒற்றுமை இல்லை. அனைத்து மதத்தினரும் ஒன்றுபட்டு வாழும் ஒற்றுமையைத்தான் இஸ்லாம் எதிர்பார்க்கிறது.

இதையே திருக்குர்ஆன் வசனங்கள் இவ்வாறு கூறுகிறது:

“மனிதர்களே! உங்கள் இறைவனுக்குப் பயந்து நடந்து கொள்ளுங்கள். அவன் உங்கள் யாவரையும் ஒரே ஆத்மாவில் இருந்து படைத்தான். அவரில் இருந்து அவர் மனைவியையும் படைத்தான். பின்னர் இவ்விருவரில் இருந்து அநேக ஆண்களையும், பெண்களையும் (வெளிப்படுத்தி உலகில்) பரவச் செய்தான்” (4:1).

“மனிதர்களே! நிச்சயமாக நாம் உங்களை ஓர் ஆண், பெண்ணில் இருந்தே படைத்தோம். நீங்கள் ஒருவரையொருவர் அறியும் பொருட்டு பின்னர் உங்களைக் கிளைகளாகவும், கோத்திரங்களாகவும் ஆக்கினோம். உங்களில் எவர் மிகவும் பயபக்தியாளராக உள்ளாரோ அவர்தாம் அல்லாஹ்விடம் மிக்க கண்ணியமானவர். நிச்சயமாக அல்லாஹ் நன்கறிபவன். மிகத் தெரிந்தவன்” (49:13).

“நீங்கள் ஒருவருக்கொருவர் உறவை முறித்துக் கொள்ள வேண்டாம்; ஒருவருக்கொருவர் முதுகைத் திருப்பிக் கொள்ள வேண்டாம்; ஒருவருக்கொருவர் குரோதம் கொள்ள வேண்டாம்; ஒருவருக்கொருவர் பொறாமைப்பட வேண்டாம். அல்லாஹ்வின் அடியார் களாகிய நீங்கள் சகோதரர்களாக ஆகி விடுங்கள்” என்று நபி (ஸல்) அவர்கள் கூறினார்கள்.

மேலும், “ஒரு முஸ்லிம் தமது சகோதரனை மூன்று நாட்களுக்கு மேல் வெறுப்பது அவருக்கு ஆகுமாகாது” என்றும் கூறினார்கள். (அறிவிப்பாளர்: அனஸ் (ரலி) அவர்கள்)

மனிதனுக்கு பலமே ஒற்றுமைதான். ஒன்றுபட்டால் நன்றாக வாழலாம். ஒற்றுமை சீர் குலைந்தால் நிம்மதியாக வாழ முடியாது. உலகம் என்பது வாழ்க்கை களம். இது வாழ்வதற்கு, வீழ்வதற்கு அல்ல. வாழ்வதற்கு வழி ஒற்றுமையில் உள்ளது. வீழ்வதற்கு வழி சண்டை சச்சரவில் உள்ளது.

இஸ்லாத்தின் அனைத்து வழிபாடு முறைகளும் ஒற்றுமையை அடிப்படையாகக் கொண்டுதான் அமைக்கப்பட்டு நிறைவேற்றப்படுகிறது.

இது ஹஜ்ஜுடைய காலம். ஹஜ்ஜின் அனைத்து நடவடிக்கைகளும் ஒற்றுமையை மையமாக வைத்து கடைப்பிடிக்கப்படுகிறது. இத்தகைய ஒற்றுமையை இஸ்லாமிய வணக்க வழிபாடுகளும் குறிப்பாக ஹஜ்ஜும் உலக மக்களுக்குக் கற்றுக்கொடுக்கிறது. முஸ்லிம்கள் அனைவரும் உலகளாவிய ஒற்றுமைக்காக குரல் கொடுக்க வேண்டும்; பாடுபட வேண்டும்.

- மவுலவி அ.செய்யது அலி மஸ்லஹி,

பாட்டப்பத்து, திருநெல்வேலி டவுண்.

ராமநாதபுரம் மாவட்டம் பெரியபட்டணத்தில் மகான் செய்யது அலி ஒலியுல்லாஹ் தர்கா உள்ளது. ஆண்டுதோறும் இங்கு சந்தனக்கூடு திருவிழா வெகு விமரிசையாக நடைபெறும். அதன்படி 115-வது ஆண்டு சந்தனக்கூடு திருவிழா நாளை மாலை கொடியேற்றத்துடன் தொடங்குகிறது.

வரும் 19-ந்தேதி சந்தனக் கூடு திருவிழா, 20-ந்தேதி பகல்கூடு, செப்.30-ந்தேதி கொடியிறக்கத்துடன் விழா நிறைவடைகிறது. இதில் அனைத்து சமூகத்தை சேர்ந்த மக்களும் கலந்து கொள்வதால் மத நல்லிணக்க விழாவாக நடத்தப்படுகிறது.

விழா ஏற்பாடுகளை கமிட்டி தலைவர் செய்யது இபுராம்சா, தொழில் அதிபர் சிங்கம் பஷீர், ஊராட்சி தலைவர் எம்,எஸ்.கபீர், ஊராட்சி துணைத் தலைவர் ராஜேந்திரன், கமிட்டி துணைத் தலைவர்கள் சிராஜ்தீன், சாகுல் ஹமீது, செயலாளர் கவுன்சிலர் அபிபுல்லா, முத்தரையர் நகர் கோவிந்தன், தங்கையா நகர் சுந்தரலிங்கம், சுல்தான், சதக், களஞ்சியம், சாகுல் ஹமீது, கமிட்டி ஒருங் கிணைப்பாளர் அப்துல் மஜீது மற்றும் சுல்தானியா சங்க நிர்வாகிகள் செய்து வருகின்றனர்.