இயேசுவின் திருஇருதய ஆலய திருவிழா இன்று தொடங்குகிறது

நாகர்கோவில், இயேசுவின் திருஇருதய ஆலய திருவிழா இன்று (புதன்கிழமை) தொடங்கி 10-ந் தேதி வரை 5 நாட்கள் நடக்கிறது. இன்று மாலை 6.15 மணிக்கு ஜெபமாலை, புகழ்மாலை, கொடியேற்றம், திருப்பலி நடக்கிறது. நிகழ்ச்சியில் கோட்டார் ஆயர் நசரேன் சூசை தலைமை தாங்கி மறையுரையாற்றுகிறார்.

தொடர்ந்து வருகிற விழா நாட்களில் ஜெபமாலை, நவநாள், திருப்பலி, மறையுரை போன்றவை நடைபெறுகிறது. 8-ந் தேதி காலை 11 மணிக்கு அருட்பணியாளர் ஆன்டனி பென்சிகர் தலைமையில் நோயாளிகளுக்கான திருப்பலி நடக்கிறது.

9-ந் தேதி இரவு 8.30 மணிக்கு அன்பிய ஒருங்கிணையம், பக்த சபை ஒருங்கிணையங்களின் ஆண்டு விழா நடைபெறுகிறது.

விழாவின் இறுதி நாளான 10-ந் தேதி காலை 7.10 மணிக்கு கோட்டார் மறைமாவட்ட முன்னாள் ஆயர் பீட்டர் ரெமிஜியுஸ் தலைமையில் திருவிழா திருப்பலி நடக்கிறது. மாலை 5 மணிக்கு குருசடி பங்குத்தந்தை பிரான்சிஸ் போர்ஜியா தலைமையில் நடைபெறும் திருப்பலியில் அருட்பணியாளர் ஸ்டீபன் மறையுரையாற்றுகிறார். தொடர்ந்து 6.30 மணிக்கு மறைக்கல்வி ஆண்டு விழா, கலை நிகழ்ச்சிகள் நடைபெறுகிறது.

இதற்கான ஏற்பாடுகளை பங்குத்தந்தை ஜான்சன் தலைமையில் பங்கு மேய்ப்புப்பணி பேரவையினர், பங்குமக்கள் செய்துள்ளனர்.