பென் ஸ்டோக்ஸ் அதிரடி சதம்: இங்கிலாந்து 339 ரன்கள் குவிப்பு

புனே:

உலக கோப்பை கிரிக்கெட் தொடரின் 40வது லீக் ஆட்டம் புனேவில் இன்று நடைபெறுகிறது. இதில் இங்கிலாந்து, நெதர்லாந்து அணிகள் மோதின. டாஸ் வென்ற இங்கிலாந்து பேட்டிங் தேர்வு செய்தது.

அதன்படி, இங்கிலாந்து அணி முதலில் களமிறங்கியது. தொடக்க ஆட்டக்காரர் பேர்ஸ்டோவ் 18 ரன்னில் அவுட்டானார். ஜோ ரூட் 28 ரன்னிலும், ஹாரி புரூக் 11 ரன்னிலும், பட்லர் 5 ரன்னிலும், மொயின் அலி 4 ரன்னிலும் ஆட்டமிழந்தனர்.

மற்றொரு தொடக்க ஆட்டக்காரர் டேவிட் மலான் பொறுப்புடன் ஆடி அரை சதமடித்தார். அவர் 87 ரன்னில் வெளியேறினார்.

பென் ஸ்டோக்சுடன், கிறிஸ் வோக்ஸ் ஜோடி சேர்ந்தார். முதலில் நிதானம் காட்டிய இந்த ஜோடி பின்னர் அதிரடியில் மிரட்டியது.

இந்த ஜோடி 7-வது விக்கெட்டுக்கு 129 ரன்கள் எடுத்தது.

பென் ஸ்டோக்ஸ் சதமடித்து அசத்தினார். கிறிஸ் வோக்ஸ் அரை சதம் கடந்தார். பென் ஸ்டோக்ஸ் 84 பந்துகளில் 108 ரன்கள் எடுத்து ஆட்டமிழந்தார்.

இறுதியில், இங்கிலாந்து அணி நிர்ணயிக்கப்பட்ட 50 ஓவரில் 9 விக்கெட் இழப்புக்கு 339 ரன்களை குவித்தது.

இதையடுத்து, 340 ரன்கள் எடுத்தால் வெற்றி என்ற இலக்குடன் நெதர்லாந்து அணி களமிறங்குகிறது.