ஆஸ்திரேலிய அணிக்கு இங்கிலாந்து பதிலடி கொடுக்குமா? ஆஷஸ் 2-வது டெஸ்ட் நாளை தொடக்கம்

லார்ட்ஸ்:

5 டெஸ்ட் கொண்ட ஆஷஸ் தொடரில் விளையாடுவற்காக கம்மின்ஸ் தலைமையிலான ஆஸ்திரேலிய கிரிக்கெட் அணி இங்கிலாந்து சென்றுள்ளது. இரு அணிகள் இடையே பர்மிங்காமில் நடந்த பரபரப்பான முதல் டெஸ்டில் ஆஸ்திரேலியா 2 விக்கெட் வித்தியாசத்தில் வெற்றி பெற்றது.

இங்கிலாந்து-ஆஸ்திரேலியா அணிகள் மோதும் 2-வது ஆஷஸ் டெஸ்ட் போட்டி லண்டன் லார்ட்ஸ் மைதானத்தில் நாளை (28-ந் தேதி) தொடங்குகிறது.

முதல் டெஸ்டில் ஏற்பட்ட தோல்விக்கு பென் ஸ்டோக்ஸ் தலைமையிலான இங்கிலாந்து அணி பதிலடி கொடுக்குமா? என்று ஆவலுடன் எதிர்பார்க்கப்படுகிறது.

பர்மிங்காமில் வெற்றி பெறும் வாய்ப்பை அந்த அணி தவறவிட்டது. கேப்டன் பென் ஸ்டோக்சின் தவறான முடிவு பாதிப்பை ஏற்படுத்தி இருந்தது. இந்த தோல்வியில் இருந்து மீண்டு இங்கிலாந்து இந்த டெஸ்டில் வெற்றி பெற கடுமையாக போராடும்.

இங்கிலாந்து அணியில் ஜோ ரூட், பேர்ஸ்டோவ், ஜேக் கிராவ்லி, பென் ஸ்டோக்ஸ், ஜேம்ஸ் ஆண்டர்சன், ஸ்டூவர்ட் பிராட், ராபின்சன் போன்ற சிறந்த வீரர்கள் உள்ளனர்.

ஆஸ்திரேலிய அணி இந்த டெஸ்டிலும் இங்கிலாந்தை வீழ்த்தி 2-0 என்ற கணக்கில் முன்னிலை பெறும் வேட்கையில் உள்ளது. பேட்டிங்கில் தொடக்க வீரர் உஸ்மான் கவாஜா மிகவும் நல்ல நிலையில் இருக்கிறார். அவர் முதல் டெஸ்டில் முதல் இன்னிங்சில் 141 ரன்னும், 2-வது இன்னிங்சில் 65 ரன்னும் குவித்தார்.

இது தவிர ஸ்டீவன் சுமித், டிரெவிஸ் ஹெட், லபுஷேன், அலெக்ஸ் கேரி, கேமரூன் கிரீன், கேப்டன் கம்மின்ஸ், ஸ்டார்க், ஹாசல்வுட், நாதன் லயன் போன்ற சிறந்த வீரர்களும் உள்ளனர்.

இந்த டெஸ்ட் போட்டி இந்திய நேரப்படி நாளை மாலை 3.30 மணிக்கு தொடங்குகிறது.