மலையாள திரையுலகில் முன்னணி நடிகராக இருப்பவர் பஹத் பாசில். நடிகை நஸ்ரியாவின் கணவரான இவர் தமிழிலும் சிவகார்த்திகேயனின் வேலைக்காரன், விஜய் சேதுபதியுடன் சூப்பர் டீலக்ஸ் போன்ற படங்களில் நடித்துள்ளார். தற்போது மலையாள படங்களில் நடித்து வருகிறார்.
இந்நிலையில், மலையன்குஞ்சு எனும் மலையாள படத்தில் நடித்த போது, நடிகர் பஹத் பாசில் விபத்தில் சிக்கி உள்ளார். அறிமுக இயக்குனர் சஜிமோன் பிரபாகரன் இயக்கத்தில் உருவாகி வரும் இப்படத்தின் படப்பிடிப்பு கொச்சியில் நடைபெற்று வந்தது. அதில் ஸ்டண்ட் காட்சி படமாக்கப்பட்டபோது, நடிகர் பஹத் பாசில் எதிர்பாராத விதமாக கீழே விழுந்து காயமடைந்தார்.
அவரது முகத்தில் பலத்த காயம் ஏற்பட்டத்தையடுத்து, படக்குழுவினர் அவரை உடனடியாக அருகில் உள்ள மருத்துவமனையில் அனுமதித்தனர். அங்கு அவருக்கு சிகிச்சை அளித்த மருத்துவர்கள், சில நாட்கள் ஓய்வெடுக்க அறிவுறுத்தி உள்ளனர். இதனால் மலையன்குஞ்சு படத்தின் படப்பிடிப்பு சில நாட்களுக்கு நிறுத்தி வைக்கப்பட்டுள்ளது.
