ஹரி இயக்கத்தில் சூர்யா நடித்துள்ள ‘சி-3’ படம் ரசிகர்களிடம் வரவேற்பை பெற்றுள்ளது. விஜய்யை இயக்குவது குறித்து ஹரி அளித்த பேட்டி...

“விஜய்யை இயக்கும் விருப்பம் இருக்கிறது. நானும் விஜய்யும் சேர்ந்து படம் பண்ண விரும்புகிறோம். இது மட்டுமல்ல மற்ற ஹீரோக்களுடனும் சேர்ந்து பணிபுரிய ஆசை இருக்கிறது. விஜய்யும் நானும் சேர்ந்து பணியாற்றினாலும், சரியான தயாரிப்பாளர் அமைய காத்திருக்க வேண்டியுள்ளது. எங்கள் இருவர் மீதான எதிர்பார்ப்புக்கு ஏற்ப படம் தயாரிப்பவர்களை எதிர்பார்க்க வேண்டியது இருக்கிறது.

நானும் விஜய்யும் சேர்ந்து படம் பண்ணும் போது தயாரிப்பாளர் மட்டுமல்ல, பிற வி‌ஷயங்களையும் முக்கியமாக பார்க்க வேண்டியது அவசியம். பேச்சு வார்த்தை நடந்து வருகிறது. விரைவில் விஜய்யும் நானும் இணைந்து படம் பண்ணுவோம்” என்றார்.

சசிகலா ஆதரவு அ.தி.மு.க. எம்.எல்.ஏ.க்கள், சென்னை கிழக்கு கடற்கரை சாலை கூவத்தூரில் உள்ள ரிசார்ட்டில் தங்கவைக்கப்பட்டு இருப்பதாக குற்றம்சாட்டப்பட்டு உள்ளது.

நடிகை குஷ்புவும் எம்.எல்.ஏக்கள் கடத்தப்பட்டதற்கு கண்டனம் தெரிவித்து உள்ளார். இதுகுறித்து அவர் தனது டுவிட்டர் பக்கத்தில் கூறியிருப்பதாவது:-

“கடத்தப்பட்டது போல் 131 எம்.எல்.ஏக்களும் சொகுசு பஸ்களில் அழைத்துச் செல்லப்பட்டு இருக்கிறார்கள். நான் அவர்களை பற்றித்தான் யோசிக்கிறேன். ஜனநாயகத்தில் இத்தகைய எம்.எல்.ஏக்களுக்கு மாண்பு ஏதாவது இருக்கிறதா? சிறையில் இருக்கும் குற்றவாளிகள் போல் எம்.எல்.ஏ.க்களை நடத்துகிறார்கள். இப்படி அவர்களை நடத்துவதற்கு இந்தப் பெண்ணுக்கு (சசிகலா) என்ன அதிகாரம் இருக்கிறது?

இவ்வாறு குஷ்பு கூறியுள்ளார்.

தன்னுடைய முதல் படமான ``16 வயதினிலே'' படத்தை விஜயகுமார் பார்க்க வராததால், பாரதிராஜா கோபம் கொண்டார்.  ``தன் படங்களில் நடிக்க அவரை அழைப்பதில்லை'' என்று முடிவு செய்தார்.

ஆனாலும் நீண்ட இடைவெளிக்குப் பிறகு பாரதிராஜா இயக்கிய `கிழக்குச்சீமையிலே' படத்தில் விஜயகுமாரை நடிக்க வைக்க வேண்டிய கட்டாயம் பாரதிராஜாவுக்கு ஏற்பட்டது.

பாரதிராஜாவுடன் தனக்கு ஏற்பட்ட அனுபவங்கள் பற்றி நடிகர் விஜயகுமார் கூறியதாவது:-

``ஜானகி சபதம் படத்தில் அசோசியேட்டாக பணியாற்றிய போதே பாரதிராஜாவின் திறமையை தெரிந்து கொண்டேன். எனக்கும் `வெண்ணிற ஆடை' நிர்மலாவுக்குமான பாடல் காட்சியை எப்படி எப்படி எடுத்தால் சிறப்பாக அமையும் என்று பாரதிராஜா விலாவாரியாக என்னிடம் விவரித்தபோது, ``இவர் சினிமாவில் உயர்ந்த இடத்தைப் பிடிப்பார்'' என்பதை உணர்ந்து கொண்டேன்.

படத்தின் தயாரிப்பாளர் கே.ஆர்.ஜி.யிடம், பாடல் காட்சி பற்றிய பாரதிராஜாவின் அற்புதமான கற்பனை பற்றி நான் கூறியபோது அவரும் ஆச்சரியப்பட்டார். அப்போது நான் பிஸியாக இருந்த நிலையிலும், ``மறுபடியும் அந்தப் பாடல் காட்சியை எடுப்பதாக இருந்தால் கால்ஷீட் தருகிறேன். அதோடு பாடல் காட்சிக்கு தேவையான பிலிம் செலவையும் நானே ஏற்றுக் கொள்கிறேன்'' என்று கே.ஆர்.ஜி.யிடம் கூறினேன்.

ஆனால் கே.ஆர்.ஜி., அதற்கு உடன்படவில்லை ``மறுபடியும் படப்பிடிப்பு நடத்த நேரம் இல்லை'' என்று கூறி விட்டார்.

அந்தப் படம் ரிலீசான ஒரு சில மாதங்களில், `16 வயதினிலே' படத்தை பாரதிராஜா இயக்குவதாக செய்திகள் வந்தன. நான் குடும்பத்துடன் தேனாம்பேட்டை எல்லையம்மன் காலனியில் குடியிருந்து வந்தேன். பாரதிராஜாவும் அதே எல்லையம்மன் காலனியில்தான் தன் குடும்பத்தை குடி வைத்திருந்தார். நான் படப்பிடிப்புக்கு காரில் புறப்படும்போதோ, இரவில் திரும்பி வரும்போதோ பெரும்பாலும் பாரதி என் பார்வையில் படுவார். ஒரு சில வினாடிகள் நலம் விசாரித்துக் கொள்வோம்.

இப்படி நான் பிஸியாக படங்களில் நடித்துக் கொண்டிருந்த நிலையில், ஒருநாள் காலையில் படப்பிடிப்புக்கு புறப்பட்டேன். கார் புறப்பட்டு தெருமுனையைக் கடந்த போது திடீரென காரை கைகாட்டி நிறுத்தச் சொன்னார், பாரதி.

கார் நின்றதும், ``என்ன பாரதி? என்ன விஷயம்?'' என்று கேட்டபடி இறங்கினேன்.

``16 வயதினிலே என்று ஒரு படம் இயக்கியிருக்கிறேன். இன்று மாலை படத்தின் சிறப்புக் காட்சி இருக்கிறது. அவசியம் நீங்கள் வந்து படத்தை பார்த்து கருத்து சொல்ல வேண்டும்'' என்றார், பாரதி.

நான் அவரிடம், ``படப்பிடிப்பு சீக்கிரம் முடிந்து விட்டால், நிச்சயம் வந்து விடுவேன். தவிர்க்க முடியாமல் படப்பிடிப்பு நீண்டு போனால் மட்டும் வர முடியாமல் போய் விடும், எனவே, வர முடியாவிட்டால் தவறாக நினைத்துக் கொள்ளாதீர்கள்'' என்று சொன்னேன்.

ஆனால், சொல்லி வைத்த மாதிரி அன்றைய படப்பிடிப்பு இரவு 9 மணி வரை நீண்டு விட்டது. இதனால் பாரதிராஜா படத்தின் `பிரிவிï' காட்சிக்கு போக முடியவில்லை.

அதற்குப் பிறகு அந்த விஷயத்தை நான் மறந்து விட்டேன். ஆனால் பாரதிராஜா மறக்காமல் இருந்திருக்கிறார். 16 வயதினிலே படத்தின் மூலம் தமிழ் சினிமாவில் ஒரு மறுமலர்ச்சியையும், கதைப்புரட்சியையும் உருவாக்கி, மிகப் பெரிய இயக்குனர் என்ற அந்தஸ்துக்கு வந்து விட்டார். தொடர்ந்து `கிழக்கே போகும் ரெயில்'', ``சிகப்பு ரோஜாக்கள்'', ``நிறம் மாறாத பூக்கள்'' என்று, அவர் இயக்கத்தில் வெளி வந்த எல்லாமே வெற்றிப் படங்களாயின.

நானும் அவர் வளர்ச்சியில் பெருமைப்பட்டேன். நான் பிஸியாக இருந்ததால் அவர் படங்களில் நடிக்க என்னை அழைக்காததை ஒரு விஷயமாகவும் எடுத்துக் கொள்ளவில்லை.

இப்படி வருஷங்கள் ஓடிக் கொண்டிருந்த நேரத்தில் தயாரிப்பாளர் `கலைப்புலி' தாணு சார், பாரதிராஜா இயக்கத்தில் ``கிழக்குச் சீமையிலே'' என்ற படத்தை தயாரிக்கவிருந்தார். அண்ணன் - தங்கையின் பாசப் பிணைப்பு தான் கதையின் முடிச்சு என்பதால் அண்ணன்- தங்கை கேரக்டர்களில் யார் யாரைப் போடலாம் என்று தாணு சார் பாரதிராஜாவிடம் ஆலோசித்திருக்கிறார்.

தங்கை கேரக்டரில் நடிக்க ராதிகா முடிவானார்.

இந்நிலையில், `கலைப்புலி' தாணு சாரிடம் இருந்து எனக்கு போன் வந்தது. `கிழக்குச் சீமையிலே' என்று ஒரு படம் தயாரிக்கிறேன், பாரதிராஜா டைரக்டு செய்கிறார். அண்ணன்- தங்கை இடையேயான அளப்பரிய பாசம்தான் கதை. அண்ணன் கேரக்டர் சிவாஜி சார் பண்ணக்கூடிய அளவுக்கு வலுவானது. நீங்கள் நடித்தால் சிறப்பாக இருக்கும் என்று பாரதிராஜாவிடம் சொன்னேன். அவரோ ``முடியாது. நான் இயக்கும் படங்களில் அவரைப் போடுவதில்லை'' என்று கூறி விட்டார். காரணம் கேட்டேன். அதற்கு அவர், ``நான் முதன்முதலாக இயக்கிய ``16 வயதினிலே' படத்தின் `பிரிவிï' காட்சியை பார்க்க  வருந்தி அழைத்தும் வராமல் இருந்து விட்டார். அப்போதே நான் இயக்கும் படங்களில் அவரை நடிக்க வைக்கக்கூடாது என்று தீர்மானித்து விட்டேன்'' என்றார்.

பாரதிராஜா என்ற பெரிய கலைஞனுக்குள் இப்படியொரு குழந்தையா? எனக்குள் அந்த நேரத்தில் ஆச்சரியம் தான் தலைதூக்கியது. ``நானே போய் பாரதியை பார்த்து பேசுகிறேன் சார்!'' என்று தாணுவிடம் கூறி விட்டேன்.

நேராக பாரதிராஜா வீட்டுக்கு போனேன். என்னைப் பார்த்ததும் அவருக்கு புரிந்து விட்டது. என்றாலும் இயல்பாக வரவேற்றுப் பேசினார்.

``ஒரு பிஸி நடிகரின் அன்றாட நாட்கள் கூட அவனுக்கு சொந்தமில்லை என்பதை உங்கள் திரைவாழ்விலும் பார்த்திருப்பீர்களே'' என்று பேச்சின் இடையே கூறினேன். பாரதியிடம் நெகிழ்ச்சி தெரிந்தது. `கிழக்குச் சீமையிலே' படத்தில் நான் அண்ணன் ஆனது இப்படித்தான். அண்ணன்- தங்கை பாசத்தை மையமாக கொண்ட அந்தப் படம் பெரிய வெற்றி பெற்றது.''

இவ்வாறு கூறினார், விஜயகுமார்.

பாரதிராஜா விஜயகுமாரை இத்தோடு விட்டு விடவில்லை. அடுத்து அவர் இயக்கிய ``அந்தி மந்தாரை'' படத்திலும் அவரை நடிக்க வைத்தார். சிறந்த படத்துக்கான மத்திய அரசு விருது அப்படத்துக்கு கிடைத்தது. தமிழக அரசு அவருக்கு சிறந்த நடிகருக்கான சிறப்புப் பரிசை வழங்கி கவுரவப்படுத்தியது.

ஆனாலும் விஜயகுமாருக்கு மத்திய அரசின் சிறந்த நடிகர் விருது கிடைக்காததில் பாரதிராஜாவுக்கு ரொம்பவும் வருத்தம்.

அதுபற்றி விஜயகுமார் கூறியதாவது:-

``மதுரையில் நடந்த படவிழாவில் எனக்கு மத்திய அரசின் விருது கிடைக்காத வேதனையை பாரதிராஜா பகிர்ந்து கொண்டார். ``இந்தப் படத்துக்கு மத்திய அரசு விருது கிடைத்த மாதிரி, படத்தில் அற்புதமாக நடித்த விஜயகுமாருக்கும் விருது கிடைத்திருக்க வேண்டும். ஆனால் அந்த வாய்ப்பு நழுவிப் போய் விட்டது. என்றாலும் நிச்சயம் என் வாழ்நாளில் நான் இயக்கி அவர் நடிக்கும் படத்தில் அவருக்கு தேசிய விருது பெற்றுத் தந்தே தீருவேன்'' என்று உணர்ச்சிமயமாய் பேசினார்.

பாரதிராஜா என் நடிப்பு மீது வைத்த இந்த நம்பிக்கையை விடவா எனக்கு விருது பெரிது? அப்போதே தேசிய விருது பெற்றதை விட அதிக சந்தோஷம் அடைந்தேன்''

இவ்வாறு விஜயகுமார் கூறினார்.

இரண்டு உலகத்தில் வாழ்ந்து வந்த நடிகை ஆரம்பத்தில் இஞ்சி இடுப்பழகியாக வலம் வந்தார். ஆனால், ஒருகட்டத்தில் தன்னுடைய நடிப்பில் தன்னுடைய அர்ப்பணிப்பு அதிகமாக இருக்கவேண்டும் என்று நினைத்த நடிகை, அந்த படத்துக்காக தனது உடல் எடையை அதிகரித்தார். ஆனால், எந்த நேரத்தில் அவர் உடல் எடையை ஏற்றினாரோ, அதற்குபின் அவரால் அந்த உடல் எடையை குறைக்கவே முடியவில்லை.

இவர் உடல் எடையை ஏற்றி நடித்த அந்த படமும் எதிர்பார்த்த அளவுக்கு அவருக்கு கைகொடுக்கவில்லை. அப்போதைக்கு பெரிய பட்ஜெட்டுடன் உருவாகிவந்த பிரம்மாண்ட படத்தின் இரண்டாம் பாகத்தில் நடிக்கவும் நடிகைக்கு அவசர அழைப்பு வந்ததால், தடபுடலாக தனது உடல் எடையை குறைக்கும் முடிவில் களமிறங்கினார்.

அதன்பிறகு, அந்த பிரம்மாண்ட படத்தின் போஸ்டர் ஒன்று வெளியிடப்பட்டது. அதில், அந்த நடிகை ரொம்பவும் ஒல்லியாக முன்பு இருந்ததுபோல் காட்சியளித்தார். அதைப் பார்த்தது ரசிகர்கள் அனைவருக்கும் திருப்தியை கொடுத்தது. இந்நிலையில், அந்த நடிகை நடித்த படம் ஒன்று சமீபத்தில் வெளியாகியுள்ளது.

இதில் அந்த நடிகையின் தோற்றம், தற்போது வெளியிடப்பட்டுள்ள போஸ்டருக்கு நேருக்கு மாறாக இருக்கிறதாம். உடல் எடையை கூட்டி ஆன்ட்டி நடிகை போல் தோற்றமளித்தவர், தற்போது இந்த படத்தில் ஆன்ட்டிக்கு அக்கா மாதிரியான தோற்றத்தில் இருக்கிறாராம். இவருடைய தோற்றத்தை பார்த்துதான் இந்த படத்தின் இயக்குனரே அவருக்கு சில காட்சிகள் வைத்தாராம்.

இதனால், பிரம்மாண்ட படத்தின் போஸ்டரில் அந்த நடிகையின் புகைப்படத்தை கிராபிக்ஸ் முறையில் மாற்றியிருப்பார்களோ என்று ரசிகர்கள் மத்தியில் சந்தேகம் எழுந்துள்ளது. இப்படி, ஒவ்வொரு படத்துக்கும் தன்னுடைய தோற்றத்தால் ரசிகர்களுக்கு அதிர்ச்சி மேல் அதிர்ச்சி கொடுத்து வரும் நடிகை, எப்போது முற்றுப்புள்ளி வைப்பார் என்று அனைவரும் எதிர்பார்த்து காத்திருப்பதாக கூறப்படுகிறது. 

ஆரூடத்திற்கும் உளவியலுக்கும் இடையில் நடைபெறும் மோதலில் ஏற்படும் விளைவுகளே படத்தின் கதை. மனோதத்துவ நிபுணரான நாயகன் பிரதாப், இவருக்கு ஜோசியத்தின் மீது நம்பிக்கையே கிடையாது. கை, கால் செயலிழந்த பிரதாப்புக்கும் ஜோசியர் ஒருவருக்கும் இடையே மோதல் இருந்துகொண்ட வருகிறது.

ஒருநாள் ஜோசியர் பிரதாப்பை சந்தித்து, உனக்கு திருமணமே நடக்காது, அப்படி நடந்தாலும் உன் மனைவியோடு நீண்டகாலம் வாழமுடியாது. அதேபோல், உனக்கு குழந்தையும் பிறக்காது, அப்படி பிறந்தாலும் இது உயிரோடு இருக்காது. உன்னால் இந்த வாழ்க்கையை நிம்மதியாகவும் வாழமுடியாது என்று கூறிவிட்டு செல்கிறார்.

இதை பொய்யாக்கி நிரூபிக்க அவர் எடுக்கிற சில முயற்சிகள் சமூகத்தில் பலவித விளைவுகளை ஏற்படுத்துகிறது. அந்த விளைவுகள் என்னென்ன? ஜோசியத்தை அவர் பொய்யாக்கி காட்டினாரா? இல்லையா? என்பதுதான் படத்தின் மீதிக்கதை.

படத்தின் தலைப்பான பிரகாமியம் என்பது 64 கலைகளில் ஒன்றாகும். மற்றொருவரின் மனதை தனது கட்டுப்பாட்டில் வைத்திருக்கும் கலையான கூடு விட்டு கூடும் பாயும் வித்தையை இது குறிக்கிறது. தமிழ் சினிமாவுக்கு அரிதான இந்த கதையை இயக்குனர் பிரதாப் தைரியத்துடன் கையிலெடுத்திருக்கிறார். ஆனால், அதை அழகாகவும், தெளிவாகவும் காட்சிப்படுத்துவதற்கு தவறியிருக்கிறார்.

படத்தின் இயக்குனரும், ஹீரோவும் ஒருவரே. இரண்டுவிதமான கதாபாத்திரத்தில் நடித்திருந்தாலும், இரண்டுமே ரொம்பவும் மிகையாக இருப்பதால் ரசிக்க முடியாமல் போகிறது. இப்படத்தில் இரண்டு கதாநாயகிகள். இரண்டு பேரின் நடிப்பும் ரொம்பவும் செயற்கையாக தெரிகிறது. படத்தில் அனைவரின் வசனங்கள் உச்சரிப்பும் ரொம்பவும் செயற்கையாக தெரிகிறது. எனவே, அவர்கள் அனைவரையும் கதையோடு ஒன்றி பார்க்க முடியவில்லை.

மொத்தத்தில் ‘பிரகாமியம்’ பிரியமில்லை.

நடிகர் சூர்யா - அனுஷ்கா, ஸ்ருதிஹாசன் நடிப்பில் உலகெங்கும் ‘சி3’ படம் நேற்று முதல் வெளியிடப்பட்டது. திருச்சி மாநகரிலும் நிறைய திரையரங்குகளில் இப்படம் திரையிடப்பட்டது. முன்னதாக, இப்படத்தை ஆன்லைனில் வெளியிடுவதை தடுக்கவேண்டும் என்று படக்குழுவினர் ஐகோர்ட்டில் மனு ஒன்றை தாக்கல் செய்து, அதில் வெற்றியும் கண்டனர்.

இதையடுத்து, சம்பந்தப்பட்ட இணையதளம் கோர்ட்டு உத்தரவை மீறி இப்படத்தை ஆன்லைனில் வெளியிடுவோம் என்று படக்குழுவுக்கு மிரட்டல் விடுத்திருந்தது. இதுகுறித்த அறிந்த நடிகர் சங்க பொதுச்செயலாளர் விஷால், தனது ஏற்பாட்டின் பேரில் தமிழகமெங்கும் ‘சி3’ படம் வெளியான அனைத்து திரையரங்குகளிலும் 4 பேர் கொண்ட கண்காணிப்பு குழுவை ஏற்படுத்தி கண்காணிக்க வைத்தார்.

அப்போது, திருச்சி ரம்பா திரையரங்கில் ‘சி3’ படத்தை செல்போனில் பதிவு செய்து 8 பேரின் செல்போன்களை அவர்கள் பறிமுதல் செய்துள்ளனர். இதையடுத்து, இந்த சம்பவம் தொடர்பாக திருச்சி கோட்டை காவல் நிலைய போலீசார் விசாரணை மேற்கொண்டு வருகின்றனர். 

இயக்குனரும், நடிகருமான பார்த்திபன், தற்போது நிறைய படங்களில் வில்லன் மற்றும் குணச்சித்திர வேடங்களை ஏற்று நடித்து வருகிறார். அந்த வேடங்கள் ரசிகர்கள் மத்தியில் அவருக்கு நல்ல வரவேற்பை பெற்றுத் தருவதால், தொடர்ந்து அதுமாதிரியான வேடங்களையே தேர்ந்தெடுத்து நடித்து வருகிறார்.

இந்நிலையில், விக்ரம் நடிப்பில் உருவாகி வரும் கவுதம் மேனனின் கனவுப் படமான ‘துருவ நட்சத்திரம்’ படத்தில் விக்ரமுக்கு வில்லனாக பார்த்திபனை நடிக்க வைக்க பேச்சுவார்த்தைகள் நடைபெற்று வருவதாக கூறப்படுகிறது. ஏற்கெனவே, இப்படத்தின் வில்லன் வேடத்தில் நடிக்க மலையாள நடிகர் பிரித்விராஜிடமும் பேச்சுவார்த்தை நடத்தி வந்ததாக கூறப்பட்டது என்பது குறிப்பிடத்தக்கது.

‘துருவ நட்சத்திரம்’ படத்தை கவுதம் மேனன் இயக்குவதோடு மட்டுமில்லாமல், அவரே தயாரிக்கவும் செய்கிறார். ஹாரிஸ் ஜெயராஜ் இப்படத்திற்கு இசையமைத்து வருகிறார். தெலுங்கு பட ஹீரோயின் ரீது வர்மா இப்படத்தின் கதாநாயகியாக ஒப்பந்தம் செய்யப்பட்டுள்ளதாகவும் பேச்சுக்கள் அடிபடுகிறது. 

‘மாவீரன் கிட்டு’ படத்தை தொடர்ந்து விஷ்ணு விஷால் தற்போது கதாநாயகன் படத்தை தயாரித்து, நடித்து வருகிறார். இப்படத்தில் இவருக்கு ஜோடியாக கேத்ரீன் தெரசா நடித்து வருகிறார். மேலும், சூரியும் முக்கிய கதாபாத்திரத்தில் நடித்து வருகிறார். முருகானந்தம் இயக்கும் இப்படத்தின் படப்பிடிப்பு விறுவிறுப்பாக நடைபெற்று வருகிறது.

இந்நிலையில், இப்படத்தை தொடர்ந்து சிவாஜியின் பேரனும், நடிகருமான துஷ்யந்த்தின் தயாரிக்கும் புதிய படத்திலும் விஷ்ணு விஷால் நடிக்க ஒப்பந்தமாகியிருந்தார். துஷ்யந்த் ஈஷான் புரொடக்ஷன்ஸ் என்ற நிறுவனத்தின் மூலம் இப்படத்தை தயாரிக்கிறார். இந்நிறுவனம் தயாரிக்கும் இரண்டாவது படம் இது என்பது குறிப்பிடத்தக்கது. முன்னதாக, இந்நிறுவனம் பிரபு, காளிதாஸ் ஜெயராம் நடிப்பில் வெளிவந்த ‘மீன்குழம்பும் மண்பானையும்’ என்ற படத்தை தயாரித்திருந்தது குறிப்பிடத்தக்கது.

இந்நிலையில், இப்படத்தில் விஷ்ணு விஷாலுக்கு ஜோடியாக மஞ்சிமா மோகன் ஒப்பந்தமாகியுள்ளார். இதனை, விஷ்ணு விஷாலே உறுதிப்படுத்தியுள்ளார். இவர்கள் இணையும் இந்த படத்தையும் ‘கதாநாயகன்’ படத்தின் இயக்குனர் முருகானந்தமே இயக்குகிறார் என்பது குறிப்பிடத்தக்கது.

மஞ்சிமா மோகன் நடிப்பில் சமீபத்தில் சிம்பு நடித்து வெளிவந்த ‘அச்சம் என்பது மடமையடா’ படம் ரசிகர்கள் மத்தியில் பெரும் வரவேற்பை பெற்றது. இதைத் தொடர்ந்து விக்ரம் பிரபு நடிப்பில் உருவாகும் ‘சத்ரியன்’ படத்தில் நடித்து முடித்துள்ளார். மேலும், உதயநிதி ஸ்டாலின் நடிப்பில் உருவாகவிருக்கும் ‘இப்படை வெல்லும்’ என்ற படத்திலும் நடிக்க ஒப்பந்தமாகியுள்ளார்.

மும்பையை சேர்ந்த டி.வி. நடிகை ஸ்ருதி. கடந்த ஆண்டு அக்டோபர் மாதம் நடிகை ஸ்ருதி, நடிகர் பியர்ல் புரி ஆகியோர் ஒரு நல்ல பாம்பை கையில் பிடித்தபடி நிற்கும் புகைப்படங்கள் சமூக வலைதளங்களில் வெளியாகின. அப்போது இருவரும் பாம்பை துன்புறுத்தியதாக விலங்கு நல ஆர்வலர்கள் வனத்துறை அதிகாரிகளிடம் புகார் கொடுத்தனர்.

இந்தநிலையில், நடிகை ஸ்ருதி தான் கையில் பிடித்து வைத்திருந்த பாம்பு உண்மையான பாம்பு அல்ல என்று கூறினார். இதையடுத்து அந்த புகைப்படத்தை வனத்துறை அதிகாரிகள் கலினாவில் உள்ள தடயவியல் ஆய்வகத்திற்கு அனுப்பி வைத்தனர்.

அங்கு நடத்தப்பட்ட ஆய்வில், நடிகை ஸ்ருதியும், பியர்ல் புரியும் உண்மையான நல்ல பாம்பை கையில் பிடித்து வைத்திருந்தது உறுதிப்படுத்தப்பட்டது. டெலிவிஷன் தொடர் படப்பிடிப்பு ஒன்றுக்கு கொண்டு வரப்பட்ட அந்த நல்ல பாம்பை அவர்கள் பிடித்து வைத்திருந்தது கண்டறியப்பட்டது.

இதையடுத்து நடிகை ஸ்ருதி, நடிகர் பியர்புரி மற்றும் அந்த டெலிவிஷன் தொடர் தயாரிப்பாளர்களான உட்கர்ஷ் பாலி, நிதின் சோலங்கி ஆகிய 4 பேர் நேற்றுமுன்தினம் அதிரடியாக கைது செய்யப்பட்டனர். வனத்துறையினர் அவர்கள் மீது வழக்குப்பதிவு செய்து விசாரணை மேற்கொண்டுள்ளனர்.

துபாய் உள்பட அனைத்து இடங்களிலும் நடிகர் சூர்யா நடித்த ‘சிங்கம்-3’ திரைப்படம் நேற்று வெளியானது. துபாயில் ஹயாத் ரீஜென்சியில் உள்ள ஒரு தியேட்டரில் இந்த படம் திரையிடப்பட்டது. இந்த படத்தை பார்ப்பதற்காக நடிகர் சூர்யா நேற்று துபாய் வந்தார்.

முதல் காட்சியாக இரவு 7 மணி அளவில் திரையிடப்பட்ட ‘சிங்கம்-3’ படத்தை ரசிகர்களோடு அமர்ந்து பார்த்தார். முன்னதாக நடிகர் சூர்யா, நிருபர்களுக்கு அளித்த பேட்டியில் கூறியதாவது:-

சிங்கம், சிங்கம்-2 படங்கள் வெற்றிகரமாக அமைந்தன. அதேபோல் ‘சிங்கம்-3’ படத்துக்கு தொடர்ச்சியாக சரியான கதை களம் அமைந்ததால் அதே குழுவினரோடு இயக்குனர் ஹரி இயக்கத்தில் வெற்றிகரமாக வெளியாகி உள்ளது. இதில் உள்ள சண்டை காட்சிகள் அனைவரையும் கவரும்.

இயக்குனர் ஹரி சிறு வயதில் போலீசில் சேர்ந்து பணியாற்ற வேண்டும் என்று விருப்பப்பட்டார். அந்த ஆசை நிறைவேறாமல் போனதால் அதை தான் இயக்கும் திரைப்படங்களில் காட்டி வருகிறார்.

தமிழ்நாட்டில் நடந்த ஜல்லிக்கட்டு விவகாரத்தில் போலீசாரை தவறாக சித்தரித்துள்ளனர். ஒரு சிலர் அதுபோல் இருக்கலாம். ஆனால் அனைவரும் பாராட்டும் வகையில் சீருடையை மாற்றி கொண்டு போராட்டத்தில் அமர்ந்த போலீசாரையும் நாம் கண்டுள்ளோம்.

இப்போதுள்ள தமிழக அரசியல் விவகாரங்களை நானும் உங்களை போல் பார்த்துக்கொண்டு வருகிறேன். தமிழ்நாட்டில் நல்லாட்சி அமையும் என்ற நம்பிக்கை எனக்கு உள்ளது.

நான் நடத்தி வரும் அகரம் அறக்கட்டளை சார்பில் குழு அமைக்கப்பட்டு கருவேல மரங்களை அகற்றி சிறந்த சுற்றுச்சூழலை தமிழகத்தில் ஏற்படுத்த முயற்சிகள் எடுத்து வருகிறேன். இது விறகாக பலருக்கு பயன்படும் என்பதால் இதில் வேலை வாய்ப்பும் ஏற்படுத்தி தரப்பட்டுள்ளது.

இவ்வாறு நடிகர் சூர்யா கூறினார்.