சென்னை, ஏப். 23-

மத்திய மந்திரி வெங்கையா நாயுடு இன்று சென்னை வந்தார். கிண்டியில் உள்ள நட்சத்திர ஓட்டலில் நடந்த ஒரு நிகழ்ச்சியில் கலந்து கொண்டார்.

அவரை நடிகர் கமல் ஹாசன், நடிகர் சங்கம் மற்றும் தயாரிப்பாளர் சங்க தலைவர் விஷால் ஆகியோர் சந்தித்து பேசினார்கள். இதில் தென்னிந்திய திரைப்பட வர்த்தக சபை தலைவர் சுரேஷ், நடிகர் கார்த்தி, டைரக்டர் பிரியதர்‌ஷன், தயாரிப்பாளர் ஞானவேல் ராஜா ஆகியோரும் கலந்து கொண்டனர்.

அப்போது நடிகர் விஷால் வெங்கையாநாயுடுவிடம் ஒரு கோரிக்கை மனு கொடுத்தார். அதில், திரைப்படங்கள் திரைக்க வருவதற்கு முன்னரே இணைய தளங்களில் வெளிவருவதால் தயாரிப் பாளர்கள் மிகவும் பாதிப் படைகிறார்கள். தயாரிப் பாளர்கள் வருமானம் ஈட்டும் வகையில் நடவடிக்கைகள் எடுக்கப்பட வேண்டும். முன் கூட்டியே இணைய தளங்களில் திரைப்படங்கள் வெளியாவதை தடுக்க வேண்டும் என்று வலியுறுத்தி இருந்தார்.

இணைய தளங்களில் திரைப்படங்கள் முன் கூட்டியே வெளியாவதை தடுப்பது பற்றி தகவல் தொழில் நுட்பத்துறை உயர் அதிகாரிகளுடன் கலந்து அதற்கான வழிமுறைகள் ஆராயப்படும்.

ஜி.எஸ்.டி. வரி விதிப் பால் பிராந்திய மொழி திரைப்படங்களுக்கு ஏற் படும் பாதிப்புகள் பற்றி விவாதிக்க மும்பை மற்றும் தென் மாநில சினிமா துறை பிரதிநிதிகளை அழைத்து நிதி மந்திரி அருண்ஜெட்லியை சந்தித்து விவாதிக்க ஏற்பாடு செய்ய வேண்டும்.

சினிமாவில் சென்சார் கூடாது என்ற கருத்தும் உள்ளது. அப்படியானால் சினிமாவில் கட்டுக்கோப்பு இல்லாமல் ஆகிவிடும் எனவே அதற்கான மாற்று வழிகள் பற்றி பரிசீலிக்கப்படும். இது தொடர்பாக முட்கல் கமிட்டி பரிந்துரைகள் ஏற்கனவே பரிசீலிக்கப்பட்டு வருகிறது.

இவ்வாறு அவர் கூறினார்.

பின்னர் வெளியே வந்த நடிகர் விஷால் நிருபர்களிடம் கூறியதாவது-

திருட்டு வீடியோ, இணைய தளங்களில் சினிமாக்கள் வெளிவருவதை தடுப்பது பற்றி மத்திய மந்திரியிடம் கூறினோம். அதை தடுக்க உரிய நடவடிக்கை எடுப்பதாக உறுதியளித்துள்ளார்.

திருட்டு வீடியோ பிரச்சினை தமிழகத்துக்கு மட்டுமல்ல, நாடு முழுவதும் உள்ள பிரச்சினை. தமிழக திரைப்படத்துறை வளர்ச்சிக்கான சில கோரிக் கைகளையும் முன்வைத் துள்ளோம். அவற்றை நிறைவேற்றி தருவதாக கூறி இருக்கிறார்.

செவாலியே விருது பெற்ற கமலஹாசனக்கு மத்திய அரசு சார்பில் பாராட்டு விழா நடத்தவும் வலியுறுத்தி இருக்கிறோம்.

இவ்வாறு அவர் கூறினார்.

நயன்தாரா நடிப்பில் கே.ஜே.ஆர் ஸ்டுடியோஸ் தயாரிக்கும் படம் ‘அறம்’. கோபி நயினார் இயக்கும் இந்த படத்துக்கு ஜிப்ரான் இசை அமைக்கிறார். ஒரு புதிய யுக்தியாக இந்த படத்தின் பின்னணி இசையமைப்பிற்காக, ஒரு முன்னணி இசை நிறுவனத்துடன் கைகோர்த்துள்ளார்.

இதன் மூலம் ‘லார்ட் ஆப் தி ரிங்க்ஸ்’, ‘ஹரி பாட்டர்’, ‘கேம் ஆம் தோரோன்ஸ்’ உள்ளிட்ட பல பிரம்மாண்ட ஹாலிவுட் படங்களுக்கு பின்னணி இசை அமைத்த தி பி.கே.எப் பிரேக் பில்ஹார்மோனியா ஆர்கெஸ்ட்ரா குழுவுடன் இணைந்து ‘அறம்’ படத்திற்கான இசை வேலைகளை தொடங்குகிறார்.

“ஜிப்ரானின் இந்த புதிய முயற்சி ரசிகர்களிடையே பெரும் வரவேற்பையும், எதிர்பார்ப்பையும் ஏற்படுத்தும்” என்று படக்குழுவினர் தெரிவித்தனர்.

புதிய இயக்குனர் ஸ்ரீகண்டன் இயக்கியுள்ள படம் ‘தப்புதண்டா’. சத்யா கதாநாயகனாக நடித்துள்ள இந்த படத்தில் நாயகியாக நடித்திருப்பவர் ஸ்வேதா கய். ‘இது என்ன மாயம்’ படத்தில் சிறிய வேடத்தில் நடித்த இவர், இந்த படத்தில் கதாநாயகி ஆகி இருக்கிறார். இது பற்றி கூறிய அவர்...

“என் பெயர் ஸ்வேதா கய் என்று இருப்பதால் நான் வட இந்திய பெண் என்று நினைக்கிறார்கள். நான் தமிழ் பெண். எனது பெயருக்குப்பின்னால், எனது அம்மா காயத்திரியின் முதல் இரண்டு எழுத்தை சேர்த்து ஸ்வேதா கய் என்று வைத்து இருக்கிறேன்.

இந்த படத்தில் எனக்கு வாய்ப்பு எளிதாக கிடைத்து விடவில்லை. இந்த படத்தின் நாயகி தேர்வுக்கு 60 பெண்கள் வந்து இருந்தனர். பல கோணங்களில் நடித்துக்காட்ட சொன்னார்கள். நீண்ட வசனத்தை கொடுத்து பேச சொன்னார்கள். இதில், எல்லாம் ‘ஓகே’ ஆனபிறகு, நான் ஒல்லியாக இருப்பதாக சொன்னார்கள். இதனால் நான் செலக்ட் ஆவேனா என்று பயந்து கொண்டே இருந்தேன்.

பெரிய போராட்டத்தை சந்தித்த பிறகுதான் இதில் நடிக்க தேர்வு ஆனேன். அப்படி கிடைத்த வாய்ப்பை சரியாக பயன்படுத்திக் கொள்ள வேண்டும் என்பதற்காக, இதில் பாத்திரத்தை உணர்ந்து நடித்து இருக்கிறேன். நிச்சயம் இந்த படத்தில் எனக்கு நல்ல பெயர் கிடைக்கும்” என்றார்.

‘பாகுபலி’, ‘பாகுபலி-2’ படங்களில் நடித்துள்ள தமன்னா அந்த அனுபவங்களை இப்படி சொல்கிறார்....

“ ‘பாகுபலி’ படத்தில் நடித்த பிறகு ஒரு நடிகையாக என் மீது அதிக நம்பிக்கை ஏற்பட்டு இருக்கிறது. எந்த சவாலான காட்சிகளிலும் என்னால் நடிக்க முடியும் என்ற துணிச்சலை இந்த படம் ஏற்படுத்தி இருக்கிறது. இந்த படத்துக்கு பிறகு எனது ‘இமேஜ்’ முழுவதும் மாறிவிட்டது.

இந்த படத்தில் பணியாற்றிய அனுபவம் ஒரு கனவு போல இருக்கிறது. சண்டை காட்சிகளில் நடித்ததை மறக்கவே முடியாது. இன்னும் எத்தனை படங்களில் நடித்தாலும், ‘பாகுபலி’யில் நடித்தது என் மனதைவிட்டு அகலாது. திரை உலகில் எனக்கு ஒரு வித்தியாசமான பாதையை வகுத்துக்கொடுத்த இயக்குனர் ராஜமவுலிக்கு நன்றி கூற கடமைப்பட்டிருக்கிறேன்.

‘பாகுபலி-2’-ல் முதல் பாகத்தில் நடித்த அதே வேடம் தான் என்றாலும், இதில் அழுத்தமான கதை இருக்கிறது. ஒரு நடிகை என்பதையும் தாண்டி குதிரை ஏற்றம், சண்டை காட்சிகளில் நடித்தேன். இதற்காக அவற்றை முறைப்படி பயின்றேன்.

அனுஷ்கா, பிரபாஸ், சத்யராஜ் ஆகியோருடன் அதிக காட்சிகளில் நடித்திருக்கிறேன். எல்லோரும் என் நண்பர்கள். இந்த படத்தில் நடித்ததன் மூலம் என் சினிமா கனவு நிறைவேறிவிட்டதாக நினைக்கிறேன். இதுபோன்ற ஒரு படம் எடுப்பது சிரமம். இதில் எனக்கு வாய்ப்பு கிடைத்தது அதிர்ஷ்டம். அதை சரியாக பயன்படுத்தி இருப்பதாக நினைக்கிறேன். ‘பாகுபலி’ படத்துடன் வேறு எதையும் ஒப்பிட முடியாது”.