ஸ்கோடா இந்தியா நிறுவனம் கோடியக் கார்ப்பரேட் எடிஷன் காரை இந்தியாவில் அறிமுகம் செய்துள்ளது. புதிய ஸ்கோடா கோடியாக் கார்ப்பரேட் எடிஷன் மாடல் விலை ரூ. 32.99 லட்சம் (எக்ஸ்-ஷோரூம்) என நிர்ணயம் செய்யப்பட்டுள்ளது. இது ஸ்டான்டர்டு மாடலை விட ரூ. 2 லட்சம் விலை குறைவாக நிர்ணயம் செய்யப்பட்டுள்ளது. எனினும், இந்த கார் அனைவருக்கும் வழங்கப்படாது.
புதிய கார்ப்பரேட் எடிஷன் மாடல் இந்திய சந்தையில் ஸ்கோடா வாடிக்கையாளர்களுக்கு மட்டுமே வழங்கப்படுகிறது. அந்த வகையில் ஏற்கனவே ஸ்கோடா நிறுவன வாகனங்களை வைத்திருப்போர் மட்டுமே புதிய கோடியாக் கார்ப்பரேட் எடிஷனை வாங்க முடியும்.
ஸ்கோடா கோடியாக் எஸ்.யு.வி.: ஸ்டைல் மற்றும் எல்.கே. (லாரின் மற்றும் கிளெமன்ட்) என இருவித வேரியன்ட்களில் கிடைக்கிறது. இதன் பேஸ் ஸ்டைல் மாடல் விலை ரூ. 35.36 லட்சம் என்றும் எல்.கே. வேரியண்ட் விலை ரூ.36.78 லட்சம் (எக்ஸ்-ஷோரூம்) என நிர்ணயம் செய்யப்பட்டுள்ளது.
ஸ்கோடா கோடியாக் கார்ப்பரேட் எடிஷன் ஸ்டைல் வேரியண்ட்டை தழுவி உருவாக்கப்பட்டுள்ளது. புதிய வேரியண்ட்டில் ஸ்டான்டர்டு மாடலில் உள்ள பல்வேறு அம்சங்கள் மற்றும் உபகரணங்கள் வழங்கப்பட்டுள்ளன. இவற்றில் ஃபுல் எல்.இ.டி. ஹெட்லேம்ப்கள், எல்.இ.டி. டெயில் லைட்கள், முன்புறம், பின்புறம் ஃபாக் லேம்ப்கள் வழங்கப்பட்டுள்ளன.
புதிய கார்ப்பரேட் எடிஷனில் 2.0 லிட்டர் TDI டீசல் என்ஜின் வழங்கப்பட்டுள்ளது. இந்த என்ஜின் 148 பி.ஹெச்.பி. பவர், 340 என்.எம். டார்க் செயல்திறன் வழங்குகிறது. இத்துடன் 7-ஸ்பீடு டி.எஸ்.ஜி. ஆட்டோமேடிக் கியர்பாக்ஸ் வழங்கப்பட்டுள்ளது.
