டுகாட்டி இந்தியா நிறுவனம் தனது புதிய அட்வென்ச்சர் டூரர், DesertX மோட்டார்சைக்கிளை இந்திய சந்தையில் அறிமுகம் செய்து இருக்கிறது. புதிய டுகாட்டி DesertX விலை ரூ. 17 லட்சத்து 91 ஆயிரம், எக்ஸ்-ஷோரூம் என நிர்ணயம் செய்யப்பட்டு உள்ளது. ஒற்றை வேரியண்டில் கிடைக்கும் டுகாட்டி DesertX மாடல் இந்தியாவில் டிரையம்ப் டைகர் 900 ரேலி மற்றும் ஹோண்டா ஆஃப்ரிக்கா ட்வின் போன்ற மாடல்களுக்கு போட்டியாக அமைகிறது.
புதிய DesertX அட்வென்ச்சர் மாடலில் 937 சிசி, L ட்வின் ரக என்ஜின் கொண்டிருக்கிறது. இதே என்ஜின் புதிய மான்ஸ்டர் மற்றும் மல்டிஸ்டிராடா வி2 மோட்டார்சைக்கிள்களிலும் வழங்கப்பட்டு இருக்கிறது. எனினும், இந்த என்ஜின் குறைந்த எடை மற்றும் அதிக திறன் கொண்ட வரையில் மாற்றப்பட்டு இருப்பதாக டுகாட்டி தெரிவித்துள்ளது. அந்த வகையில் புதிய என்ஜின் 110 ஹெச்பி பவர், 92 நியூட்டன் மீட்டர் டார்க் இழுவிசையை வெளிப்படுத்துகிறது.
இத்துடன் ஃபுல் எல்இடி லைட்டிங், ப்ளூடூத் சார்ந்த 5-இன்ச் TFT டிஸ்ப்ளே வழங்கப்பட்டு இருக்கிறது. இத்துடன் ஸ்போர்ட், டூரிங், அர்பன், வெட், ரேலி மற்றும் எண்டியூரோ என ஆறு விதமான ரைடிங் மோட்கள்- ஃபுல், ஹை, மீடியம் மற்றும் லோ என நான்கு வித பவர் மோட்களை கொண்டிருக்கிறது.
இவை தவிர குரூயிஸ் கண்ட்ரோல், போஷ் IMU, என்ஜின் பிரேக் கண்ட்ரோல், டிராக்ஷன் கண்ட்ரோல், வீலி கண்ட்ரோல், பை-டைரெக்ஷனல் குயிக்ஷிஃப்டர், கார்னெரிங் ABS போன்ற அம்சங்கள் வழங்கப்பட்டு இருக்கிறது. ஸ்டைலிங்கை பொருத்தவரை ட்வின் பாட் ஹெட்லைட், உயரமான விண்ட்-ஸ்கிரீன், செமி ஃபேரிங் டிசைன், 21 லிட்டர் ஃபியூவல் டேன்க், ஸ்ப்லிட் ஸ்டைல் சீட்கள், சைடு ஸ்லங் எக்சாஸ்ட், பேஷ் பிலேட், டியூப்லெஸ் டயர், வயர் ஸ்போக் வீல்கள் வழங்கப்பட்டு இருக்கின்றன.
மற்ற ஹார்டுவேர் அம்சங்களை பொருத்தவரை கயபாவின் அப்சைடு டவுன் முன்புற ஃபோர்க்குகள், பின்புறம் மோனோ ஷாக், இரண்டையும் அட்ஜஸ்ட் செய்யும் வசதி வழங்கப்பட்டு இருக்கிறது. இந்த மோட்டார்சைக்கிளை கஸ்டமைஸ் செய்ய டுகாட்டி ஏராளமான அக்சஸரீக்களை ஆப்ஷனாக வழங்குகிறது.
