சுசுகி நிறுவனம் ஜிக்சர் 250 மற்றும் ஜிக்சர் எஸ்எஃப் 250 பிஎஸ்6 மோட்டார்சைக்கிள் மாடல்களை இந்திய சந்தையில் அறிமுகம் செய்தது. புதிய மோட்டார்சைக்கிள்களின் விலை முறையே ரூ. 1.63 லட்சம் மற்றும் ரூ. 1.74 லட்சம் என நிர்ணயம் செய்யப்பட்டுள்ளது. அனைத்து விலைகளும் எக்ஸ் ஷோரூம் அடிப்படையில் குறிப்பிடப்பட்டுள்ளது.
இரு மோட்டார்சைக்கிள்களுடன் ஜிக்சர் எஸ்எஃப்250 மோட்டோ ஜிபி பிஎஸ்6 எடிஷனையும் சுசுகி நிறுவனம் அறிமுகம் செய்துள்ளது. இதன் விலை ரூ. 1,74,900, எக்ஸ் ஷோரூம் என நிர்ணயம் செய்யப்பட்டுள்ளது.
ஜிக்சர் 250 மாடல் டூயல் டோன்- மெட்டாலிக் மேட் சில்வர் / பிளாக் மற்றும் சிங்கிள் டோன் மெட்டாலிக் மேட் பிளாக் நிறங்களில் கிடைக்கிறது. ஜிக்சர் எஸ்எஃப் 250 மாடல் மெட்டாலிக் மேட் பிளாட்டினம் சில்வர் மற்றும் மெட்டாலிக் மேட் பிளாக் நிறங்களில் கிடைக்கிறது.
சுசுகி ஜிக்சர் 250 பிஎஸ்6 மாடல்களில் மூன்று சிலிண்டர் ஏர்/ஆயில் கூல்டு 249சிசி என்ஜின் வழங்கப்பட்டுள்ளது. இந்த என்ஜின் 26 பிஹெச்பி பவர், 22.2 என்எம் டார்க் செயல்திறன் வழங்குகிறது. இந்த என்ஜினுடன் 6 ஸ்பீடு கியர்பாக்ஸ் வழங்கப்பட்டு இருக்கிறது.
புதிய மேம்பட்ட என்ஜின் தவிர இந்த மோட்டார்சைக்கிள் மாடல்களில் எந்த மாற்றங்களும் மேற்கொள்ளப்படவில்லை. அந்த வகையில் புதிய மாடல்களில் பிஎஸ்4 வெர்ஷனில் வழங்கப்பட்ட அம்சங்கள் மற்றும் உபகரணங்கள் வழங்கப்பட்டு இருக்கின்றன.
