2021 ஸ்கோடா ஆக்டேவியா மாடல் அடுத்த மாதம் இந்திய சந்தையில் அறிமுகம் செய்யப்பட இருக்கிறது. முன்னதாக இந்த மாடல் ஏப்ரல் மாத வாக்கில் அறிமுகம் செய்ய திட்டமிடப்பட்டது. எனினும், தற்போதைய கொரோனா வைரஸ் பாதிப்பு காரணமாக இதன் வெளியீடு ஒத்திவைக்கப்பட்டு இருக்கிறது.
புது ஸ்கோடா ஆக்டேவியா வெளியீட்டு தேதி இதுவரை அறிவிக்கப்படவில்லை. எனினும், 2021 ஆக்டேவியா மாடல் ஜூன் 10 ஆம் தேதி அறிமுகம் செய்யப்பட இருப்பதாக ஸ்கோடா விற்பனையாளர்கள் தெரிவித்துள்ளனர் என தகவல் வெளியாகி உள்ளது.
மேலும் 2021 ஸ்கோடா ஆக்டேவியா மாடல் விலை ரூ. 27.5 லட்சத்தில் துவங்கி ரூ. 32 லட்சம், எக்ஸ்-ஷோரூம் வரை நிர்ணயம் செய்யப்படலாம் என கூறப்படுகிறது. இத்துடன் புதிய ஆக்டேவியா மாடலுக்கான முன்பதிவு துவங்கப்பட்டு இருப்பதாக தெரிகிறது.
2021 ஸ்கோடா ஆக்டேவியா மாடல் வெளியீட்டை தொடர்ந்து இதன் விநியோகம் துவங்கும் என ஸ்கோடா இந்தியா இயக்குனர் ஜாக் ஹாலின்ஸ் ஏற்கனவே தெரிவித்து இருக்கிறார். மேலும் இதன் விற்பனை அடுத்த மாதம் துவங்கும் என்றும் அவர் தெரிவித்து இருந்தார்.
