ஹார்லி டேவிட்சன் நிறுவனத்தின் ஸ்டிரீட் 750 லிமிட்டெட் எடிஷன் மோட்டார்சைக்கிள் வாங்குவோருக்கு ரூ. 72 ஆயிரம் வரை தள்ளுபடி வழங்கப்படுகிறது.
ஹார்லி டேவிட்சன் 750 லிமிட்டெட் எடிஷன் பிஎஸ்6 மாடலின் விலை ரூ. 5.47 லட்சம் ஆகும். எனினும், தேர்வு செய்யப்பட்ட அதிகாரப்பூர்வ விற்பனையகங்களில் இந்த மோட்டார்சைக்கிள் ரூ. 4.75 லட்சம் விலையில் விற்பனை செய்யப்படுகிறது. அனைத்து விலைகளும் எக்ஸ் ஷோரூம் அடிப்படையில் குறிப்பிடப்பட்டுள்ளது.
லிமிட்டெட் எடிஷன் ஸ்டிரீட் 750 மாடல் கடந்த ஆண்டு ஆகஸ்ட் மாதத்தில் அறிமுகம் செய்ய்பட்டது. அறிமுகமான போது இந்த மாடலின் விலை பிஎஸ்4 மாடலை விட ரூ. 13 ஆயிரம் வரை அதிகம் ஆகும். ஸ்பெஷல் எடிஷன் மாடல் ஹார்லி டேவிட்சன் நிறுவனம் இந்திய சந்தைக்கு வந்து பத்து ஆண்டுகள் ஆனதை கொண்டாடும் வகையில் வெளியிடப்பட்டது.
ஹார்லி டேவிட்சன் ஸ்டிரீட் 750 லிமிட்டெட் எடிஷன் மாடல் மொத்தமே 300 யூனிட்கள் தான் உருவாக்கப்படுகிறது. இந்த மோட்டார்சைக்கிள் பிரத்யேக நிறம் மற்றும் பெட்ரோல் டேன்க் மீது புதிய ஸ்டிக்கர்கள் வழங்கப்பட்டுள்ளன. இவைதவிர இந்த மோட்டார்சைக்கிளில் எவ்வித மாற்றமும் மேற்கொள்ளப்படவில்லை.
ஹார்லி டேவிட்சன் ஸ்டிரீட் 750 மாடலில் பிஎஸ்6 ரக 749சிசி, வி ட்வின், லிக்விட் கூல்டு என்ஜின் வழங்கப்பட்டுள்ளது. இந்த என்ஜின் 60 என்எம் டார்க் செயல்திறன் வழங்குகிறது. இத்துடன் 6 ஸ்பீடு கியர்பாக்ஸ் வழங்கப்படுகிறது.
