முகமது ஷமி மூலம் ரசிகர்களுக்கு தற்போது என்னை யார் என்று தெரியும்: சேத்தன் ஷர்மா

ஆப்கானிஸ்தானுக்கு எதிரான ஆட்டத்தில் இந்திய வேகப்பந்து வீச்சாளர் முகமது ஷமி ஹாட்ரிக் விக்கெட் வீழ்த்தி சாதனைப் படைத்தார். உலகக்கோப்பையில் ஹாட்ரிக் வீழ்த்திய 2-வது இந்திய வீரர், உலகளவில் 9-வது வீரர் என்ற பெருமையை ஷமி பெற்றார்.

இந்நிலையில் 1987 உலகக்கோப்பையில் ஹாட்ரிக் விக்கெட் வீழ்த்திய மற்றொரு இந்திய வீரரான சேத்தன் ஷர்மா, முகமது ஷமி மூலம் ரசிகர்கள் என்னை தெரிந்து கொள்வார்கள் என்று தெரிவித்துள்ளார்.

இதுகுறித்து சேத்தன் ஷர்மா கூறுகையில் ‘‘சொந்த நாட்டைச் சேர்ந்த சக வீரர் நீண்ட காலங்கள் கழித்து சாதனை புரிவது எப்போதும் மகிழ்ச்சியான உணர்வாக இருக்கும். ஷமி 3-வது விக்கெட்டை வீழ்த்தியபோது, உடனடியாக 32 வருடத்திற்கு முன் நான் செய்த சாதனையை நோக்கி எண்ணம் சென்றது.



தற்போதுள்ள கிரிக்கெட் ரசிகர்களுக்கு 30 வருடத்திற்கு முன்பு நான் என்ன சாதனை செய்தேன் என்பது குறித்து தெரியாது. ஆனால், தற்போது தெரிந்து கொள்வார்கள். முகமது ஷமிக்கு நன்றி. தற்போதைய கிரிக்கெட் ரசிகர்களுக்கு ஒரு இந்தியர்தான் முதன்முறையாக உலகக்கோப்பையில் ஹாட்ரிக் விக்கெட் வீழ்த்தியது என்பது இனிமேல் தெரியவரும்’’ என்றார்.