செய்திகள்
ஸ்ரீசந்த்

என்னிடம் இன்னும் திறமை உள்ளது: விஜய் ஹசாரே டிராபியில் ஐந்து விக்கெட் வீழ்த்தி நிரூபித்த ஸ்ரீசந்த்

Published On 2021-02-22 09:56 GMT   |   Update On 2021-02-22 09:56 GMT
கேரளா அணியின் வேகப்பந்து வீச்சாளரான ஸ்ரீசந்த், உத்தர பிரதேசம் அணிக்கெதிராக ஐந்து விக்கெட் வீழ்த்தி அசத்தினார்.
கேரள மாநிலத்தின் வேகப்பந்து வீச்சாளர் ஸ்ரீசந்த். இவர் இந்திய அணிக்காக விளையாடியவர். ஐபிஎல் போட்டியின்போது மேட்ச் பிக்சிங்கில் ஈடுபட்டதாக ஆயுட்கால தடைபெற்றார். அதன்பின் தண்டனை ஏழு ஆண்டாக குறைக்கப்பட்டது.

தடைக்காலம் முடிந்ததும் மீண்டும் கேரள மாநில கிரிக்கெட் அணி்யில் இடம் பிடித்தார். முதன்முறையாக சையது முஷ்டாக் அலி டிராபியில் விளையாடினார்.

தற்போது விஜய் ஹசாரே டிராபி ஒருநாள் கிரிக்கெட் தொடர் நடைபெற்று வருகிறது. இன்று நடைபெற்ற ஆட்டம் ஒன்றில் கேரளா - உத்தர பிரதேச அணிகள் மோதின. இந்த போட்டியில் ஸ்ரீசந்த் அபாரமாக பந்து வீசி ஐந்து விக்கெட் வீழ்த்தினார்.

சக்சேனா முதல் விக்கெட்டை வீழ்த்தினார். அதன்பின் அபிஷேக்கை 54 ரன்னில் வீழ்த்தினார் ஸ்ரீசந்த். 2-வது விக்கெட்டாக அக்‌ஷ்தீப் நாத்தை 68 ரன்னில் வீழ்த்தினார். 3-வது விக்கெட்டாக புவனேஷ்வர் குமாரையும், 4-வது விக்கெட்டாக மோசின் கானையும், 5-வது விக்கெட்டாக ஷிவம் சர்மாவையும் வீழ்த்தினார். இதனால் உத்தர பிரதேசம் 49.4 ஓவரில் 283 ரன்கள் எடுத்து ஆல்அவுட் ஆனது.

லிஸ்ட் ஏ போட்டியில் ஸ்ரீசந்த் 5 விக்கெட் வீழ்த்துவது இது 2-வது முறையாகும்.
Tags:    

Similar News